කතෘ අඥාතයි (The Author is Unknown)

 "අම්මේ, මම ක්ලාස් යන්නද?" 

පහළොස් හැවිරිදි ආකාශ් සාලයේ සෝෆාවේ වාඩි වී සිටි පියුමාලි දෙස නොබලාම ඇසුවේය. ඔහුගේ හඬේ තිබුණේ අකමැත්ත මුසු යාන්ත්‍රික බවකි. පියුමාලි කිසිවක් නොකියා ඔහුගේ මුහුණ දෙස බැලුවාය. කෙස්වැටිය වෙනස් වී ඇත. ටී-ෂර්ට් එකේ අත් දිගු කර ඇත. ඇයට ආකාශ් පෙනුණේ තමාගෙන් ගිලිහී යන, තමාට අයිති නැති නන්නාඳුනන තරුණයෙකු ලෙසය.

"ම්ම්... ඉක්මනට එන්න. පාරවල් ගාණේ රස්තියාදු වෙන්නේ නැතුව." 

ඇගේ හඬේ තිබුණේ ආදරයට වඩා විධානයකි.ආකාශ් පිටව ගිය පසු පියුමාලි ගැඹුරු සුසුමක් හෙළුවාය. අසූවේ දශකයේ මුල උපන් ඇයට, ජීවිතය යනු වගකීම් සහ සීමාවන්ගේ එකතුවකි. සැමියාගෙන් වෙන් වූ දා සිට ඇගේ මුළු ලෝකයම වූයේ ආකාශ්ය. ඔහු වෙනුවෙන් ඇය තනිවම අප්‍රමාණ දුක් වින්දාය. ඇයට අවශ්‍ය වූයේ තමා කියන පදයට හැදෙන, තමාගේ සෙවණැල්ල සේ සිටින "හොඳ ළමයෙකු" නිර්මාණය කිරීමටය. නමුත් මීට මාස තුනකට පෙර ඒ සියල්ල උඩුයටිකුරු විය. එදා ආකාශ්ගේ කාමරයේ දොර අඩවල් කර තිබුණි. පොතක් තැබීමට එහි ගිය පියුමාලිට දුටු දෙයින් ඇගේ පපුව නැවතුණි. ආකාශ් ස්වයං වින්දනයේ යෙදෙමින් සිටියේය. පියුමාලිට දැනුණේ තමා මහ පොළොවට වැලලුණාක් මෙනි. ඇයට අනුව එය මහා පාපයකි, "නොහැදියාවකි", ඔහු කුඩුකාරයෙකු හෝ අපරාධකරුවෙකු වීමට යන පළමු පියවරය. එතැන් පටන් ඇය ආකාශ් දෙස බැලුවේ සැකයෙනි. ඔහුගේ දුරකථනය, ඔහුගේ පොත් බෑගය, ඔහු නාන කාමරයේ ගත කරන කාලය පවා ඇය මැන බලන්නට වූවාය. 

Photo Credit- Google Images

"උඹ දැන් හරි නරක් වෙලා ආකාශ්. ඉස්කෝලේ වැඩත් ඔක්කොම පාළු කරගෙන," 

ඇය නිතරම ඔහුට දොස් නැඟුවාය. ආකාශ් කිසිවක් නොකියා නිහඬ විය. ඒ නිහඬතාවය ඇතුළෙන් ඔවුන් අතර තිබූ බැඳීම සෙමෙන් දියවී ගියේය. ඇගේ දැඩි පාලනය සහ සැකය හමුවේ ආකාශ් මවගෙන් තවත් ඈත් විය. ඔහුගේ ලකුණු තවත් අඩු විය. පියුමාලි එය දුටුවේ තමාගේ සැකය සනාථ වීමක් ලෙසය. බැරිම තැන ඇය ආකාශ්ගේ පියා වන චන්දනට ඇමතුමක් ගත්තාය. වෙන්ව ජීවත් වුවද චන්දන දරුවාගේ අවශ්‍යතා සොයා බැලුවේය.

"ඔයාගේ පුතා දැන් අතින් අල්ලන්න බෑ චන්දන. සේරම නරක වැඩ පුරුදු වෙලා. ඉගෙනීමත් බිංදුවට වැටිලා. ඔයා අදම ඇවිත් ඕකට හොඳට දෙකක් කතා කරලා, තදින් අවවාද කරන්න. නැත්නම් ඕකා විනාශ වෙයි," 

පියුමාලි දුරකථනයෙන් හැඬුවාය.එදින සවස චන්දන නිවසට ආවේය. පියුමාලි හිතුවේ චන්දන ආකාශ්ට කෑගසා බණිනු ඇත කියාය. නමුත් චන්දන කළේ ආකාශ්ව කැටුව අසල ඇති ක්‍රීඩා පිටියට යාමයි. හවස් යාමයේ මඳ පවන හමා ආ ක්‍රීඩා පිටියේ වැට අසල චන්දන සහ ආකාශ් බොහෝ වේලාවක් නිහඬව බලා සිටියහ. ඈත අහසේ තරු එකින් එක පාදෙන්නට පටන් ගෙන තිබුණි.

"පුතා..." 

චන්දන සෙමෙන් ආකාශ්ගේ උරහිසට අතක් තැබුවේය. ඔහුගේ හඬේ තිබුණේ පියෙකුට වඩා මිතුරෙකුගේ ස්වරයකි. 

"අම්මා ඔයා ගැන ගොඩක් බයෙන් ඉන්නේ. එයා හිතන්නේ ඔයා සෑහෙන්න වෙනස් වෙලා කියලා."

ආකාශ් සපත්තු අගින් බිම තිබූ බොරළු කැටයක් පසෙකට තල්ලු කරමින් බිම බලාගත්තේය. 

"අම්මා හිතන්නේ මම මහා වැරදිකාරයෙක් කියලා තාත්තේ. දැන් මට ගෙදර ඉන්නත් අප්පිරියයි. හැම තිස්සෙම බලන්නේ රවාගෙන, සැකෙන්. මම මොනවා කරත් ඒක වැරැද්දක් විදිහටමයි එයා දකින්නේ."

චන්දන මෘදු ලෙස සිනාසුණේය. 

"මම දන්නවා පුතා. ඔයා දැන් ඉන්නේ ළමා කාලයයි තරුණ කාලයයි අතර මැද කලාපයක. ඔය වයසට සිරුරේ, මනසේ ඇතිවන හෝමෝන වෙනස්කම්, අලුත් හැඟීම්, කුතුහලය කියන්නේ ජීව විද්‍යාත්මකව ඉතාම සාමාන්‍ය දෙයක්. මමත් ඔය වයස පසු කරපු කෙනෙක්. ඒක පාපයක්වත්, නොහැදියාවක්වත්, ලෙඩක්වත් නෙවෙයි. හැබැයි... ඒ දේවල් අපේ ජීවිතේ, අපේ ඉලක්ක සහ අධ්‍යාපනය අඩාල කරගන්න හේතුවක් කරගන්න හොඳ නැහැ. තමන්ගේ හැඟීම් පාලනය කරගන්න ඉගෙන ගන්න එක තමා නියම පිරිමිකම."

තමා මහා අපරාධකාරයෙකු නොවන බව පියා තේරුම් ගැනීම ආකාශ්ගේ හිතට මහා සහනයක් විය. පපුව ඇතුළේ හිරවී තිබූ මහා බරක් නිදහස් වූවා සේ ඔහුට දැනුණි.

"හැබැයි පුතා, අම්මා එක්ක තරහ වෙන්න එපා," චන්දන නැවතත් පැවසීය. 

"අම්මා ඉපදුණේ වෙනස්ම කාලෙක. එයා හැදුණු වැඩුණු සාම්ප්‍රදායික වටපිටාව ඇතුළේ එයා දන්නේ ආදරය පාලනයෙන් සහ නීති රීතිවලින් විතරක් පෙන්වන්න. ඔයා වැරදි පාරක ගිහින් ජීවිතය විනාශ කරගනියි කියන මහා බය විතරයි එයාගේ හිතේ තියෙන්නේ. ඒ නිසා ඔයා ඔයාගේ වැඩ ටික හරියට කරලා පෙන්වන්න. එතකොට අම්මගේ හිතේ තියෙන බය ඉබේම නැති වෙලා යයි."

එතැන් පටන් ආකාශ් මවට වඩා පියාට ලැදි විය. ඔහු තමන්ගේ ලෝකයේ සිදුවන ඕනෑම රහසක්, ගැටලුවක් තාත්තා සමඟ විවෘතව බෙදා ගත්තේය. නිවසට පැමිණි පසුද ඔහු නිතරම දුරකථනයෙන් පියා සමඟ සිනාසෙමින් කතා කරනු දුටු පියුමාලිගේ හදවත ඊර්ෂ්‍යාවෙන් සහ දැඩි වේදනාවෙන් පිරී ගියේය. ඇයට දැනුණේ තමා කොන් වී ඇති බවකි.

"මම රෑ තිස්සේ නොනිදා, ලෙඩට දුකට තනිවම ළඟ ඉඳන් හදපු දරුවා. දැන් හැමදේටම තාත්තා ලොකු වෙලා. 

"ඔයා මගෙන් දරුවා සූක්ෂ්මව ඈත් කරනවා චන්දන," 

දිනක් පියුමාලි චන්දනට දුරකථනයෙන් දැඩි ලෙස චෝදනා කළාය.චන්දන පියුමාලිගේ වේදනාව තේරුම් ගත්තේය. ඔහු සන්සුන්ව මෙසේ කීවේය. 

"පියුමාලි... ඔයා තාමත් හිතන්නේ 1980 ගණන්වල විදිහට. මේ ඉන්නේ Gen Z පරම්පරාවේ දරුවෙක්. තාක්ෂණයත් එක්ක ලෝකය දකින ළමයෙක්. ඉස්සර වගේ අණ කරලා, බය කරලා, හැඟීම් යටපත් කරලා දරුවෝ හදන්න බැහැ. වැරැද්ද සහ වයසට සිදුවන ජීව විද්‍යාත්මක වෙනස්කම් පටලවා ගන්න එපා. ඔයා එයාගේ පෞද්ගලිකත්වයට ගරු කරන්න. නිතරම වැරදි හොයන එක නතර කරලා, එයා කැමති දේවල් ගැන කතා කරන්න. සැකය වෙනුවට මිත්‍රත්වය දෙන්න. එතකොට එයා ඔයාගෙන් හැංගෙන්නේ නැහැ."

චන්දන දුන් උපදෙස පියුමාලිගේ හිතට තදින් වැදුණි. ඇය සැබවින්ම දරුවාට පණ මෙන් ආදරය කළාය. නමුත් ඇගේ ආරක්ෂාකාරී ආදරය දරුවාට සිරගෙයක් වී ඇති බව ඇයට වැටහුණි. ඇය සෙමෙන් වෙනස් වීමට තීරණය කළාය.පළමු පියවර ලෙස පියුමාලි ආකාශ්ගේ පෞද්ගලිකත්වයට ඉඩ දුන්නාය. ඇය ඔහුගේ කාමරයට යද්දී දොරට තට්ටු කිරීමට පුරුදු වූවාය. ඔහුගේ බෑගය හෝ දුරකථනය රහසින් පරීක්ෂා කිරීම සහමුලින්ම නතර කළාය. මුල් දිනවල ආකාශ් මවගේ මේ හදිසි වෙනස දෙස බැලුවේද යම් සැකයෙනි. නමුත් පියුමාලි උත්සාහය අත්හැරියේ නැත.

දෙවනුව, ඇය කතා කරන ස්වරූපය වෙනස් කළාය. "උඹ නම් කවදාවත් හැදෙන්නේ නැහැ" කියනවා වෙනුවට, විභාග ලකුණු අඩු වූ දිනක ඇය සාලයේ මේසය මත කිරි වීදුරුවක් තබා, "මේ පාර ලකුණු අඩුයි, හැබැයි මම දන්නවා පුතාට ඊළඟ පාර මීට වඩා හොඳට කරන්න පුළුවන් කියලා" යැයි පවසා ඔහුගේ උරහිසට තට්ටු කළාය. ආකාශ් පුදුමයෙන් මව දෙස බැලුවේය. ඇගේ ඇස්වල තිබූ 'සැකකාර පරීක්ෂක' බැල්ම වෙනුවට පැරණි සෙනෙහස නැවත මතු වන බව ඔහුට දැනෙන්නට විය.

තෙවනුව, ඇය ඔහුගේ ලෝකයට එබී බැලීමට උත්සාහ කළාය. දිනක් සවස ආකාශ් පරිගණකයෙන් යම් වීඩියෝ නිර්මාණයක් කරමින් සිටියදී, පියුමාලි එතැනින් වාඩි වූවාය. 

"මොකක්ද පුතා ඒ කරන්නෙ? අම්මටත් කියලා දෙන්නකෝ" ඇය ඇසුවාය. 

ආකාශ් මුලින් මැලවුණත්, පසුව ඉතා උනන්දුවෙන් ඇයට තාක්ෂණය ගැන, නවතම AI මෙවලම් ගැන පැහැදිලි කළේය. එතෙක් කල් තම මව මේවා තේරුම් නොගනී යැයි සිතූ දේවල් ඇය උනන්දුවෙන් අසා සිටීම ඔහුගේ හිතේ තිබූ මහා බිත්තිය බිඳ දැමීමට සමත් විය.සති කිහිපයක් යද්දී නිවසේ තිබූ අඳුරු, පීඩාකාරී ස්වභාවය සහමුලින්ම තුරන් විය. අවවාද හෝ බණ කීම් නැතත්, අම්මා තමා පිටුපස ශක්තිමත් පවුරක් සේ සිටින බව ආකාශ්ට වැටහුණි. 

දිනක් රාත්‍රියේ මහා වැසි වැටෙමින් තිබුණි. පියුමාලි සාලයේ වාඩි වී පොතක් කියවමින් සිටියාය. කාමරයෙන් එළියට ආ ආකාශ් කුස්සියට ගොස් කෝපි කෝප්ප දෙකක් හැදුවේය. ඉන් එකක් පියුමාලි අසලින් තැබූ ඔහු, කිසිවක් නොකියා ඇය අසලින් වාඩි විය.ඔහු වචනයෙන් කිසිවක් කීවේ නැත. ඔහු කළේ තමන්ගේ ජංගම දුරකථනය පියුමාලි වෙත දිගු කිරීමයි. එහි තිබුණේ ඔහු චන්දන (තාත්තා) සමඟ කළ කෙටි පණිවිඩ සංවාදයකි.

“තාත්තේ, අම්මා දැන් මාව ගොඩක් තේරුම් ගන්නවා. මම මේ පාර එක්සෑම් එක උපරිම කරනවා. අම්මා මං ගැන දුක් වුණා ඇති.” ආකාශ් තාත්තාට ලියා තිබුණි.පියුමාලි ජංගම දුරකථනය දෙස බලා සිනාසුණාය. ඇගේ දෑසින් සතුටු කඳුළු කඩා හැළුණි. ආකාශ් දෙස බලද්දී, ඔහු කෝපි කෝප්පය තොලගාමින් සාලයේ ජනේලයෙන් පිටත වදින වැහි බිඳු දෙස බලමින් සිටියේය. වචනයක්වත් නොකීවද, ඒ නිහඬතාවය ඇතුළේ තිබුණේ පරම්පරා දෙක යා කළ මහා ආදරයකි.

ඇත්තටම මේ ජීවිත වේදිකාවේ කා අතේවත් එකහෙළා වැරැද්දක් තිබුණේ නැත. පියුමාලි වැරදි නැත; ඈ උත්සාහ කළේ තමන් දන්නා එකම ක්‍රමයෙන් දරුවා ආරක්ෂා කර ගැනීමටය. ආකාශ් වැරදි නැත; ඔහු මුහුණ දුන්නේ සොබාදහම විසින් උරුම කර දුන් වයසට අදාළ ජීව විද්‍යාත්මක වෙනස්කම්වලටය. චන්දනද වැරදි නැත; ඔහු උත්සාහ කළේ පාලමක භූමිකාව රඟ දක්වන්නටය.

ජීවිතයේ බොහෝ ගැටලුවලට වැරදිකරුවන් කවුදැයි ලියා තබන්නට ඉතිහාසයේ කිසිදු කතෘවරයෙකුට නොහැක්කේ එබැවිනි. හැමෝම තමන්ගේ පරම්පරාවේ, තමන්ගේ භූමිකාවේ හැටියට නිවැරදිය. අවශ්‍ය වන්නේ එකිනෙකා දෙස බලන කෝණය වෙනස් කරගත හැකි නම්‍යශීලී අවබෝධය පමණි.එබැවින්, මේ ජීවිත පිටුවේ සැබෑ වැරදිකරු කවුදැයි සොයන්නට වෙහෙස නොවන්න... එහි "කතෘ අඥාතයි."

- කල්‍යාණ මිත්‍ර

විල්පත්තුව වටා දෙදවසක්... A wild slog in to the Wilpattu wilderness (Part 1)

මන්නාරම් ලන්දේසි බලකොටුවේ සිට...

දෙදාස් විසිහතරේ දෙසැම්බර් වල දවස් හතළිස් ගාණක ඉස්කෝල නිවාඩුවක් එනවා කියුවම මුලින්ම කල්පනාවට ආවේ මේ පාර ළමයි එක්කරගෙන කොහෙද යන්නේ කියනෙක.. ළමයින්ට තේරෙන වයසේ ඉඳලා අවුරුද්දේ අන්තිම ඉස්කෝල නිවාඩුවට කොහෙ කොහේ හරි 'අලුත්' තැනක ඇවිදින්න යනේක අපි දැන් කාලයක් ඉඳලා කරගෙන එනවා. අලුත් තැන් කියුවට එහෙම තැන් නෑනේ ලංකාවේ. එකම දේ හැමෝම ට්‍රිප් කියලා යන තැන් වෙනුවට ලේසියෙන් කෙනෙක් යන්නේ නැති, යන්න අවස්ථාව නැති වගේ තැන්වල යනේක තමයි අපේ විනෝදාංශය ඉතිං. ඔහොම 2019 ඉඳලා මේ වෙද්දි අපි ජැෆ්න, ට්‍රින්කො, බැටිකලෝ සහ රට මැද ගොඩක් තැන්වල ඇවිද්දා. දකුණ සහ ඌව ඉතින් අපේ පදිංචි තැන් වෙච්චි එකත් මේ ගමන් වලට අනුබලයක්. 

කාලෙක ඉඳල මගේ හිතේ තිබ්බ දෙයක් තමයි රටේ වයඹදිග වෙරළට පොඩි උන්ව එක්කගෙන යනේක. විශේෂයෙන්ම තලෙයි මන්නාරමට. තලෙයි මන්නාරම ගැන මගේ මුල්ම මතකය තියෙන්නේ 1980 වගේ කාලේ. කොහොම හරි ඒ වෙද්දි මම ඉස්කෝලේ යන්න අරගෙනත් නෑ. අපේ ඩැඩා ජේශ්ඨ දුම්‍රිය නියාමකයෙක් උනාට ආතල් පොර නෙව, වැඩට යන හැමදාම 'අප් ඇන්ඩ් ඩවුන් බටා අරගෙන' (එහෙම තමයි ඉස්සර අම්මා කියන්නේ) ඒ සල්ලි වල බෝතලයක් ගසලා ආතල් එකේ ඉඳලා මාසේ අන්තිමේ පඩි ගන්න යද්දි ගන්න කියලා දෙයක් නැතිලු. ඒ කියලා ළමයි හය දෙනෙක් බඩගින්නේ තියන්නයැ. ඔය කාලේ වෙද්දී අපේ ලොකු අයියා ඉළංදාරියා. අම්මා ඒ කාලේ ලොකු අයියත් එක්ක කෝච්චියේ යනවා 'තලෙයිමන්නාරම්'. ඒ ගිහින් එහෙන් කරවල 'සිප්පං' (Shipment කියන එකෙන් කැඩිච්චි වචනයක්ද මංදා) අරගෙන කෝච්චියේ බදුල්ලට ගෙනල්ලා තොග කඩවලට සහ පොළේ විකුණන වෙළෙන්දන්ට තොග මිලට දෙනවා(ලු). ඔය කතාවෙන් මට මතක ඔය කියපු වචන ටිකයි ඒ කාලේ අපිට සෑහෙන්න අතමිට සරුවට තිබ්බා, හිතේ හැටියට කන්න බොන්න ලැබුණා කියන කාරණා ටික තමයි. එනිවේ 'තලෙයිමන්නාරම' අන්න එහෙම තමයි මගේ හිතේ ඇඳුනේ. 

තලෙයිමන්නාරම් තොට...

පස්සෙන් පහුකාලෙක නාඋක හමුදාවේ ධිවර අංසෙට බැඳුනාට පස්සේ මටත් හම්බුනා 'තලෙයිමන්නාරං' යන්න. ඒ හැබයි ගොඩබිමින් නෙවෙයි. මුහුදෙන්. ඔය හරියේ තියෙන ආදම්ගේ වැලිපර කේස් එක හින්දා මන්නාරම් දූපත ඉස්සරහින් ලංකාවේ නාඋක කටයුතු දෙකඩ වෙනවා. සිංහලෙන් කෙටියෙන් කියුවොත් නෝත් ඔෆ් මැනාර් සහ සවුත් ඔෆ් මැනාර් කියලා. නෝත් ඔෆ් මැනාර් බලන්නේ උතුරු නාවික විධානයෙන්. සවුත් ඔෆ් මැනාර් බලන්නේ බටහිර නාවික විධානයෙන් ඒ කාලේ- දැන් නම් වයඹට වෙනම නාවික විධාන මූලස්ථානයක් තියෙනව. අපි ඉතිං නෝත් හිටියත් සවුත් හිටියත් මුහුදේ නෙව. අපිට කෝකත් එකයි. ඒත් නෝත් ඉද්දි පොඩි වෙනසක් තියෙනවා. ඒ තමයි නෝත් ඔෆ් මැනාර් පැට්‍රොල් එක එන ඩෝරා පුරුද්දක් වශයෙන් තලෙයිමැනාර් ජැටියට එනවා. ඒ ඇවිත් අපි මාරුවෙන් මාරුවට තම්මැන්නා නාවුක කඳවුරට ගිහින් නාලා කරලා, අලුත් එළවලු පළතුරු ටිකක් එහෙම හොයාගෙන පොඩි රෙස්ට් එකක් අරං යනවා. ආන්නෙහෙම තමයි මම තලෙයිමැනාර් එන්න පුරුදු වෙලා තිබ්බේ. සවුත් ඔෆ් මැනාර් පැට්‍රොල් එක ආවට නිතර නිතර ශිෆ්ට් වෙන සෑන්ඩ් බෑන්ක්ස් නිසා ජැටිය පැත්තේ එන්න බෑ. ඩෝරා එකක් තියා වෝටර්ජෙට් එකක් උනත් ඒ හරිය ක්‍රොස් කරන්නේ එන්ජින් නතර කරලා රිටි දෙකක් දෙපැත්තෙන් ගහලා පාරුව වගේ. සවුත් ඔෆ් මැනාර් පැට්‍රෝල් එකේ ආතල් එක තියෙන්නේ කේ පොයින්ට් හෙවත් කුදිරමලේ තුඩුව කිට්ටුවෙන් මුහුදට දාන ඇල්ටීටී බෝට්ටු එක්ක සහ ඉන්දියාවේ ඉඳල එන හොර ජාවාරංකාර බෝට්ටු එක්ක හැප්පෙන එකේ තමයි. 

රායිට්.. ඉතිං ඔය නොස්ටැල්ජික් මතක සෙට් එකත් එක්ක මම කල්පනා කරා මෙදා සැරේ ට්‍රිප් එක යන්න වයබ දිග මුහුදු තීරයට. තව තව කමිට්මන්ට් ගොඩක් තිබ්බ නිසා ගමනේ මුල් දවස් දෙක ගාල්ලේ ඉඳලා බදුල්ල හරහා අනුරාධපුරයට යන්න වෙන් කරන්න උනා. තුන් වෙනි දවසේ තමයි මැනාර් ගමන දාගත්තේ. මුලින් හිතාගෙන හිටියේ වාහනේ ගිහින් ඔය ඒරියා එක පෙන්නගෙන එනවා වගේ විතරක් කියලා.. මොකද ගමන් කරන්න තියෙන දුර විතරක් කිලෝමීටර් තුන්සීයකට වැඩි වෙනව ආපහු අනුරාධපුරේටම එනවානම්. ඒත් ඉතින් හැමදාමත් යන්න ඇයි? යන එකේ පුලුවන් තරමක් ඇවිදලාම එනවා කියලා දන්න කියන ඈයොන්ට කතා කරලා විස්තර හොයන්න ගත්තා. මොල්ලිකුලම් භරණ නේවි කෑම්ප් එකේ මගේ බැචෙක් අවශ්‍ය උපදෙස් දුන්නා. උපදෙස් කියන්නේ.. 'මොල්ලිකුලම් වලින් මුහුදට වැටෙන මල්වතු ඔයේ කොටසක් වෙන මෝදරගං ආරුව දිගේ විල්පත්තු කැලේ මැද්දට බෝට්ටු සවාරියක් ලෑස්ති කරන්නම්.. අඩුම හවස හතර වෙනකොටවත් වරෙං ඉතිං' ඒ විදියට තමයි උපදෙස් දුන්නේ. 

අපි අනුරාධපුරයෙන් උදේම පිටත්වෙලා කෙළින්ම ගියේ මඩු. මඩු පල්ලිය බලලා ගියා මන්නාරමට. කෝස්වේ එක පහුකරලා මන්නාරම් දූපතට ඇතුලුවෙනකොට ඒක වෙනමම ලෝකයක් වගේ. මාර ලස්සනයි ඒ පරිසරය. ඒ මම මන්නාරම් දූපතට ගොඩබිමින් ගිය පළවෙනි වතාව. මන්නාරමට ඇතුලුවෙනකොටම වම් පැත්තට පොඩි පටු පාරක් දිගේ ගිහින් යන්න පුලුවන් මන්නාරම් ලන්දේසි බලකොටුවට. මන්නාරම් දූපතට ඇතුවෙන ගොඩබිම් මාර්ගයත් මුහුදත් ලස්සනට පේන විදියට හදලා තියෙන ලන්දේසි බලකොටුව හරිම ලස්සන තැනක්. මේ දවස්වල එතන පුරාවිද්‍යා දෙපාර්ථමේන්තුවෙන් ප්‍රතිසංස්කරණය කරනවා. පුරාවිද්‍යා නිළධාරීන්ගේ අවසරය ඇතුව අපි බලකොටුව ඇතුල ඔක්කොම නැරඹුවා. ඊළඟට මට ඕනි උනේ මන්නාරම් දූපතේ තියෙන බයෝබැබ් ගහ බලන්න යන්න. ඩෙල්ෆ්ට් දූපතේ බයෝබැබ් ගහ බලලා තිබ්බ අපි මන්නාරමේ දැවැන්ත බයෝබැබ් ගහත් නැරඹුවා. ඒ පාරේ දිගටම ගියාම හම්බ වෙන්නේ පල්ලිමුණේ ධීවර ගම්මානය. ඉස්සර මන්නාරමෙන් එල්ටීටීඊ බෝට්ටු මුහුදට දාන එක ප්‍රධාන ස්ථානයක් තමයි පල්ලිමුණේ. එතන නාවික අනුකණ්ඩයකුත් තියෙනවා. ඔය විස්තර ළමයින්ට කියලා දෙන ගමන් පල්ලිමුණේ ධීවර ගම්මානයත් බලාගෙන අපි තලේමන්නාරම් තොට පැත්තට පිටත් උනා. මන්නාරම් යනවානම් ලුණු ලේවායත් බලන්න පුලුවන්. ඒත් ඒ දවස්වල වැස්සත් එක්ක ලුණු නිශ්පාදනය නැවතිලා කියපු නිසා අපි ලේවායට ගියේ නෑ.

කෝස්වේ එකෙන් මන්නාරම් දූපතට ඇතුලු වන විට වම් පසින් පෙනෙන මන්නාරම් ධීවර ජැටිය

දකුණු පසින් පෙනෙන ලන්දේසි බලකොටුව

තලේමන්නාරම් යන අතරමඟ හම්බවෙනවා සුන්දර පේසාලේ වෙරළ තීරය. රශ්මි සංගීතාගේ 'මන්නාරම් කන්‍යාරාමය ඇරිලා' කියන සිංදුව අපේ ලමයි තියා අපිත් එක්ක ගිය වැඩිහිටි දෙතුන් දෙනාවත් අහලා තිබුණේ නෑ. ඒ සිංදුවේ කියවෙන 'පේසාලේ හංදියෙන්' අතුරු පාරකට දාලා මම වාහනේ ඉඳන්ම පේසාලේ වෙරළත් ළමයින්ට පෙන්නුවා. පේසාලේ ඉඳලා තලෙයිමන්නාරමට යද්දී දෙපැත්තෙම හමබ වෙන්නේ නොගැඹුරු විල්ලු තීරයක්. කුරුල්ලෝ නාඹන්න මන්නාරම් යන අයගේ නියත නැවතුම්පොළක්. පාර දිගටම හරක් සහ කොටළුවෝ.. කොටළුවා කියන්නේ කැලෑ අශ්වයෝ සහ බූරුවෝ ක්‍රොස් වෙලා හැදෙන සත්තු. ඩෙල්ෆ්ට් වල කැලෑ අශ්වයෝ, පුත්තලමේ බූරුවෝ වගේ තමයි මන්නාරමේ කොටළුවෝත්. කොටළුවන්ගෙන් සහ හරක්ගෙන් පරිස්සම් වෙවී අපි දිගටම ගියේ තලෙයිමන්නාරම් තොටට. යන ගමන් තම්මැන්නා නාවික කඳවුරේ අණදෙන නිළධාරී විදියට ඉන්න අපේ ජූනියර් බැච් එකේ යාලුවට කෝල් එකක් දුන්නා අපි එනවා කියලා. උගෙන් බැණුම් කෝටියයි. 'කියලා ආවේ නෑ' කියල. මොනවා උනත් අපිව සාදරයෙන් පිළිගත්ත මිත්‍රයා අපිට සංග්‍රහයකුත් කරලා අපිත් එක්කම ආවා ජැටිය සහ ලයිට් හවුස් එක බලන්න. ජැටිය නම් දැන් ආරක්ශිත කලාපයක් කරලා තියෙන්නේ දිරලා කඩා වැටෙමින් තියෙන නිසා. ආරක්ශාව ගැන හිතලා ජැටිය උඩට නොගියට අපි මන්නාරම් ප්‍රදීපාගාරය නම් ළඟටම ගිහින් බැලුවා. 

තම්මැන්නා නාවික කඳවුරේ වෙහෙස නිවා ගනිමින්...

අබලන් වූ ලංකාවේ වයඹදිග කෙළවර...

මන්නාරම් නව ප්‍රදීපාගාරය...

තලෙයිමන්නාරම් පැරණි ප්‍රදිපාගාරය (ගූගල් මැප් වෙතින් ලබාගත් පින්තූර දෙකක්)

තලෙයිමන්නාරමේ අනිත් විශේෂ තැන් තමයි ආදම් ගේ සහ ඒවගේ කියල සළකන සොහොන් කොත් දෙක, නාවික අනුකන්ඩයක් මැද තියෙන පරන ලයිට් හවුස් එක සහ Island view point එක. අඩි හතලිහක් විතර දිග අඩි දෙක තුනක් උසට තියෙන වැලි කඳු දෙකක් තමයි ආදම්ගේ සහ ඒවගේ සොහොන් දෙක විදියට සළකන්නේ.. එතන වට කරලා ආරක්ශාව සපයලා තියෙනවා. සමහරු එතනට බාර හාර වෙනවා. පරන ලයිට් හවුස් එක නම් මගේ නොස්ටැල්ජියාව නිසා බලන්න ගිය එකක්. යකඩ ස්ට්‍රක්චර් එකක තියෙන ඒ ප්‍රදීපාගාරය දැන් නාවික හමුදාවෙන් ආරක්ශා කරනවා. එතනින් තවත් එහාට ගියාම වෙරළ අයිනේ ඉඳලා තලෙයිමන්නාරමට ඔබ්බෙන් තියෙන පුංචි දූපත් ටික ලස්සනට බලන්න පුලුවන්. ඔය ටික බලාගෙන අපි හවස දෙක විතර වෙද්දි තලෙයිමන්නාරමෙන් පිටත් උනා මොල්ලිකුලම් යන්න. එන ගමනේ වෙලාව තියෙනවානම් බලන්න වටින තව දෙයක් තමයි නඩුකුඩා වෙරල තීරයේ  තියෙන තලෙයිමන්නාරම් සුළං විදුලි බලාගාරය. 

නඩුකුඩා වෙරල තීරය දිගේ දිවෙන මන්නාරම් සුළං විදුලි බලාගාරය

ආපසු එන ගමනේදී මන්නාරම් කෝස් වේ එකෙන් මේන් ලෑන්ඩ් එකට ඇවිත් අපි වන්කාලෙයි, අරිප්පු, සිලාවතුර හරහා මුල්ලිකුලම් දක්වා ආවා. මේ ඒරියා එක හරිම විශේෂයි. ලංකාව ඉන්දියන් සාගරයේ 'මුතු ඇටය' වෙන්න මූලික උන ලෝක ප්‍රසිද්ධ ලංකාවේ මුතු හැදෙන (හැදුන) කෝස්ටල් බෙල්ට් එක තමයි මේ. මීට අවුරුදු දෙසීයකට එහා අතීතයට ගියොත් ලංකාව කියන්නේ ලෝකයේ හොඳම සහ වටිනාම මුතු හම්බ උන තැනක්. විල්පත්තු කැලෑව මැද්දෙන් මන්නාරම් බොක්කට වැටෙන මල්වතුඔය නිසා ඇතිඋන සුවීශේෂී සමුද්‍ර දෙශගුණික තත්වයක් නිසා ඒ කාලේ මේ ඒරියා එකේ නොකඩවා මුතු බෙල්ලන් වර්ධනය වෙලා තියෙනවා. අවුරුදු දහස් ගානක් තිස්සේ ලංකාංඩුවට ප්‍රධාන ආදායම් මාර්ගයක් වෙච්චි මේ මුතු වෙළදාම මීට අවුරුදු දෙසීයකට විතර කලින් නැවතිලා තියෙන්නේ එම කලාපය තවදුරටත් 'වාණිජ වශයෙන් මුතු බෙල්ලන් කැඩීමට' තරම් මුතු නිශ්පාදනයක් නෑ කියලා තීරණය කරාට පස්සේ. අරිප්පු වල තියෙන ඩොරික් බංග්ලෝ එකේ නටඹුන් පෙන්නලා මේ විස්තර ලමයින්ට කියලා දෙන ගමන් අපි දිගටම මුල්ලිකුලම් වෙනකං ආවා. හවස තුන හමාර විතර වෙද්දි අපි අති සුන්දර මුල්ලිකුලම් හි භරණ නාවික කඳවුරේ... මගේ බැචාගේ ආදර සත්කාර මැද. 

මුතුවන් ඉතිහාසයක් සඟවාගත් අරිප්පු හි ඩොරික් බංග්ලෝ එක... (ආපසු එන ගමනේදී ගත් සේයාරුවක්)

කලින් ලිඛිත අවසරය අරගෙන තිබ්බ විදියටම අපි එතැන් සිට පැය දෙකකට ආසන්න කාලයක් පුරා කුඩා බෝට්ටු දෙකකින් රමණීය මෝදරගං ආරුව දිගේ විල්පත්තු වනය මැදට ගමන් කලා.. ඒකනම් වචනයෙන් විස්තර කරන්න බැරි තරම් ලස්සන අත්දැකීමක්. දැවැන්ත කිඹුලන් ගහන වැලිතලා මැද්දෙන් නොයිඳුල් ගණ වනය මැදට ගං දිය දිගේ අපි ඇදුනේ ඇස් අදහාගත නොහැකි තරම් සුන්දරත්වයක් දෑසින් විඳිමින්. සමහර තැන්වලදී අපි ගමන් කල බෝට්ටුව තවදුරටත් ඉදිරියට යන්න බැරුව වැලි පරයක් උඩ නවතිද්දි ඒ අවට අව්ව තපිමින් ඉන්න දැවැන්ත හැල කිඹුලන් උන්ගේ සාමාකාමී නින්ද බිඳපු අපිට රවාගෙන ඔරවාගෙන අපි අසලින්ම ගංදියට බැහැලා නොපෙනී යන්නේ ඇඟේ ලොමු දැහැගන්වමින්. අවට ගස්වල අපි එතෙක් දැක ඇති නැති දැවන්ත මෙන්ම ඉතා අලංකාර පක්ශීන් අපි දිහා බලලා අලස ලෙස වෙනත් අත්තකට පියබා යන්නේ මේ පරිසරයට අපි බොහොමත්ම ආගන්තුකයින් බවත් ඔවුන්ගේ කටයුතු වලට අපි බාධා කිරිම්ම නොහොඹිනා බවත් අපිට පසක් කරමින්.. 

භරණ නාවික කඳවුරේ නිළධාරී නිවාසය මෝය අසළට දිස්වන ආකාරය

මහ ඝන වන මැද පිහිටි සුන්දර භරණ නාවික කඳවුර

සෙකන්ඩ් වෙන්න අපිත් සූදානම් නොවුනත් කාලය හරස්වීමත් වැලිපර බාධක එන්න එන්න අධික වීමත් හේතුවෙන් කිලෝමීටර් හතරක් පහක් පමණ ඒ වෙද්දිත් ආරුව දිගේ කැලෑ වැදිලා මත් වෙලා හිටි අපි බෝට්ටු දෙක හරවාගෙන ආපහු එද්දි මෝය කට මැදින් හැන්දෑ ඉර බටහිර ක්ශිතිජය සිපගනිමින් අපිට ගෙනත් පෑවේ කිසිදා අමතක කළ නොහැකි චමත්කාර දසුනක්.. 

බැචාලා... 

මේ වගේ චාරිකා සටහන් මම ලියලාම නැද්ද කොහෙද බ්ලොග් එකේ. ඉතින් ලියන්න ඕනි මොනවද නැත්තේ මොනවද අදහසක් නෑ. කොහොම උනත් හිතෙන ඒවා ඔක්කොම ලියාගෙන යද්දි සටහන දික් වුන නිසා ඔය පින්තූර කීපයත් එක්ක කතාව අදට නතර කරන්නම්. විල්පත්තු දකුණු සීමාවෙන් එළුවන්කුලම ගඟේවාඩිය හරහා කලාඔය දිගේ කල දෙවෙනි දින මෙහෙයුම තව කොටසකින් බලාපොරොත්තු වෙන්න. නොමැකෙන මතක ගොන්නක් එක්ක මේ අමිල අත්දැකිම සපයාදුන් නාවික හමුදාවේ විශේෂ යාත්‍රා බලගණයේ මගේ බැචා ඇතුළු නාවික කණ්ඩායමට මගේ ආචාරය!

ක.මි. 

අතරමඟ බැස්ස තැන් ජීවිතේ එමට.. 'සොඳුරු සඳවති'යගේ රංකඳ රාවණා සමඟ හෝරා දෙක තුනක් තනිවීමී. Emotions that found its words!

දෙදාස් පහළොවේ දාසයේ වගේ බ්ලොග් වල පැළපදියම් වෙලා හිටි කාලේ දවසක මාතලන්ගේ සින්ඩියෙන් වෙන්නෝනි අහම්බෙන් දැකලා ගිහින් බලපු බ්ලොග් පෝස්ට් එකක අපූරු කවි පන්තියක් තිබ්බා. ඒ කවිය නම් කරලා තිබ්බේ 'එතකොට උඹ පත්තිනි, මම?' වගේ අමුතු නමකින්. මම කොහොමත් කවි වලට, විශේෂයෙන් සඳැස් කවි වලට ආසා නිසාත් ඒ අමුතු හෙඩිම නිසාත් ඒක කියවන්න ගත්තා... පලවෙනි කවියම Wow එකක්...

මව් ඇවෑමෙන් උනත් මං මේ රටේ නැටුමට රාජිණී
කෝවලන් නුඹ ළඟයි නිවුනේ හිතේ නැගි අනුරාගිනී
ලෝකයම අමතකව නුඹ මට තුරුලු වූ හැටි ස්නේහෙනී
දන්නෙ නෑ ඇය හිතේ හිටි බව අවුලමින් විරහාගිනී... 

අද මේ සටහන ලියන්න ඕනිවෙලා බ්ලොග් එකට ගිහිල්ලා බලද්දි මේ තියෙන්නේ කවි පන්තියම බැබළි බැබළී.. බ්ලොග් වල වටිනාකම ඒකයි ඉතින්. හරි ඒක පසුවට. ඔන්න ඔතනින් තමයි මට බොක්කට වැදුණේ 'සොඳුරු සඳවතී' බ්ලොග් එක. ලියුවේ 'ශානි ශෂී' කියලා ගෑනු ළමයෙක් කියලා හිතපු කෙනෙක්. එදා ඉඳලා ෆ්‍රී වෙලාවට ඒ බ්ලොග් එකේ අලුතෙන් දාන කවි වගේම කලින් උන්දෑ 2010 වගේ ඉඳලා ලියපු ඒවත් ටික ටික කියවලා පුලුවන් වෙලාවට කවි පිළිතුරක් එහෙමත් දීලා තියෙනවා. පස්සේ පස්සේ ඉතින් බ්ලොග් ලියවිල්ලයි, කියවිල්ලයි දෙකම අතෑරලා ෆේස් බුක් එකේ ස්ථීර පදිංචියට ආවට පස්සේ ඔන්න අඳුන ගත්තා මේ කොළමාලම.. එක එක නම් වලින් හැංගි මුත්තන් කර කර ඉඳලා දැන් නම් යංතං මනුස්ස වේශයෙන් ඇත්ත නමින් පෙනී ඉන්නවා. 

මොන විහිළු කරත් මේ උන්දිගේ හලන්න බැරි ලොකුම හැකියාවන් දෙක තමයි කෑම ඉවිල්ලයි කවි ලියවිල්ලයි. ඔය දෙකෙන් මොන එක වැඩියෙන්ම රසද කියලා බලන්න තාම Lotus එකට කෑම ඕඩරයක් දෙන්න බැරි උනාට කවි නම් අම්මප.. හැබෑ රහයි. ඔය ඉවිලි පෙවිලි අස්සේ මේ අංගනාවී එයැයිගේ දෙවෙනි කවි පොතත් ලියලා කියුවම මාත් ඉතිං පොතක් ඉල්ලුවා. කවි පොත ලියන්න උන් මහන්සියට වඩා මහන්සිවෙලා දසමාර යුද්ධයක් කරලා සති හයකට විතර පස්සේ අත්සනත් ගහපු පොතක් පිළියන්දල ඉඳලා කොල්ලුපිටියට වඩම්මවා ගන්න අද පුලුවන් උනා. සති හයක් දුක් විඳලා ගෙන්න ගත්ත පොත කොල්ලුපිටියේ ඩර්ඩන්ස් එක ළඟ ඉඳලා කොම්පඤ්ඤවීදියට එනකොට බාගයක් කියවලා ඉවරයි. ඉතුරු ටිකත් ආ ගමන් කියවලා මේක ලියන්න ගත්තේ. 

Poetry is when an emotion has found its thought and the thought has found words

කවි පොත නම්... මාරයි. සඳැස් නිසඳැස් කවි පන්ති හතළිස් දෙක එක හුස්මට කියවගෙන යතෑකි. සමහර කවි නිකං උලකින් එකපාර අනිනවා වගේ පපුවට.. සමහර ඒවා.. අර සංජීව් ලෝන්ලියෙස් කියනවා වගේ හදවතේ සියුම්ම තැන්වල පිහිතුඩකින් ආදරේ ලියනවා වගේ.. ඒ ඔක්කොටම හපන් ඒ කවි වලට දාලා තියෙන නම්. අමුතු මුතු වගේ.. 

'මට යසෝදරා වෙන්නට නම් බෑ' කවිය එහෙම පිටින්ම හැවිල්ලක්.. ළමයෙක් බඩට ආවම දාලා ගිය මිනිහෙක් ගැන මොන නිබ්බුත පදද? ඒ කවි පන්තියම මෙතන දාන්න තියෙනවා නම් මරු. ඒත් ඒක කරන එක හරි නෑනේ. 

'පාලු පැලේ මට තනි නෑ තනි අලියා එනවා.. 

ගේන පලා අතින් තියා තොලකට ලෙවකනවා..

ඊට පස්සෙ මම ආයෙත් හොඳ අම්මා වෙනවා..'  හුම්ම්...

'ඔයාට නම් දැන් සැප ඇති භව බෝගෙන් පිරී..

තනියෙම බුදු වෙන්න ඔයා දැන් සේරම හරී..".. හෙහ්. අවසානය තමයි තාත්විකම..

'පය පැටලී නුඹට නිවන මඟහැරෙන්න පතමී' 

'ගල්කිස්ස කියන්නෙත් එක්තරා ප්‍රේමයක්' කවි පන්තියේ එක තැනක ශානිකා මෙහෙම ලියනව.. 

'මතක මල්ලත් අරන් අදත් ඉඳ හිටක..

හංදියෙන් නගිනව දෙසිය පනස් පහක..

ටිකට් එක කැඩුවාට ගල්කිස්සේ කොණට..

අතරමඟ බැස්ස තැන් ජීවිතේ එමට..' ඒක අතරමඟ කඩාවැටුණු අසම්පූර්න ප්‍රේමයක් ගැන අනුවේදනීය උපහැරණයක්...  

සෝශල් මීඩියා පරිස්සමට පාවිච්චි කරන්න තේරෙන්නේ නැතුව තරු හීන දැකලා කපටියෙකුට රැවටිලා 'ලීක් කරගෙන' පවුලත් විනාස කරලා තමනුත් විනාස වෙන තරුණියකගේ අවසානය.... මුලු කවි පන්තියක කඳුලු කතාව එකමෙක පේළියකට කැටි කරන්න ශානිකා සමත් වෙන්නේ අර කියුවා වගේ පපුවටම ඇනලා...

'ඇයමයි මල් වැවුවේ ඇයගෙම මල් වඩමේ'

රාමාගේ සීතල ආදරයට එහාගිය රාවනාගේ දඩබ්බර, උණුහුම් ආදරේ ගැන මේ සීතාවගේ හිතේ විශේෂ කැමැත්තක් ඇති බව නම් හැබැයි.. පොතේ නම වැටුණු කවි පන්තිය වගේම තව කවි පන්ති කීපයක්ම රාවණා හා සීතාගේ මේ ආදරේ ගැන ලියවිලා තියෙනවා. ඒක අසම්මත ප්‍රේමයක්ද අනියම් ප්‍රේමයක්ද කියල හිතන්න ශානිකා අපිට ඉඩ ඇරලා නෑ. මොකද එක කවියක ඈ ලියනවා.. 

'ප්‍රේමය ප්‍රේමයම මිස..

එහි නෑ නියම් අනියම්'

ශානිකා ගේ කවි වල මම දැකපු තවත් එක විශේෂත්වයක් තමයි ප්‍රේමයේදී වගේම විරහාවේදීත් ඇය නුරාව සඟවන්න උත්සහා නොකිරීම. ලඟින් ඉද්දි වගේම දුරස් උනා කියලත් අනුරාගි හැඟීම් පහල වෙන එක වළක්වන්න බෑනේ.. ඇත්තම කතාව දුරස් උනාම දැනෙන නුරා හැඟීම් වඩා කටුකයි.. වේදනාකාරියි.. ශානිකා හරිම ලස්සනට සංවරව ව්‍යංගයෙන් මේ හැඟීම් අපිත් එක්ක කවියෙන් බෙදා ගන්නවා මේ පොත ඇතුළේ. 

මේ සටහන ඉවර කරන්න ඕනිනේ.. ඒකට 'ආරතී ඇයට ඉඩ දෙන්න ඒ ඇගේ පංගුව' කියන කවියේ මේ කොටසට වඩා හොඳ තැනක් මට හිතාගන්න බෑ.. අසම්මත යැයි සම්මත තුන්කොණ් ප්‍රේමයක අනුවේදනීය මළගම.. අවසන් හාදුවත් නළල මත නොතියාම නික්මෙන.. අවසරයි. ඔබ කවියට ආදරේ නම් කියවිය යුතුම කවියක්.. රංකඳ රාවණා!

'දැන් ඉතින් වැඩක් නෑ නිදහසට කරුණූ...

අසම්මත කියන්නෙම චෝදනාවක් දරුණූ...

ආරති, මායි මගෙ හිතයි දැන් සදහටම මැරුණූ...

ජීවිතේ බොහෝ තැන් ඇති ඇයට නම්.. මා නිසා මඟ හැරුණූ...'

-කල්‍යාණ මිත්‍ර

  

Check Point..! 9 වෙනි දිගහැරුම

8 වෙනි දිග හැරුමට..

ගත වෙලා ගත් සීතළ සුළන් දහරට ඉහළින් පාවී ආ ඉමිහිරි කුරුළු නාදයකින් මහේෂ්ගේ නින්ද බිඳුණේය.. පොරවාගෙන සිටි සරමට තවත් මදක් ගුළිවී ඔහු එහි මිහිර විඳ ගැනීමට තැත් කළද ඒ හා සමඟම යම් කිසි බියකරු සිතුවිල්ලකින් ඔහුගේ ගත හී ගඩු පිපී ගියෙන් ඔහු එකවරම අවදිව එතෙක් වේලා නිදා උන් ලී මැස්සේ උක්කුටියෙන් ඉඳ ගත්තේය.. පෙරදා උදෑසන සිට මේ දක්වා වූ කිසිසේත් බලාපොරොත්තු නොවූ ආකාරයේ සිදුවීම් මාලාව චිත්‍රපටයක් සේ ඔහුගේ මනසේ ඇඳෙන්නට විය. ඔහු මුලින්ම කලේ නමක් ගමක් නොදන්නා තම ගමන් සගයා කොහේදෝ යන්න සොයා බැලීමයි. තමා පයලා උන් පැත්තේ වූ තවත් ලී මැස්සක ඔහු වකුටු වී ඉඳගෙන සිටියි. ඔහුගේ පෙනුමෙන්ම ඔහු ඊයේ රාත්‍රිය පුරාවටද හරිහැටි නින්දක් ලබා නොමැති බව එක බැල්මෙන්ම මහේෂ් වටහා ගත්තේය. තමාටත් වඩා වැඩිමහලු මේ පුද්ගලයාගේ බියපත් මුහුණ දුටුවිට මහේෂ්ට ඔහු ගැන මෙන්ම තමා ගැනද අනුකම්පාවක් ඇතිවිය.

තමාගේ හිසට පිටුපසින් උගුරේ රැල්බුරුල් හරින වැඩිහිටියෙකුගේ හඬින් මහේෂ් ආපිට හැරී බැලුවේය. ඊයේ සවස් කාලයේ සිට මහේෂ් හා ඔහුගේ සගයාගේ නියමුවා ඔහු පිටුපසින් සිටගෙන සිටියේය. වඩා තරුණ ඔහුගෙ සහයකයා අත රැඳි තුවක්කුවද සමඟ විමසිල්ලෙන් වටපිට බලමින් ඔහු අසලින්ම විය. 

"යේ.. මල්ලි.. අපි දෙන් යෙන්න ඕනි.." දෙමළ ඌරුවට උවත් පැහැදිලි සිංහලෙන් ඔහු මහේෂ් අමතා කියා සිටියේය. ඒ සමඟම මහේෂ් හා නාඳුනන සගයා සිය සන්තකයේ වූ එකම වස්තුව වූ කුඩා ගමන් මළු දෙකද රැගෙන නැගී සිටියහ. නැවත මිනිස් වාසයලට පා තබන තුරු මොවුන්ගේ අණට කීකරුව සිටීම හැර වෙනත් විකල්පයක් මහේෂ්ලාට නොවේ. එහෙත් ඔවුහු මෙතෙක් වෙලා මහේෂ්ලාට කිසියම් ගෞරවපූර්වක බවකින් සැළකුවා විනා වෙනත් බලපෑමක් කරේ නැත. ඊයේ බවුසර් රථ දෙක චුන්දකාඩු කැලය මැදින් වූ මාර්ගයේ ටික දුරක් දාවනය කරද්දි අතරමඟ දැමූ කැලෑ කොළ අතු බාධකය අසල නතර කල මොහොතේ පටන් බවුසර් දෙකේ මෙන්ම මහේෂ්ලාගේ ජීවිතවල වගකීමද ඔවුන් අතට ගන්නා ලදී. නතර කල බවුසර් දෙකට ගොඩවූ සන්නද්ධ සාමාජිකයෝ ඒ අසළින්ම කැලෑව තුලට වූ මාර්ගයේ වාහන දෙක ධාවනය කිරීමට අතින් සංඥා දුන්හ. නිසි මාර්ගයක් නොවුනත් ඝන කැලෑව තුල ඔවුන් පෙන්වූ මාර්ගයේ මීටර් දෙතුන් සියයක් ඇතුළට අපහසුවකින් තොරව දැවැන්ත බවුසර් දෙකම ධාවනය කල හැකි විය. අනතුරුව හොඳින් ඉඩ කඩ තිබූ නමුත් ගස් සෙවනින අඳුරු වූ ප්‍රදේශයක වාහන නවත්වා ඉන් බැස ඔවුන්ගේ එකෙකු අනුගමනය කරමින් එන ලෙස රියදුරන් දෙදෙනාට ඉඟි කරනු ලැබීය. 

වාහනයෙන් බැස යාමට මත්තෙන් මහේෂ් තමන්ට අයත් ඇඳුම් බෑගය ගෙන එය පිටේ රුවා ගත්තේය. ඒ වනවිටත් එම ස්ථානය ඇවිස්සුණ කඩි ගුලක ස්වරූපය ගෙන තිබුණි. විව්ධ ප්‍රමාණයේ යකඩ ටැංකි ට්‍රේලරයේ සවිකරගත් ට්‍රැක්ටර් පහක් හෝ හයක් එහි වූ අතර තුන් දෙනෙකු පමණ ලහි ලහියේ බවුසරවල පොම්ප ක්‍රියාත්මක කරමින් එහි වූ ඉන්ධන එම ට්‍රැක්ටර් ටැංකි වලට නැවත පුවරන්නට කටයුතු කළහ. තවත් පිරිසක් අවි ඇතැතිව වට ආරක්ශාවක් සැපයූහ. සියල්ළෝම තමන්ට අයිති රාජාකාටිය හොඳින් දැන සිටි බවක් පෙණුනු අතර කෑ ගැස්සිමට හෝ අණ දීමට අවශ්‍යතාවයක් එහි නොවීය. මහේෂ්ට හා ඔහුගේ සගයාට පිටුපසින් එන ලෙස සන් කළ අයෙක් ආරක්ෂාව වෙනුවෙන් සිටි තුවක්කුකරුවන්ගේ වටයෙන් ඔබ්බට ඔවුන් රැගෙන ගොස් බවුසර් පෙනෙන නොපෙනන මානයේ වූ අඳුරු හෙවනක කොටයක් මත වාඩිවී සිටි පුද්ගලයෙක් වෙත ඔවුන් පමුණුවාලූයේය.

නොඋස්-නොමිටි මධ්‍යම ප්‍රමාණයේ හොඳින් වැඩුණු කාලවර්ණ දේහදාරියෙක් වූ ඔහු යුද හමුදා ඇඳුම වැනි වූ සම්පූර්ණ කැළෑ ඇඳුමකින් සැරසී සිටි අතර ඉණේ පිස්තෝලයක් හා පතුරම් වැල් දෙපටක් දරා සිටියේය. ඔහු ආසන්නයේම වාගේ තවත් හැඩි දැඩි පුද්ගලයින් දෙදෙනෙකු ස්වයංක්‍රීය ගිනි අවි දරමින් දෙපස විමසිල්ලෙන් බලමින් සිටි නමුත් මහේෂ්ලා දෙස නිකමටවත් හැරී නොබැලූහ. නායකයා යැයි සිතිය හැකි පුද්ගලයා මහේෂ්ලා ඉදිරියට පැමිණ ඔවුන්ගේ අත් අල්ලා උරහිසට තට්ටුවක් දමා දෙමළ බසින් ඔවුන්ව කැටුව ආ පුද්ගලයාට යමක් පැවසීය.

"අපේ රමේෂ් මාස්ටර් කියනවා යේක ඔයාලා හොඳට වැඩේ කරා තැන්කියු කියලා. මෙතනින් එයාට ඔයාලගෙ වැඩේ ෆිනිශ්. අපි ඔයාලව සේෆ්ලි කැලෙන් එළියට ගිහිල්ල දානව.. යේකට දවස් දෙක ඕ තුනක් තමයි යනවා. ඒ ටිකේ අපි කියන එක අහලා ඉන්න බයවෙන්න එපා කියලා.." ඊයේ පිටත්වූ මොහොතේ පටන් හිතේ වූ වික්ෂිප්ත බවක් පහව ගියාවූ වන් හැඟීමකින් මහේෂ් ස්තූතිපූර්වක සිනාහවකින් ප්‍රථම වරට නන්නාදුනන මේ පුද්ගලයින් දෙස බැලූ අතර ඔහුගේ සගයාගේද බලාපොරොත්තු සහගතවූත් එහෙත් බියපත්වූත් දෑස හා ද මොහොතකට එකිනෙක ගැටුණේය. 

රමේෂ් මාස්ටර්ගේ විධානයෙන් සිංහල කතාකල වැඩිහිටි පිරිමියා සහ තවත් තරුණ සටන්කරුවෙකු සමඟ මහෙෂ් ලා එවලේම එම ස්ථානයෙන් පිටත් කර හරිනු ලැබීය. පිටත් වීමට ප්‍රථම ඔවුන් දෙදෙනාගේ මලු වලට චීස්, චොකලට් වර්ගයක් හා තවත් ටොෆී වැනි යමක් අඩංගු පාර්සලය බැගින් දමන ලදී. මගදී දැන ගත් තොරතුරු වලට අනුව එම චොකලට් වර්ගය එක වරක් කෑමෙන් සම්පූර්ණ දිනක ආහාර අවශ්‍යතාවය පිරිමසා ගත හැකි ශක්තිජනක ආහාරයකි. එමෙන්ම වැඩිහිටි ආරක්ශකයා වන සං‍රක්ශන දෙපාර්ථමේන්තුවේ කැලෑ ආරක්ශකයෙකු ලෙස කාලයක් සේවය කල අයෙකු බවත් නැගෙනහිර ප්‍රදේශයේ කැලෑ ගැන හසළ දැනුමක් ඔහු සතු බවත් මහේෂ් තේරුම් ගත්තේය. ඒ වැඩිහිටි පුද්ගලයා මුලින්ද, මහේෂ් හා ඔහුගේ අනෙක් රියදුරු සගයා ඊළඟට පිළිවෙළින්ද තුවක්කුව ගත් සටන්කරුවා අවාසානයටද ලෙස ඝණ කැලෑව මැදින් වූ පටු අඩි පාරවල් හා සතුන් ගමන් කළ මං ඔස්සේ ඔවුන් පැයක පමණ වේලාවක් ගමන් කිරීමෙන් අනතුරුව යම්කිසි එළිමහන් පෙදෙසකට පැමිණියහ. 

තවත් මීටර සියයක් හමාරක් පමණ ලඳු කැලෑ පෙදෙසකින් එතෙර වූ ඔවුහු එක්වරම මෙන් ඉතා රමණීය ජලාශ්‍රිත එළිමහනකට සේන්දු වූහ. තැනින් තැන දූපත් මෙන් පෙණුනු කැලෑවෙන් වැසුණු ගොඩබිම් කොටස් අතර එකහෙලා පැතිරගිය නිදහස් ජල තලය මත තැනින් තැන මුවන්, ගෝණුන්, වල් ඌරන්, කුළු මීමුන් මෙන්ම ඈත ඉසව්වක අලි රංචුවක්ද නොයෙක් වර්ගවල කුරුල්ලන් දහස් ගණනක්ද නිදහසේ දිය කෙළිමින් උන්හ. සංවිධානයේ දෙදෙනා විසින් 'විල්ලු' ලෙස හැඳින්වූ මෙම බූමියේ පිරිසිදු දියකඩකින් මුහුණ අතපය දොවාගත් පිරිස ඒ අසල සෙවනක මදක් වේලා ගිමන් හැරියෝය.. අහස සහ බැස යන හිරු දෙස විමසිලිමත්ව බැලූ කන්ඩායම් නායකයා යළිත් ගමනට ඉස්සර වූයෙන් පිරිස ආ පිළිවෙලින් ඔහු පස්සේ වැටුණෝය. විල්ලුව අසළ තණබිම් අයිනෙන් හා සමහර විටෙක ඉණ තෙක් වතුරේ බසිමින්ද එළිමහන් බිම්කඩ පසුකල ඔවුහු තවත් පැයක හමාරක ගමනකින් පසු ඊයේ රාත්‍රීයේ රැය පහන් කල මෙම කැලෑ මඩුවට පැමිණියහ. 

"යේ.. මල්ලි.. අපි දෙන් යෙන්න ඕනි.." දෙමළ ඌරුවට උවත් පැහැදිලි සිංහලෙන් ඔහු මහේෂ් අමතා කියා සිටියේය. ඒ සමඟම මහේෂ් හා නාඳුනන සගයා සිය සන්තකයේ වූ එකම වස්තුව වූ කුඩා ගමන් මළු දෙකද රැගෙන නැගී සිටියහ. "ඊයෙ රෑ ඔයාලට ශෑහෙන මහංශි කියල නිසා මෙතන හිටියේ.. මෙතන එහා පැත්තේ මාවැලි ගඟ.. අපේ බෝට්ටුව තමයි තියෙනව.. යේකෙන් අපි යනවා ශෝමාවතී පංසල.. දන්නවද.. ඒ කිට්ටුවට.. එතන තැනකදි ගඟ දෙකට තමයි බෙදෙනව.. එතන ඉන්දල පයින් තමා.. රෑට තමයි ගමන ලේශි. එතකොට ලොකු කැලේ යන්නෝනි නෑ. දවාලේ ගියොත් ලොකුම කැලේ මැදින් තමයි යන්න වෙනව.. බලමු ගීන් ලේශිම විදිය.."

**************************************************

සඳුදා උදය වරුවේ එකොළහට පමණ වත්තල හේකිත්ත පාරේ MS Direct Distributors ගබඩා සංකීර්ණය වෙත පැමිණි කොළඹ මූල්‍ය අපරාධ විමර්ශණ අංශයේ නිළධාරීන් දෙදෙනෙකු විසින් චෙක්පත් වංචාවක් සම්බන්ධයෙන් අලුතින් ලැබුණු පැමිණිල්ලකට අනුව එහි කලමණාකාර සෙනෙවිරත්න මහතාව ප්‍රශ්ණ කිරීමෙන් අනතුරුව වැඩිදුර විමර්ශනය සඳහා අත්අඩංගුවට ගත යුතු බව දන්වා සිටියහ. ආයතනය තුලදී සිදුකරනු ලබන අත් අඩංගුවට ගැනීමක් නිසා හා එය ආයතනයට සම්බන්ධ චෝදනාවක් නොවන නිසා තමන්ගේ නීතිඳ මහතාගේ සහය ලබාගතයුතු බවට ෂෙලීන් මහත්මිය විසින් යෝජනා කිරීම නිසා ඔවුහු නීතිඥ මහතා පැමිණෙන තුරු මදක් රැඳි සිටියහ. ෂෙලීන් මහත්මියගේ කැඳවීමෙන් නොබෝ වේලාවකින්ම එහි පැමිණි නීතිඳ මහතා හා සාකච්ඡාවෙන් අනතුරුව ඔවුහු සෙනෙවිරත්නවද කැටුව පිටත්ව ගියහ. අත් අඩංගුවට පත්වී පිරත්ව යාමට මත්තෙන් සෙනෙවිරත්නට මෙවන් සේනානායකගෙන් දුරකථන ඇමතුමක් ලැබිණි.

"උඹ වරෙන්.. අපිට තව බේරගන්න ගණුදෙනුවක් තියෙනවා"

එදිනම සවස් වරුවේ හදිසියේම රෝහිත පෙරේරා නියෝජ්‍ය අමාත්‍යවරයා MS Direct Distributors ආයතනය වෙත පැමිණියේය. පරිවාර රථ දෙකකින් පැමිණි ආරක්ශක නිළධාරීන් ගබඩා සංකීර්ණය තුලත් ඉන් පිටතත් ලහි ලහියේ ස්ථානගත වෙද්දී රෝහිත පෙරේරා කෙළින්ම ෂෙලීන්ගෙ කාමරයට ඇතුළු වී ඇය ඉදිරියේ අසුන් ගත්තේය. ෂෙලීන්ගේ එක බැල්මකින්ම ඇගේ සේවිකාවන් දෙදෙනා කාමරයෙන් පිටතට ගිය පසු රෝහිත පෙරේරා ඇයව ආමණ්ත්‍රණය කළේය. 

"ෂෙලීන්, මම කෙළින්ම කියන්නම්.. මේ මෙවන්ගේ වැඩ නිසා මට ඇමතිකමත් ගහලා ගිහින් හිරේ විලංගුවේ වැටෙන්න වෙලා තියෙන්නේ.."

"ඇමතිතුමා මේ......"

"ඇති. මට එක්ස්ප්ලනේශන් ඕනි නෑ. ෂෙලීන් දන්නවනේ මම පොලිටික්ස් කරන්නේවත් බිස්නස් කරන්නේවත් අමුතුවෙන් ඉගෙන ගන්න නෙවෙයි කියලා.. මෙවන් ට මම බිස්නස් එකේ සබ් එකක් බාර දුන්නේ ලොකු විශ්වාසෙකින්.. තාත්තා මොනම විදියකින්වත් කැමති වුනේ නෑ මෙවන් මේවට ගාව ගන්නවට.. ඒත් මම.."

"අපි දන්නවා ඇමති තුමා..."

"දන්නවනම් මොන මඟුලක්ද ගෑණියේ මේ යකා මේ කරන්නේ? මූ හදන්නේ ඌත් ගස් ගිහින් මාවත් ගස් යවන්නද?" ෂෙලීන් බලාපොරොත්තු නොවූ අයුරින් රෝහිත පෙරේරා එකවර ගුගුරා හැලෙන්නට වූයෙන් ඈ බොහෝ සෙයින් තැතිගත්තාය.

"රයිට්.. කතාව මෙච්චරයි.. තමුන්ට තවදුරටත් සැම්සන් පෙරේරා බ්‍රෑන්ඩ් නේම් එක යටතේ බිස්නස් කරන්න ඕනි නම් ෂෙලීන් මීට පස්සේ මෙවන් කියන දේ නෙවෙයි. මම කියන දේයි කරන්න ඕනි. කොහොමත් මෙවන් ට තියෙන කේස් එක්ක තව අවුරුද්දකටවත් ඇප ගන්න බෑ. ඇප දීලා එළියට ගන්නත් බෑ මිනිහගේ ආරක්ශාව සලස්සන්න බැරි නිසා ඊට පස්සේ. ඉක්මණට බලලා මෙතනට අලුත් මැනේජර් කෙනෙක් ගන්නව. කොළ කෑලි වල සුදුසුකම් තියෙන පුටු රත් කරන උන් වැඩක් නෑ. කියුවහම වැඩක් හරියට කරන්න පුලුවන් විශ්වාසවන්ත මිනිහෙක් හොයා ගන්නව. ඒ ඇති. ඊට පස්සේ මම කියන්නම් වැඩ වෙන්නෝනි විදිය."

"ඔව්. දැන් කවුරුහරි ගන්න වෙනවා අද සෙනෙවි වත්..." ෂෙලීන්ට සිය වාක්‍යය අවසන් කිරීමට නොලැබිණි. 

"ආයේ සෙනෙවියෙක්ගෙන් වැඩක් නෑ.. ඌ ආයේ මේකේ පස් පාගන්න එන්නේ නෑ. ඇයි තමුසෙටත් ඕනි ඌට කියලා..." රෝහිත පෙරේරා කියූ අසික්කිත කතාවෙන් ෂෙලීන් ලැජ්ජාවෙන් හිරි වැටී ගියාය. එහෙත් රෝහිත පෙරේරා යනු කවුදැයි හොඳින්ම දන්නා නිසා ඈ කිසිත් නොකියා බිම බලා ගත්තාය. 

"හරි.. ආයේ මට කියන්න තියන්න එපා.. මෙවන් එතන ඉඳියි ආරක්ශිතව තමුන් මෙතන මට ඕනි විදියට වැඩ ටික කරගෙන යනකම්.. මතකනේ. මේ හැම මඟුලම උගේ කණේ තියන්නත් එපා. කියන්නේ මොකක්ද කියලා විතරක් අහගෙන ඉන්නවා. ඒත් කරන්න ඕනි දේ එපා දේ තීරණය කරන්නේ මම. මැනේජර් කමට මොකෙක් හරි විශ්වාසවන්ත එකෙක් හොයාගත්තම මට කියනවා" යි පැවසූ රෝහිත පෙරේරා වේගයෙන් පුටුව පස්සට වීසිවී යන ලෙස නැගිට යන්නට ගියේය. 

හමුවෙමු තවත් කොටසකින්..

ක.මි. 

Check Point..! 8 වෙනි දිගහැරුම

7 වෙනි දිග හැරුමට..

සඳුදා උදෑසන ආරක්ශක කවුන්සිල රැස්වීමට යාමට ප්‍රථම ජාතික බුද්ධි තොරතුරු කාර්‍යාංශයේ ප්‍රධානී මනමේන්ද්‍ර මහතා මහා උභතෝකෝටිකයක පැටලී සිටී. දින 3කට ප්‍රථම වන්නි එකාබද්ධ මෙහෙයුම් ප්‍රධානීගේ රහස් වාර්ථාවට අනුව සැකසූ බුද්ධි තොරතුරු සාරාංශයක් ඔහුගේ එක අතක වෙයි. අනෙක් අතේ ඇත්තේ පෙරදා රාත්‍රියේ නැගෙනහිර ඒකාබද්ධ හමුදා ප්‍රධානීගෙන් ලැබුණු අලුත්ම රහස්‍ය වාර්ථාවයි. ඊට අනුව පෙරදා ත්‍රිකුණාමලයේ මුදා නොගත් ප්‍රදේශ වෙත අත්‍යාවශ්‍ය සේවා ලේබලය යටතේ ප්‍රවාහනය කරන ලද පෙට්‍රොල් බවුසර දෙකක අතුරුදහන් වීමේ සිදුවීමයි. 

වාර්ථාවේ දෙවන අලුත් කිරීමට අනුව අතුරුදහන් වූ බවුසර් දෙක අල්ල කන්තලේ මාර්ගයේ සූර්යපුර විශේෂ කාර්‍ය බළකා කඳවුරට සැතපුම් කීපයක් මෙපිටින් චුන්දකාඩු ඝන වනය තුලින් දිවෙන මාර්ඝයේ මදක් කැලය ඇතුලට වෙන්න තිබී හමුවී ඇති අතර පරීක්ශා කිරීමට යාමේදී එක බවුසරයක් පිපිරී යාමෙන් විශේෂ කාර්‍ය බළකායේ පුද්ගලයින් තිදෙනෙකු ජීවිතක්ශයට පත්වී තවත් පුද්ගලයින් 14 දෙනෙකු තුවාල ලබා ඇත. කළබලයට පත්වූ සෙබළුන්ගේ වෙඩි තැබීම නිසා දෙවන බවුසරයද පිපිරී විනාශ වී ගොස් ඇති අතර විනාශ වූ බවුසර් ආසන්නයේ දැවි අලුවී ගිය පුද්ගලයින් දෙදෙනෙකුගේ සිරුරු කොටස් හමුවී ඇත. ගින්නේ ස්වාභාවය අනුව ඒ වනවිටත් බවුසර් වල තිබූ ඉන්ධන වැඩි ප්‍රමාණයක් ඉවත් කරගෙන ඇති අයුරක් නිරීක්ශණය කර ඇත. එම ස්ථානයේ සිට මහ කැළය මැදට කැළෑ මර්ගවල ගමන්ගත් ට්‍රැක්ටර් රෝද සළකුණු විසාල ප්‍රමාණයක් ඇතත් තවම ඒ ඔස්සේ පරීක්ෂණ ඉදිරියට කරගෙන යාමට අවසර නිකුත් වී නොමැත. හමුවූ සිරුරු කොටස් බවුසර් රථවල  රියදුරු මහත්වරුන්ගේද යන්න ඔවුන් ගැන ඇති තොරතුරු මත පදනම්ව පරීක්ශණ කරගෙන යනු ලැබේ.

දින තුනකට පෙර සිදුවූ සිදුවීම අළලා කල බුද්ධි තොරතුරු ඇගයීමේ වාර්ථාවේ අඩංගු නිර්දේශ හමුදා ප්‍රධානීන් වෙත බාරදීමට මනමේන්ද්‍ර මහතා අද සූදානමින් සිටියේය. නමුත් සතුරා ඊට වඩා ඉක්මන් හා සුක්ෂම වී ඇතැයි සිතීමෙන් ඔහු යම් තරමකට වික්ෂිප්ත වී සිටී. තම වෘත්තීය ජීවිතය තුළ මෙතෙක් රාජකාරීමය අතපසුවීමකට ඉඩක් නොතැබූ ඔහු ඒ නිසාම කැළඹීමට පත්වී සිටින්නේ, 'සෙකට්‍රිට නම් යමක් කියල නෙගෝශියේශන් එකකට එන්න පුලුවං.. ආමි කමාන්ඩර් එක්කනේ බැරි.. එයා එයාගේ ඔක්කොම කැටයම් එතන දානවානේ'යි හිතට එකඟව නොවුනත් සිතමින් සිත සන්සුන් කර ගැනීමට වෑයම් කරේය. 

රැස්වීම පටන් ගැනීමට තව පැයකට ආසන්න කාලයක් ඇත. හදිසියේ යමක් මතක් වූවෙකු මෙන් ඔහු සිය සහයිකාව ඇමතුවේය.

"Yeah, call KD!" එසැණින් සහයිකාව අභ්‍යන්තර දුරකථන ජාලය ඔස්සේ ඇමතුමක් ගෙන 'සර් ට ඩිරෙක්ටර් කතා කරනවා'යි පණිවුඩය අදාළ පුද්ගලයා වෙත ලබා දුන්නාය. KD යනුවෙන් කෙටියෙන් හැඳින්වූ කිත්ම දොඩංගොඩ යනු මනමේන්ද්‍ර මහතා සිය දෙපාර්ථමේන්තුවේ වඩාත්ම ප්‍රිය කළ ජේෂ්ඨ විමර්ශන නිළධාරියා වේ. ඔහු හා ඇති පෞද්ගලික හැඳුනුම්කම් පසෙකලා ඔහු ඉතා නිර්භීතව රාජකාරිය අකුරටම කළ විශිෂ්ඨ විමර්ශණ නිළධාරියෙකු වීම මේ කැමැත්තට හේතුවයි. පණිවුඩය ලැබී මිනිත්තුවක් ගත වීමට ප්‍රථම එම නිළධාරියා අතින් ගත් ලැප්ටොප් පරිඝණකයද සහිතවම තම ප්‍රධානියා ඉදිරියේ පෙනී සිටියේය. 

"Any new development?"

"Yeah, few.. ඩ්‍රයිවර්ස් ලා දෙන්නගෙ ඩීටේල් අරගෙන මම ක්වික් චෙක් එකක් කරා.. අපේ කළිං සැකේ හරි. දෙන්නම ආමි MIA list එකේ. එකක් කුරුණෑගල පැත්තේ එකෙක්ගේ, අනික තණමල්විල කොල්ලෙක්ගේ. මිසින්ග් වෙලා අවුරුදු 3කට වැඩියි දෙන්නම"

"ඌප්ස්.. එතකොට බොඩීස් දෙක? ඒක කෝට් ඕඩරයක් අරගෙන වෙනම ඉන්වෙස්ටිගේශන් කරන්න වෙයි නේ"

"ඔව්. ජේ.ඕ.සී. ඊස්ට් ඒක හැන්ඩ්ල් කරනවා.."

"What else we can assume?"

"මට හිතෙන්නේ KIA/MIA List ලිස්ට් එක කවුරු හරි නොගැළපෙන කෙනෙක් ළඟට ගිහින් තියෙනව.. ට්‍රයි ෆෝසස් කමාන්ඩර්ස්ලගෙන් අහන්න වෙනවා මේකේ ඩිස්ට්‍රිබියුශන් එක ගැන."

"තනි තනිව නම්, විස්තර හොයා ගත්තා වෙන්න බැරිද? KIA/MIA ඔක්කොගෙම නම් ජෙනරල් මැසේජ් එකකින් පබ්ලිශ් කරනවනේ ඉන්සිඩන්ට් එකෙන් ඉන්සිඩන්ට් එකට.."

"No sir, see the three names. නම් තුනේම මුල් නම පටන් ගන්නේ A අකුරෙන්.. අනුර..අනුරාධ වගේ. දෙවෙනි නම පටං ගන්නේ R අකුරෙන්.. රත්නායකලා දෙන්නයි. රූපසිංහයි. ඒකයි මම කියුවේ someone is toying with a list කියල.."

"Excellent KD"

"One more thing.. ඉන්සිඩන්ට් දෙකේම අන්තිම වාහන.. දෙකේම කම්පැනි own ඩ්‍රයිවර්ස්ලා නෙවෙයි. හයර් කරපු අය මේ ටාස්ක් එකටම. So we can safely assume that any new driver with surname starts from R and driving an essential cargo truck in the end of a convoy; there would be something in it"

"Wonderful පුතා.. I was in all sorts of trouble before this. Thanks you."

"My pleasure sir. I'll study this further." 

*****************************************

"සංජු, මේ ඉන්නේ ASP විදානගේ.. ඊස්ට් එකේ එස්ටීඑෆ් ලොක්කා... Station OIC ව නම් ඔයා දන්නවනේ, මේ කතාව අපි හතර දෙනා අතර විතරයි, ඕකේ?" ත්‍රිකුණාමලයේ කිසිවෙකුට සංජු යනු අලුත් නමක් නොවේ. වසර ගණනක සිට ත්‍රිකුණාමල වරායේ ගණං කාරයා සංජුය. ධීවරයෙකු වූ පියාගේ උරුමයෙන් වැල්ලට පය ගැසූ සංජු කිසි දිනෙක මාළු රස්සාවේ යෙදුණු එකෙකු නොවුනත් වැල්ලේ හතර මායිම අතැඹුල සේ දනී. කරදඬු උස් මහත්වූ දින සිට මංජුගේ ආදායම් වැල්ල හා බැඳී පවතී. 

"ඔව් සර්.. ඕකේ"

"මම දන්නව උඹට උන් එක්ක ඩිරෙක්ට් කන්ටැක්ට් තියෙනව කියල.. ආයි මට ඒකේ හංගන්න දෙයක් නෑ."

"සර් ඉතිං ඕක හැමදාම කියනව.. මම අහගෙන ඉන්නව.. ඔය කල්ලරාවේ මාළු දැල් කේස් එකයි සාම්පූර් තෝපුර් ඉඳල රස්සාවට මලේ එන උන්ගේ වැඩ ටිකටයි එහෙ මෙහෙ වෙනවා ඇර මට එහෙම උන් එක්ක ගණුදෙනුවක් නෑ"

"හරි.. අපි ඒක වෙන දවසක වෙනම කතා කරමු. ඊයේ බවුසර් දෙකේ සීන් එක අපේ සූර්‍යපුර එස්ටීඑෆ් කෑම්ප් එක ළඟම වෙච්චි නිසා මේකට අපි ඔක්කොම හිර වෙනවා. ඉන්ට් එකෙන් රිපෝට් එක එන්න කලින් මට වෙච්චි ඇත්ත කථාව දැන ගන්න ඕනි.. සංජුට මොකක්ද ඒ ගැන කරන්න පුලුවන්?"

"බවුසර් දෙකම පෙට්‍රල් කියන්නේ සර්.. ඕක යන්නේ වාකරේට. සීයේ OBM වලට තෙල් බොනවානේ. වාකරේට යනවා කියන්නේ රමේෂ් මාස්ටර්ට බඩු යන්නේ. ඒත් ඔතනට එනකං ගේන එක මිනිහට කරන්න බෑ."

සංජුගේ පිළිතුරත් සමඟ නැගෙනහිර දිසාව බාර ජේශ්ඨ පොලිස් අධිකාරීවරයා තම සහය නිළදාරීන් දෙදෙනා දෙස එකහෙළා බැලුවේය. ඔවුන් දෙදෙනාම නිරුත්තරව මෙන් බලා සිටී. වයස තිස් පහක්වත් නැතැයි සිතෙන මේ තරුණයා ඉතා ශූර ලෙස මේ සිදුවීම විශ්ලේෂණය කරමින් සිටී. සංජු යනු උගතෙක් හෝ දාමරිකයෙකුට සරිළන පෙනුමකින් යුත් මැරයෙකුද නොවේ. එහෙත් ඔහු ලෝක අණ්ඩපාලයෙකි. ලේසියෙන් ඔහුගෙන් වැරදි යමක් එළියට ගත නොහැක්කේ ලෝකය හා ලෝකයා සමඟ නිරන්තරව ගැටීමෙන් ඔහු ලද පරිචය නිසායි.

වයස 25ක් වීමටත් මත්තෙන් බහුදින ධිවර බෝට්ටු වලට සේවකයින් සැපයීමෙන්, ආහාර හා ජලය සැපයීමෙන් මෙන්ම මාසිකව බෝට්ටු හා මාළු ලොරි වලින් කප්පම් එකතු කිරීමෙන් සංජු මහා සල්ලි කාරයෙකු විය. ඒ සඳහා ඔහු රජයේ ඉහළ නිළධරීන්ට පොලිසියට හමුදාවලට මෙන්ම ත්‍රස්ථ සංවිධනයටත් අත දිග හැර වියදම් කළේය. ඔහු වටා නිතරම ගෝලබාලයන් ප්‍රමුඛ මහා පිරිසක් දැවටීම නිසා ප්‍රාදේශීය දේශපාලකයින්ගේ ඇසුර නිතැතින්ම ඔහුට හිමිවිය. එවන් එක් දේශපාලකයෙකුගේ අනුහසින් ත්‍රිකුණාමලය හතරේකණුව ප්‍රදේශයේ අයිස් මෝලේ අයිතිය සංජු අතට පත් වීමත් සමඟින් ඔහු 'අයිස් සංජු' ලෙස කවුරු කවුරුත් හඳුන්වන ලදී. 

ත්‍රිකුණාමලයට උතුරින් හා පුල්මුඩේට මදක් පහලින් යාන්ඔය මුහුදට වැටෙන ආසන්නයේ පිහිටි මුහුද ධීවරයින් හැඳින්වූයේ 'ගැහැණු මුහුද' ලෙසයි. පිහිටීම හා දියවැල්වල සුවිශේෂි බලපෑම හේතුවෙන් එම ප්‍රදේශයේ තෝරු පරවුන් වැනි වටිනා මාළු වර්ග බොහොමයක් බිත්තර දැමීම හා බෝවීම නිසා ඒ ආසන්නයේ මෙම මාළු අස්වැන්න අවුරුද්දේ දින තුන්සිය හැට පහ පුරාම ඉතා සරුය. යාන්ඔයට පහළින් පිහිටි කල්ලරාව ධීවර ගම්මානය මේ සඳහාම ප්‍රසිද්ධය. කල්ලාරාවේ වෙරළ තීරය ආසන්න වශයෙන් මීටර සීයක පමණ කැබලි වලට වෙන් කර එවායේ අයිති කරුවෝ මාස තුනෙන් තුනේ කාලයකට බැගින් එක් එක් ධීවර මුදලාලිලාට බද්දට දීම සිදු කරයි. ඔවුන් තම කණ්ඩායම් සමඟ එහි වාඩිලාගෙන උදේ හවස මාදැල් යොදාගෙන මාළු ඇල්ලීමේ යෙදෙයි. කල්ලරාව ධීවර සමිතියට අයිති එක බිම් කොටසක් ඇරුණු විට ඉතිරි සේරම බිම් අයිති කොළඹ ඉහල පෙළේ පුද්ගලයින්ටයි. අයිති යැයි කීවාට මේ බොහෝ කොටස් බලෙන් වෙන්කරගත් හෝ හොර ඔප්පු මගින් වෙරළ ආසන්නයේ ඉඩම් වෙන්කරවාගෙන එමඟින් ඉදිරිපස වෙරළේ අයිතිය කියන අමුතු ආකාරයේ ජාවාරම් වේ. 

යුද්ධය හා ත්‍රස්ථ බියත්, වෙනත් හේතූනුත් නිසා මේ අයිති පුද්ගලයින් බොහෝවිට මෙම ගණුදෙනු කලේ අයිස් සංජු හරහායි. එක් බිම් කොටසක් මාස තුනක කාලයකට රුපියල් ලක්ශ විසිපහක් වැනි ඉහළ මුදලකට බදු දෙනු ලැබේ. එසේම මෙම වාඩි වලට මිනිසුන් ගෙන ඒම තවත් අපූරු ක්‍රියාවලියකි. වාරකන් නිසා ධීවර කටයුතු කළ නොහැකි පැතිවල පළපුරුදු ධිවරයින් මාස තුනක කාලයකට මෙම වාඩි වලට එවනු ලැබේ. පළපුරුදු ධීවරයෙකු ගෙනෙන විට මුලින් ඔහුගේ පවුලට රුපියක් පනස්දාහක් මුදලින් ලබා දේ. එතැන් පටන් ඔහු මාස තුනක් දක්වා අදාළ මුදලාලිගේ වහලෙකි. ඉඳුම් හිටුම් සියල්ල වැල්ලේ වාඩියේම වේ. කෑම තුන් වේලටම කළවම් අලුත් මාළු හොද්දක් හා බතකි. ඉඳහිට පොල් සම්බෝලයක් එකතු වේ. මාස තුන අවසානයේ ඔවුන් නිදහස් කර යවන විට මුදලාලිගේ ලාබයට සාපෙක්ශව කිසියම් මුදලක් අත මිට මොළවනු ලබන මුත් එය අනිවාර්‍ය නැත. මේ වාඩිවලට අවශ්‍ය හාල් තුනපහ, බොන වතුර, අරක්කු සිගරට් හා දැල් ආම්පන්න නඩත්තු උපකරණ සැපයීමද තවත් එක් ව්‍යාපාරයකි. එසේම අල්ලන මාලු තිකුණාමලයට හා එතනින් කොළඹට යැවීමද වෙනම දාමයක් ඔස්සේ ක්‍රියාත්මක වේ. නියමින් හෝ අනියමින් මේවායේ වැඩි පංගුවක අයිතිය දැරුවේද සංජු හෝ ඔහුගේ ගෝල බාලයින් වේ. මෙනයින් 'අයිස් සංජු' යනු ත්‍රිකුණාමලය මතු නොව ලංකාව පුරාම මාලු වෙළඳාම හෝ ඒ ආශ්‍රිත කටයුතු වල යෙදෙන්නන්ගේ මුවඟ නිතර කියවෙන නමක් වී තිබුණි. 

"හරි.. ඔතනට එනකම් විස්තරේ තමයි මටත් දැන ගන්න ඕනි. උඹට තමයි ඒක කරන්න පුලුවන්. මිනිහෙක් දාපන් ඉක්මණට ඒකට. ඇක්ශන් එකක් ගන්නවද නැද්ද කියන එක නෙවෙයි. මේක අළුත් ගේම් එකක්.. වෙන්නේ කොහොමද කියන එක දැන ගෙන ඉන්න එක උඹලා අපි ඔක්කෝටම හොඳයි. එහෙම නේද?"

"ඒකනම් ඇත්ත සර්.. ටික දවසක් දෙන්න. මම හොයාගන්න බලන්නම්"

***********************************************

ඉරිදා උදෑසන 10.30ට පමණ ත්‍රිකුණාමලය නාවික තඨාකාංගනයේ දොරටුව අසලින් දර්ශන් ඇතුළු තරුණයින් හතර දෙනා තම ජීප් රථයට නංවාගත් දේවා සවස් වීමට ප්‍රථම වැල්ලවත්තේ ඔවුන් වෙනුවෙන් කුළියට ගත් නිවස වෙත පැමිණියේය. සියළු ලියකියවිලි අඩුපාඩුවක් නොමැතිව තිබීමත් හතරැස්කොටුව මුරපොළ බාර නිළධාරියාගේ සහයෝගයත් නිසා අතරමඟ ලියාපදිංචිය සඳහා රස්තියාදුව අවම විය. තරුණයින් හතර දෙනාව එළඹෙන සතියේ විශ්ව විද්‍යාල ප්‍රවේශය සඳහා රැගෙන යාමට ඔහුට මේ නිවස සොයා ගැනීමට උපකාරී වූ මිතුරාම ඉදිරිපත් වූ හෙයින් තරුණයින්ට ඔහුව හඳුන්වාදීම සඳහා දේවා ඇතුළු පිරිස මිතුරාගේ නිවස වෙත එදින සවසම ගියහ. එහිදී කොළඹ ජීවිතය හා එහිදී ද්‍රවිඩ තරුණයින්ට මුහුණ දීමට සිදුවිය හැකි ගැටළු හා ඒවා අවම කර ගැනීමට අවශ්‍ය බොහෝ උපදෙස් දේවාගේ මිතුරා විසින් තරුණයින්ට ලබා දුණි. ඔහුට බොහෝ සෙයින් ස්තූති කළ දේවා තරුණයින් පිරිස නැවත කුළී නිවස වෙත ඇරලවා එදිනම නැවත කිළිනොච්චිය බලා යාමට සිය රියදුරු සගයා සමඟ රෑ බෝ වීමට මත්තෙන් කොළඹින් පිටත් විය. 

සංවිධානයේ සාමාජිකයින් අතර එදින හුවමාරු වූ රහස් සංඥා පණිවුඩ වලට අනුව දෙවන ඇල්ෆා රෝමියෝ  මෙහෙයුමෙන් පසුව හමුදාව දණ්ඩෙන් පහරකෑ සර්පයකු මෙන් කිපී ඇති බවත් එහෙයින් තම කටයුතු වහාම සැකකටයුතු සීමාවෙන් මෙහා ඉදිරියට සැළකිය යුතු කාලයක් පවත්වාගෙන යා යුතු බවට දේවා තීරණය කොට සිටියේය. නමුත් ඒ සියල්ලටම වඩා 'බිෂොප්' පිළිබඳව සින්න තලේවර් ගේ උනන්දුව ගැන ඔහු කැළඹී සිටියේය. 'බිෂොප්' යනු සංවිධානය තුල දර්ශන් ව හඳුන්වන නාමයයි. දර්ශන් වැනි දක්ශ උගත් තරුණයින් ලෙහෙසියෙන් තම අරමුණු වලින් නිදහස් කිරීමට සංවිධානය කටයුතු නොකරන බව දේවා දැන සිටියත් මෙතරම් ඉක්මණින් සහ වේගයෙන් සංවිධානය ඔහු ගැන උනන්දු වේයැයි ඔහු කිසිසේත් බලාපොරොත්තු වූයේ නැත. නමුත් භූමියේ යුද්ධය සංවිධානයට අවාසි අයුරින් පෙළගැහෙද්දි තිරය පසුපස යුද්ධයට කල් වේලා සැළසුම් ඇතුව සූදානම් වීමට මේ වෙලාවේ සංවිධනයට අවකාශ නොමැත. එය දර්ශන් ගේ අනාගත සැලසුම් වලට හිතකර නොවන බව දේවා දනී. වහා මේවායේ යම් වෙනසක් සිදුකළ යුතුය. 

සඳුදා උදෑසන දිසාපති කාර්‍යාලයේදි කිළිනොච්චි දිසාපතිතුමිය හමුවූ අරුල් දේවනායගම් ඉල්ලීමක් කරමින් තමන්ට කොළඹට මාරුවක් ලබා ගැනීමට අවශ්‍යබව ප්‍රකාශ කළේය. නමුත් දිසාපතිතුමිය එයට එකහෙළා තම විරෝධය ප්‍රකාශ කළේ මේ අසීරු සමයේ ඔහු වැනි කාර්‍යශූර නිළධාරියෙක් අහිමි වීමෙන් දිසාපති කාර්‍යාලයට වන හානිය පැහැදිලි කරමිනි. අවසානයේ දෙපාර්ශවයේම අවශ්‍යතා සළකා අරුල් දේවනායගම් ට කොළඹ සිට කිළිනෝච්චියේ රාජකාරී කටයුතු වල යෙදීමටත්, අත්‍යාවශ්‍යම අවස්ථා සඳහා පමණක් කිලොනෝච්චියට පැමිණීමටත් එකඟතාවයකට පැමිණියහ. මේ පිළිබඳව දිසාපතිතුමිය බොහෝ පාර්ශවයින් දැනුවත් කොට ඔවුන්ගේ අනුමැතිය හා එකඟතාවය  ලබා ගැනීමට කටයුතු කලාය. විශේෂයෙන් සංවිධානයේ අනුමැතිය මේ සඳහා ලැබීම පිළිබඳ දේවා අතිශයින් සතුටු විය.

පසු සටහන

KIA/MIA List ලිස්ට් එක- Killed in Action/ Missing in Action List (ක්‍රියාන්විතයේදි මියගිය හා අතුදහන් වූවන්ගේ නාම ලේඛනය)

ජේ.ඕ.සී. ඊස්ට්- Joint Operation Commander East (ඒකාබද්ධ මෙහෙයුම් ප්‍රධානී- නැගෙනහිර)

ට්‍රයි ෆෝසස් කමාන්ඩර්ස්ල- Tri-Forces Commanders  (ත්‍රිවිධ හමුදාපතිවරුන්)

convoy- කොන්වෝයි (හමුදා සාමාජිකයින් හෝ අත්‍යාවශ්‍ය ද්‍රව්‍ය රැගෙන එක පෙළට ගමන් කරන රථ පෙළ)

රස්සාවට මලේ එන උන්- 'මලේ' යනු ත්‍රිකුණාමලය වෙනුවට ඒ පැතිවල බාවිතා වන කෙටි යෙදුම වේ.

සීයේ OBM වලට තෙල් බොනවානේ- 100hp Out Boat Motors- අශ්වබල සීයයේ පිටත සවිකරන මෝටර් එන්ජින් (සාමාන්‍යයෙන් ධීවර කටයුතු සදහා අනුමත වන්නේ අශ්වබල 5/10/15 වැනි ප්‍රමාණයේ යන්ත්‍ර වේ. නාවික හමුදාව වෙරළාරක්ශක රාජකාරි වල යෙදෙන සිය කුඩා යාත්‍රා සඳහා අශ්වබල 25 යන්ත්‍ර යොදා ගනි. මහ මුහුදේ නාවික ඩෝරා යාත්‍රා සමඟ තරඟ කිටීමට අවැසි නිසා මුහුදු කොටි සංවිධානය සිය ප්‍රහාරක යාත්‍රා සඳහා අශ්වබල සීයයේ පිටත සවිකරන එන්ජින් යන්ත්‍ර හතරක් හෝ පහක් එකවර යොදා ගනී)

හමුවෙමු තවත් කොටසකින්..

- ක.මි. 

Check Point..! 7 වෙනි දිගහැරුම

6 වෙනි දිග හැරුමට..

"මම මරනවා ඕකව.. වල් පරයා..!"

රිමාන්ඩ් බන්ධනාගාරයේ උළු අහසට විසිවන සේ කෑගසමින් බිත්තියට අතින් පහර දෙමින් එසේ කෑ ගැසූ රිමාන්ඩ් සිරකරුවා ඒ වනවිට සිටියේ සිය අත රැඳි ජංගම දුරකතනය වෙත ගුගුරා හැලෙමිනි.. වහා ඔහු වෙත පැන ඔහු නිහඬ කල ජේලර්වරයා නොරුස්නා හඬින් ඔහු වෙත චෝදනා කලේය..

"පිස්සුද මහත්තය ඔහොම කෑ ගහන්න.. මේක ගෙදර කියල හිතුවද.. මනුස්සකමට උදව්වක් කරාම අපි ගස් යන වැඩනේ ඔයාල කරන්නේ.. ඉක්මණට ඔය ෆෝන් එක ඕෆ් කරලා හංග ගන්න.. නැත්නම් මට වෙනවා අයින් කරන්න. තරහා වෙන්නෙපා ඔන්න.."

ජා ඇළ ප්‍රදේශයේ සාමාන්‍ය ව්‍යාපාරික පවුලක තරුණයෙකු වූ මෙවන් සිරිවර්ධන තරුණ කාලයේ හෙමව්පියන් විසින් වැඩිදුර අධ්‍යාපනය සඳහා රුසියාවට පිටත් කළද අධ්‍යාපනය කඩාකප්පල් කරගත් ඔහු එහිදී හමුවූ ඉන්දියානු මිතුරෙකු සමඟ ඩුබායි වෙත පැමිණ නොයෙක් ආකාරයේ ව්‍යාපාර කටයුතු වල යෙදුණේය. ඔහු ටික කලෙකින් ඩුබායි හි විසූ සුරූපී ශ්‍රී ලාංකික තරුණියක් වූ ෂෙලීන් හා හාදව ඇයත් සමඟ නැවත ලංකාවට පැමිණ විවාහ විය. ඔවුන් ලංකාවට පැමිණ නවාතැන් ගත්තේ කඳාන ප්‍රදේශයේ ෂෙලීන් ගේ මාමා කෙනෙකුට අයත් නිවසක ඇනෙක්සියකයි. ෂෙලීන් ගේ මාමා නාවික හමුදාවෙන් විශ්‍රාම ලබා සිටි අතර ඔහුගේ බිරිඳ නිතර අසනීප තත්වයෙන් පසුවීම නිසා ආර්ථික වශයෙන් අසීරු අඩියක පසු වන්නෙකු විය. 

කුඩා කල සිට ඩුබායි හී හැදී වැඩුණු ෂෙලීන් ලංකාවට ආවද ලංකාව ගැන 'හයක් හතරක්' නොදන්නී ඇගේ එකම ලෝකය මෙවන් සහ ඇගේ මාමාගේ පවුලේ අය පමණක් වූවාය. මෙවන් ලංකාවට පැමිණීමෙන් අනතුරව වාහන සහ ඉඩම් 'බයින් ඇන්ඩ් සෙලින්' ව්‍යාපාරයකට මුදල් යෙදවූ අතර මුල් කාලයේ එම එයාපාර ඉතා ලාබදායි වූයෙන් ඔවුන් ජා ඇල මාමලාගේ නිවසේ සිට වැලිසර නවීන පන්නයේ තට්ටු තුනක මහල් නිවසක් කුලියට ගෙන එහි පදින්චියට ආහ. වසර කීපයක ඇවෑමෙන් මෙවන් සහ ෂෙලීන් පිරිමි දරුවන් දෙදෙනෙකුගේ දෙමාපියන් වූහ. ඔවුන් වත්තල පිහිටි ප්‍රමුඛ පෙලේ ජාත්‍යන්තර පාසලක ඉගෙනුම ලැබූහ. 

ෂෙලීන් හා මෙවන් වෙනම පදිංචියට ඒමෙන් ඇගේ මාමා වූ ලෙනාඩ්ට ලැබුණු අමතර වාසි එකින් එක අඩුවන්නට විය. එහෙයින් ඔහු හෙමින් හෙමින් නැවතත් ෂෙලීන් වෙත කිට්ටු වෙමින් ඇගේ හිත දිනා ගන්නට වෑයම් කලේය. මේ අතර කලක් ඇවෑමෙන් දිනෙන් දින මෙවන් ගේ ආදායම් අඩුවූ අතර වියදම් ඉහල යමින් තිබුණි. මිළට ගත් සමහර වාහන වල ලියාපදිංචි සහතික හොරෙන් සකස් කර තිබූ ඒවා බැවින් සමහර ඒවා ගත් මුදලට වඩා ඉතා අඩු ගණන් වලට විකුණා දැමීමට ඔහුට සිදුවිය. මේ ව්‍යාපාර පාඩු ලබද්දි ලෙනාඩ් ඊට හේතුව ලෙස ඔවුන් නිසි ලෙස ආගම නොඇදහීම බව ෂෙලීන් ට ඒත්තු ගැන්වීමට සමත් විය. එමෙන්ම සාම්ප්‍රදායික ක්‍රිස්තියානි හෝ රෝමානු කතෝලික නොවන වෙනත් ආගමක නිකායක අනුගාමිකයින් ලෙස ඔවුන්ව, විශේෂයෙන් ෂෙලීන්ව නම්මා ගැනීමට ලෙනාඩ් ට හැකිවිය. මේ සඳහා බොහෝ සෙයින් උපකාර වූයේ ඒ වනවිට ලංකාවේ ප්‍රබලම දේශපාලන පවුලක ප්‍රසිද්ධ කාන්තාවක් මෙම නිකායේ ප්‍රබල අනුගාමිකාවක් වී සිටීමයි. කඩවසම් මෙවන් මෙන්ම සුරූපී ෂෙලීන් නොබෝ දිනකින්ම එම නිකායේ සාමාජිකයින් අතර ප්‍රසිද්ධ ජෝඩුවක් වූ අතර 'මැඩම්' යනුවෙන් හැඳින්වුණු දේශපාලන කාන්තාවගේ අවධානය දිනා ගැනීමටද ෂෙලීන්ට හැකිවිය. ඉන් අන්තුරුව 'මැඩම්' සහභාගී වන කාන්තා උත්සවාදී කටයුතු වලදි මැඩම්ගේ පරිවාර ස්ත්‍රියක් ලෙස ෂෙලීන් ද ඒ ඒ කටයුතු වලට දායකත්වය ලබා දීමෙන් නොබෝ දිනකින් යම් තරමක සමාජ බලයක් ගොඩ නගා ගැනීමට මෙවන් සහ ෂෙලීන් යුවලට හැකිවිය.

මේ වනවිට මෙවන්ලාගේ දුරින් ඥාතීන් වූ ඔස්ටින් මුදලාලිට අයත් ඔස්ටින් පෙරේරා හා සමාගම රටේ දැවැන්ත ව්‍යාපාරික ජාලයක් ගොඩනගාගෙන තිබුණි. විශේෂයෙන්ම ඔස්ටින් මුදලාලිගේ පුත් රෝහිත පෙරේරා දේශපාලනයට සම්බන්ධවීමත් සමඟ ත්‍රිවිධ හමුදාවට අත්‍යාවශ්‍ය ද්‍රව්‍ය සැපයුම් සිදුකල ඔවුන්ගේ ව්‍යාපාරික ජාලය ඉතා විශාල ලෙස ව්‍යාප්ත විය. රෝහිත පෙරේරා රාජ්‍ය අමාත්‍යවරයෙකු ලෙස දිවුරුම් දීමෙන් අනතුරුව එකහෙළා ව්‍යාපාර වල යෙදීමෙන් ඈත්ව ඒ වෙනුවට ඔහුගේ විවිධ නියෝජිතයන් හරහා මෙම ව්‍යාපාර මෙහෙයවමින් සිටි සමයේ මෙවන් සිරිවර්ධනලාගේ නැගිටීම ඔහුගේ ඇස ගැසෙන්නට විය. 'කියන ඕනි වැඩකට' කැමති ජාතියේ 'බුලට්' එකක් බව දන්නා සිය ඥාති සහෝදරයාත් ඔහුගේ සුරූපි බිරිඳත් රෝහිත පෙරේරලාගේ ව්‍යාපාර හා සම්බන්ධ වන්නේ ඉන් අනතුරුවයි. 

ඒ අනුව වත්තල හේකිත්ත පාරේ වසා දමා තිබූ රජයේ සංස්ථාවකට අයත් පැරැණි ගබඩා සංකීර්ණයක් දීර්ඝ කාලීන බදු පදනම යටතේ මෙවන් සිරිවර්ධනලාට ලැබුණු අතර එහි M.S. Direct Distributors ආයතනය ස්ථාපිත කරන ලදී. කෝටා ක්‍රමයට ඔස්ටින් පෙරේරා සමාගමට ලැබෙන උතුරු නැගෙනහි‍ර මුදා නොගත් ප්‍රදේශ හා ත්‍රිවිධ හමුදාවලට යැවෙන අත්‍යාවශ්‍ය ද්‍රව්‍ය ගබඩා කිරීමේ හා ප්‍රවාහනයේ උප කොන්ත්‍රාත්තුවක් මෙම ආයතනයෙන් සිදුකල අතර ඒ සදහා ඉඩ හා දුර ප්‍රමාණය අනුව ගෙවීමක් සිදු කරණු ලබයි. 

මේ අතර වාහනයක වංචනික ලියකියවිළි හා සම්බන්ධ නඩුවක් හේතුවෙන් මෙවන් සිරිවර්ධන සති දෙකක කාලයකට රිමාන්ඩ් බන්ධනාගර ගත කෙරේ. ඒ කාලය තුල ලෙනාඩ් උවමනාවෙන්ම පැමිණ ෂෙලීන්ට ව්‍යාපාර කටයුතු සඳහා උදව් කරයි. මෙවන්ගේ සුරූපි බිරිද ෂෙලීන් කෙරෙහි ආශක්තව පසුවෙන රෝහිත පෙරේරා මේ අවස්ථාවේදි මෙවන්ව බේරා ගැනීම හිතා මතාම කර අරින නමුත් ඒ කාලය තුල ෂෙලීන්ට ළං වීමටද ඔහු අපොහොසත් වේ. සියළු කටයුතු මැද ෂෙලීන් හා මෙවන් දෙදෙනාට අසීමිතව ආදරය කරන එකිනෙකාට ලැදි යුවලක් වීම නිසා මෙතක් රෝහිත පෙරේරාට ඇගෙන් බැල්මකින් හෝ සහොයෝගයක් නොලද නමුත් ඔහුගේ හිතේ ෂෙලීන් නැමති ගිනි පුළිඟුව පිටතට නොපෙනී නොනිවී දැල්වෙයි. 

සති දෙකක බන්ධනාගාර ජීවිතය තුල මෙවන්ට අපූරු මිතුරෙකු මුණගැසේ. දිගුකලක් රජයේ ගිණුම් ලිපිකරුවෙකුව හිඳ යම් අකටයුත්තක් හේතුවෙන් සේවයෙන් පහ කරන ලද්දාවූද ඉන් අනතුරුව පෞද්ගලික ආයතනයක සේවය කරමින් සිටියදි දැවැන්ත චෙක්පත් වංචාවක හවුල් කරුවෙකුවීම නිසා රිමාන්ඩ් බන්ධනාගාරගතව සිටි ඔහු සෙනෙවිරත්න නම් විය. සෙනෙවිරත්න සිය ජීවිත කාලය තුලදි වැඩිහරියක්ම සම්බන්ධ වී තිබුණේ නීතිවිරෝධි කටයුතු වලට වේ. ඔහු නීතිවිරෝධී වාහන, ඉඩම් වෙළදාම්, අගරු චෙක්පත්, ආයෝජන වංචා මෙන්ම අළුත්ම බිස්නස් 'ට්‍රෙන්ඩ්' එක වූ ත්‍රස්ථවාදී සංවිධානයට තහනම් බඩු භාණ්ඩ සැපයුම ගැනද මෙවන් හා පාරම් බෑවේය. එකම දිනයකදි එකම උසාවියෙන් ඇප ලබා එළියට පැමිණි සෙනෙවිරත්නට තම ව්‍යාපාරය හා එක්වන ලෙස මෙවන් ආරාධනා කලේය. සෙනෙවිරත්නගේ පැමිණීමත් සමඟ ඔහු කළමනාකරු වශයෙන් කටයුතු කල අතර ලෙනාඩ් පැත්තකට විසිවිය. ෂෙලීන් ගේ මැදිහත් වීමෙන් ලෙනාඩ් තවදුරටහ් ගබඩා සංකීර්ණයේ ආරක්ශක කටයුතු සොයා බලමින් එහි රැඳී සිටී. 

නීති විරෝදී ලෙස ගෙන්වූ හා එකළස් කල වාහනද ලියකියවිළි වෙනස් කල වාහනද සමඟ ඔට්ටු වීම නිසා මෙවන් ටික කලෙකින්ම ඒ විශය සම්බන්ධයෙන් සෑහෙන පරිචයක් ලැබීය. නීති විරෝධීව වාහන ගෙන්නන්නං, එකළස් කරන්නන්, ලියකියවිළි වෙනස් කරන්න උදව් කරන මෝටර් රථ ප්‍රවාහන කොමසාරිස් කාර්‍යාලයේ සේවකයින්, වාහන වෙළඳාමේ අතරමැදි කරුවන් වශයෙන් එහි වූ මහා ජාලයේ එක් කොටස් කරුවෙකු වූ මෙනන් සෙනෙවිගේ සම්බන්ධතාද උපයෝගී කර ගනිමින් තවත් පියවරක් ඉදිරියට මේ ව්‍යාපාරය ගෙන ගියේය. එනම් නීති විරෝධි වාහන අඩු මුදලට ගෙන ඒවා උතුරු නැගෙනහිර ත්‍රස්ථ සංවිධානය වෙත වැඩි මුදලට විකිණීමයි. මේ සඳහා ඔහුට ත්‍රස්ථ ක්‍රියාකාරීන් සම්ඟ කෙළින්ම සම්බන්ධ වී කටයුතු කිටීමට සිදුවිය.

සින්න තලේවර් ලෙස හැඳින්වූ දෙවන පෙළ ත්‍රස්ථ නායකයා ත්‍රස්ථ සංවිධානය වෙනුවෙන් මේ කටයුතු බාරව සිටියේය. ඔහුගේ නියමයෙන් 'මුත්තවර්' යන සංඥා නාමයෙන් හැඳින්වූ කිලිනෝච්චියේ අත්‍යාවශ්‍ය සේවා බාර රජයේ නිළදාරියෙක් මේ සියළු කටයුතු සම්බන්ධීකරණය කරයි. මුත්තවර් යනු සිංහල, දෙමළ මෙන්ම ඉංග්‍රීසි භාශාවද ව්‍යක්තව හැසරවූ දකුණේ බොහෝ නිළධාරින්ගේ හා හමුදා පුද්ගලයින්ගේ විශ්වාසය දිනූ දක්ශ තරුණ නිළධාරියෙක් විය. නමුත් ක්‍රමිකව ත්‍රස්ථ සංවිධානය විසින් ඔහුව වටලා ඔහුගේ මෙම හැකියාවන් ඔවුන්ගේ උවමනා එපාකම් වලට යොදවාගන්නා තැනට කටයුතු කරන ලදී. මුලින්ම ත්‍රස්ථයන් විසින් ඔහුගේ බිරිඳගේ පියා ද්‍රෝහී වීමේ චෝදනා මත මරා දැම්මේය. ඉන්පසු යාපනේ විසූ ඔහුගේ පවුලේ අය කඩින් කඩ කොටු කොට ඔවුන්ට නොයෙකුත් සීමා පැනවූයේය. මුත්තවර්ගේ මස්සිනා හෙවත් බිරිඳගේ මල්ලීගේ සියලු වගකීම් මියගිය මාමා විසින් ඔහු වෙත පවරා තිබූ බව ත්‍රස්ථ සාමාජිකයින් දනී. අවුරුදු විස්සක නව යොවුන් තරුණයෙකු වූ දර්ශන් ඉගෙනීමෙහි ඉතා දක්ශ කඩවසම් තරුණයෙකු වූයේය. ඔහුට වයස 16දී පමණ ඔහුව සංවිධානයට බඳවා ගැනීමට අණ ලැබුණු මුත් උසස් පෙළ අවසන්වනතුරු පාසැල් යාමට පසුව අවසර නිකුත් විය. උසස්පෙළින් අනතුරුව නැවත සංවිධානය වෙනුවෙන් කටයුතු කලයුතු වූ අතර සංවිධානයට පක්ශව ඒ වෙනුවෙන් කටයුතු කරන පොරොන්දුව මත ඔහුට වැඩිදුර අද්‍යාපනය සඳහා මොරටුව විශ්ව විද්‍යාලයට ඇතුළු වීමේ අවසරය සංවිධානයෙන් නිකුත් විය, මේ සියල්ල සඳහා මුත්තවර් ගෙවිය යුතු වන්දිය ත්‍රස්ථ කටයුතු සඳහා උතුර හා දකුණ අතර සහසම්බන්ධය පවත්වාගෙන යාම වේ. කටයුතු පහසු වීම සඳහා ත්‍රස්ථ සංවිධානයේ අනුහසින්ම මුත්තවර් හෙවත් අරුල් දේවනායගම් කිලිනොච්චි දිසාපති කාර්‍යාලයේ අත්‍යාවශ්‍ය සේවා බාර නිළදාරියා ලෙස පත්වීම් ලද්දේය. 

අත්‍යාවශ්‍ය සේවා බාර නිළධාරියා ලෙස අරුල් දේවනායගම් සතුව දිසාපති කාර්‍යාලයට හා රතු කුරුස සවිධානයට අයත් වාහන සංචිතයක් පවතී. ඔහුට 'අත්‍යාවශ්‍ය සේවා' ලේබලය යටතේ මෙන්ම 'රතුකුරුස' ලේබලය යටතේද උතුර හා දකුණ අතර වාහන එහෙ මෙහෙ යැවීමේ බලය පවති. අනෙක් අතට සියලුම හමුදා නිළධාරින් හා සෙසු නිළයන් සමඟ පාහේ ඔහුගේ ඇති සමීප සම්බන්ධය නිසා බොහෝ මුරකපොළු වලදි ඔහුගේ වාහන දීර්ඝ ප්‍රශ්ණ කිරීම් වලට ලක්වන්නේ නැත. මේ දම්වැල බාවිතා කරමින් මෙවන් ඇතුලු කණ්ඩායම ෆෝ වීල් වර්ගයේ වාහන කීපයක්ම සාර්ථකව දනුණේ සිට උතුරට නීති විරෝධීව පැන්නුවේය. සින්න තලේවර් විසින් මෙවන් සිරිවර්ධන 'මයික් සියරා' ලෙසත් අරුල් දේවනායගම් 'මුත්තවර්' ලෙසත් එකිනෙකාට හඳුන්වා දුන් නමුත් මේ තාක් දෙදෙනා එකිනෙකාට හමුවී නැත. අවශ්‍ය සම්බන්ධීකරණ කටයුතු වලට කලින් කලට නොයෙක් පුද්ගලයින් එකතුවන නමුත් මේ කිසිවෙකුගේ නිසි හැඳුනුම්කමක් එකිනෙකා නොදනී. සෑම විටම රහස් සංඥා නාමය හරහා එකිනෙකා තහවුරු කර ගැනීමෙන් අනතුරුව පමණක් අවශ්‍ය තොරතුරු හුවමාරු කර ගනී. 

හලාවත පැත්තේ ප්‍රබල දේශපාලකයෙකුගේ පුතෙකු වෙනුවෙන් නීතිවිරෝධිව ගෙන්වූ සුඛෝපභොගි ජීප් රථයක් වැඩි මිළක් ගෙවා මිළදී ගැනීම ගැන උරණ වූ ඒ දේශපාලකයා ඔහුගේ හිතවත් ව්‍යාපාරිකයෙකු හරහා ගොනු කල නඩුවක් හේතුවෙන් මෙවන් යළිත් රිමාන්ඩ් බන්ධනගාර ගතවන්නේ ඔය අතරතුරයි. මෙහිදී ෂෙලීන් විසින් රෝහිත පෙරේරාගේ පිහිට පැතුවත් ඔහුගේ උපදෙස වන්නේ අවම මාස තුනක්වත් මෙවන් රිමාන්ඩ් එකේ සිටිය යුතු බවයි. එය මෙවන්ගේම ආරක්ශාවට වඩාත් උචිත බව පැවසීම නිසා මෙවන් සහ ෂෙලීන් දෙදෙනාම ඊට එකඟ විය. මෙවන්ට බන්ධනාගාරයේදි අවශ්‍ය සියළු පහසුකම් ලබා දීමට රෝහිත පෙරේරා මෙන්ම ත්‍රස්ථ නායික සින්න තලේවර්ද කටයුතු කලෙන් ඇප ලබා නොගෙන මෙවන් බන්ධනාගාරයේ සිට සිය කටයුතු මෙහෙයවීම සිදු කලේය. සෙනෙවිරත්න හා ලෙනාඩ් ගේ සහයෙන් ආයතනයේ කටයුතු ෂෙලීන් විසින් නොකඩවා කරගෙන ගිය අතර නොදන්නා සියළු දෙනාට මෙවන් ව්‍යාපාරික කටයුත්තක් සඳහා විදේශගතව ඇති බව සඳහන් කරයි.

****************************************************

මුත්තවර් ගේ සුදු පැහැ ලෑන්ඩ් රෝවර් ජීප් රථය කන්තලේ ප්‍රාදේශීය සභා ගොඩනැගිල්ල අසල නවත්වා ඇති බව දුටු මහේෂ් සියල්ල සැළසුම් කල පරිදි කරදරයකින් තොරව සිදුවන බව සැක හැර දැන ගත්තේය. පෙර දින කොළොන්නාවේදි හමුවූ නාදුනන සගයා විසින් පදවන  අනෙක් පෙට්‍රල් බවුසරය තමාගේ පිටුපසින් එන බව තහවුරු කරගත් මහේෂ් ත්‍රිකුණාමලයට යාමට හැරවිය යුතු කන්තලේ නගරය හරහා දිවෙන ප්‍රධාන මාර්ගය වෙනුවට දකුණට හරවා අල්ල-කන්තලේ මාර්ගය හරහා වේගයෙන් බවුසරය ධාවනයේ යෙදවීය. තව සුළු වේලාවකින් එනම් චුන්දකාඩු ඝන වනාන්තරය මැදදි තමන්ගේ වගකීම අවසන් වන බව මහේෂ් දනී. සැළසුමේ හැටියට චුන්දකාඩු ඝන වනය කෙළවර පිහිටි එස්ටීඑෆ් කඳවුරට ප්‍රථම තැනකදි ත්‍රස්ථ සාමාජිකයින් මඟ අහුරා පෙට්‍රෝල් බවුසර් දෙක ඔවුන්ගේ ග්‍රහණයට ගනී. එතැන් සිට මහ කැලැය මැදින් වෙරුගල් හා වාකරේ දක්වා පෙට්‍රොල් ප්‍රවාහනය කිරීමට ට්‍රැක්ටර් ටේලර් වකට සවිකර කුඩා ප්‍රමාණයේ බවුසර් එම ස්ථනයේ දැනටමත් සූදානම්ව ඇතුවා විය යුතුය. වාකරේ ඇතුළු ත්‍රිකුණාමලයට දකුණින් මුහුදේ සිදුවන ත්‍රස්ථ ක්‍රියාකාරකම් සඳහා අවශ්‍ය පෙට්‍රොල් වල අධික හිඟතාවයක් ඇති නිසා මේ මෙහෙයුම සිදු කරන බව මහේෂ් නොදනී. මුත්තවර් සාමාන්‍යයෙන් එවැනි වැඩි විස්තර නොපවසන අතර මහේෂ් ඒවා හාරා අවුස්සා අසන්නට යන්නේද නැත. චුන්දකාඩු හි සිට තමන්ගේ හා තම සගයාගේ වගකීම ත්‍රස්ථ සාමාජිකයින් සතුවන බව පමණක් කී මුත්තවර් ඔවුන්ගේ අණට කීකරුවී කියන දෙය පමණක් කරගෙන ඉන්නා ලෙස අනතුරු ඇඟවූයේය. හැකි පළමු අවස්ථාවේම ඔවුහු මහේෂ් හා අනිකා කැලෑවෙන එළියට ආරක්ශිතව පමුණුවනු ඇත. 

මහේෂ් හා ඔහුගේ සගයා බවුසර් දෙක අල්ල කන්තලේ මාර්ගයට හරවා නොපෙනී යනතුරු ධාවනය කරනකම් උපේක්ෂාවෙන් සිටි දේවා සිය පෞද්ගලික දුරකථනයෙන් කෙටි පණිවුඩයක් හරහා ඒ බව ජාලයේ අනෙක් උන්ව දැනුම්වත් කළේය. 

"Operation Alpha Romeo ii successfully done"

කන්තලේ නගරය පසුවූ පසු නැවත ත්‍රිකුණාමලයට ආසන්න වනතුරු ජංගම දුරකථන වලට සිග්නල් නැත. වේලාව උදෑසන දහයට ආසන්න වෙමින් පවතින හෙයින් තම මිතුරු නාවික නිළධාරියා තමාව ඇමතීමට බලාපොරොත්තුවෙන් ඇතැයි සිතු දේවා කඩතොළු වූ මාර්ගයේ පමණට වඩා වේගයෙන් ජීප රථය ධාවනයේ යොදවන්නට විය. 'ඇල්ෆා රෝමියෝ'.. මේ නම මෙම ක්‍රියාන්විතයට යෙදුණු හැටි සිහිවී දේවාට සිනහා පහලවිය. මීට වසරකට පමණ පෙර රතුකුරුස සංවිධානයේ යම් සහනාධාර වැඩසටහනක් වෙනුවෙන් මියගිය හා අතුරුදහන් වූ හමුදා හා ත්‍රස්ථ සාමාජිකයින්ගේ නම් ලැයිස්තු දෙකක් ඔහු වෙත ලැබුණි. ඉන් හමුදා සාමාජිකයින්ගේ නම් ලැයිස්තුවේ ඉහලින්ම තිබූ නම 'අනුර රත්නායකයි'.. එම ලැයිස්තුවේ තවත් රත්නායකලා බොහෝ දෙනෙක් වූ අතර රත්නායකලාට අමතරව ඉංග්‍රිසි R අකුරෙන් පටන් ගන්නා නම් වෙනත් බොහොමයක්ද ඔහු නිරික්ශණය කලේය. තවදුරටත් පරිස්සමින් කියවද්දි R අකුරෙන් පටන් ගන්නා නම් බොහොමයක මුලට A අකුරෙන් පටන් ගන්නා මුල් නමක්ද ඇතුළත් බව ඔහු නිරීක්ශණය කලේය. ඔහු හයිලයිටරයක් ගෙන එවන් නම් වෙනම සළකුණු කල අතර එම ලැයිස්තුවේ පමණක් නම් 14ක් A සහ R අකුරු සුසං‍යෝගයෙන් සෑදී තිබිණි. ඒ අනුව A (ඇල්ෆා) සහ R (රෝමියෝ) යනු සිංහල මිනිසුන්ගේ නම් බොහොමයක් පටං ගන්නා ජනප්‍රිය අකුරු ද්විත්වයක් බව ඔහු වටහා ගත්තේය.

කිලිනෝච්චියට දකුණින් වූ සංවිධානයේ පාලන ප්‍රදේශ වලට දිගින් දිගටම හමුදා ප්‍රහාර එල්ල වීමට පටන් ගැන්මත් සමඟ සංවිධනය අධික ලෙස බෙහෙත් හා සායනික ද්‍රව්‍ය හිඟයකට මුහුණ දෙමින් සිටියේය. කිලිනෝච්චි දිසාපති කාර්‍යාලයට ලැබෙන වෛද්‍ය සැපයුම් ප්‍රදේශයේ රෝහල් අතර බෙදා හරින අතර ගැටුම් පවතින ප්‍රදේශ වලට කියා විශේෂයක් කිරීමට රතුකුරුස සංවිධානයේ මැදිහත්වීම නිසා නොහැක. බෙහෙත් හා සායනික ද්‍රව්‍ය අඩංගු ලොරි රථය අමු අමුවේ කොල්ල කෑමට සින්න තලේවර්ගේ අණ ලැබුණේ මේ පසුබිම තුලයි. වවුනියාවෙන් මෙහාට මූහමලේ දක්වා ට්‍රක් රථ වලට හමුදා ආරක්ශාවත් මූහමලෙන් මෙහාට රතුකුරුස සංවිධනයේ මැදිහත්වීමත් ලැබන හෙයින් මේ පැහැර ගැනීම වවුනියාවට පෙර හමුදා පාලන ප්‍රදේශයකදීම සිදු කල යුතුයැයි තීරණය විය. ඒ අනුව ඊට රියදුරාගේ සහය ලැබිය යුතුමය. 

මෙහිදී සින්න තලේවර්ගේම යෝජනාවකින් 'මයික් සියරා'ගේ ආයතනයෙන් අදාල අයිතම පිටත් වන දවසක පැහැර ගැනීම සිදු කිරීමටත් ඔහුගේම මිනිහෙක් මේ වැඩේට යොදවන්නටත් යෝජනා විය. මහරගම බස් රූට් එකේ පාතාල ක්‍රියාකාරී ජගත් ගේ රෙකමදාරුව මත මහේෂ් මේ ජාලයට සම්බන්ධ වන්නේ එලෙසයි. නමුත් පැමිණෙන රියදුරාගේ අනන්‍යතාවය මුරපොළවලින් සැඟවිය යුතුය. දේවාගේ 'ඇල්ෆා රෝමියෝ' තියරිය මෙහිදි අත් හදා බැලීමට ඔහුට හැකියාව ලැබේ. නාවික හමුදා සේවයේ යෙදී සිටියදි අතුරුදහන් වූ 'අනුර රත්නායක' නමින් සියළු ලේඛන ලහි ලහියේ සකස් විනි. මහේෂ් හිතුවාටත් වඩා හොඳින් තම කර්තව්‍ය ඉටු කලේය. වවුනියාව හා පූනෑව අතර කැලෑබද පෙදෙසකදී මහෙෂ් ගෙන් අත්‍යාවශ්‍ය සේවා ලොරිය බාරගත් දේවා එය සංවිධානය අතට පත් කොට සුරක්ශිතව මහේෂ්ව යළි කොළඹට පිටත් කර හැරියේය. පහුවදා රටම මෙ පුවතින් කැළඹී යද්දි නොපැකිලව තම රාජකාරි කොටස ඉටුකල හෙතෙම තම බිරිඳ හා ඥාතීන් බැලීමට යාපනයට යාමට සූදානමෙන් සිටියේය. 

නමුත්.. සෑම දිනයකම නියමිත වේලාවකට කෙටි පණිවුඩ හා ඊමේල් පරික්ශා කිරීමට ඔවුන් සංවිධානයට බැඳී සිටී. ඒ අනුව එදිනට නියමිත වේලාවේ තම පෞද්ගලික ඊමේල් ගොනුව පරීක්ශා කල ඔහුගේ මුහුණ විකෘතිව ගියේ යාපනේ ගමන කල් දමා තවත් සංවිධානයේ අත්‍යාවශ්‍ය රාජකාරියකට එදිනම ඔහුට නැවත යෙදීමට අණ ලැබී තිබුණු හෙයිනි. දිසාපතිතුමියගේ සැටලයිට් දුරකතනයට ඇමතුමක් ලබා දුන් ඔහු ඇල්ෆා රෝමියෝ 2 ක්‍රියාන්විතය සැලසුම් කිරීම සඳහා එදිනම කොළඹට සේන්දු විය.

*********************************************

සෙනසුරාදා රාත්‍රියේ ඕඅයිසී මහතාට හා ජයශංකට සාදයක් සූදානම් කරන ලෙස මෙවන්, සෙනෙවිරත්නට උපදෙස් දුන්නේය. ඕඅයිසී මහතා සාදයට සහබාගී නොවන බව කී බැවින් ඔහුට අවශ්‍ය අඩුම කුඩුම නිවසටම සූදානම් කර යවා ජයශංක හා ඔහුගේ සගයාට වෙනම සාදයක් සූදානම් කරන ලදී. සෙනෙවිගේ හා ලෙනාඩ්ගේ නොහොඳ නෝක්කාඩුව හොඳින් දන්නා මෙවන් මෙවැනි තැන් වලට දෙදෙනාම යවයි. ඒ එකෙකුට එකෙක් අවිශ්වාස නිසා ආයතනයට එරෙහිව කිසිදු දෙයක් කතා නොවෙනා බව දන්නා හෙයිනි. එහෙත් ලෙනාඩ්ගේ මත් ලෝලී බව හා සුරුට්ටු ජෝගිය නිසා මෙහෙදී ජයශංක හා තනිවීමට අවස්ථවක් සෙනෙවිට ළඟාවුණි. කලෙකින් ලද අවස්ථාවත්, ජයශංකගේ පෙළබවීමත්, මත් වතුරින් ලද උත්තේජනයත් නිසා සෙනෙවිරත්න ෂෙලීන් හා ඇගේ සේවිකාවන් ගැන සිතූ සිතූ දේ දොඩවන්නට විය. ඇය මෝඩ ගෑණියෙක් බවත්, 'මිනිහාගේ පදේට නටන රූකඩයක්' බවත්, තමා කියනා ඕනෑම දේකට ඈ එකඟ විය යුතුම තත්ත්වයක ඉන්නා බවත්, ඒ ගැන ජයශංකලාට 'පසුව දැනගන්නට ලැබෙණු ඇති' බවත් එය දඩමීමා කරගෙන තමා ළඟදීම මේ ගැහැණිය වසඟයට ගන්නා බවත් ඔහු පාරම්බෑවේය. නමුත් ඊට ස්වල්ප වේලාවකට පෙර ඔහු ඉතා විනීත ලෙස ඈට ඇමතුමක් අරගෙන ජයශංකට කතා කරන්නට සැළස්සුවේය. කතාවෙන් අනතුරුව ජයශංක දුන් ජංගම දුරකථනය උඩ සාක්කුවේ රුවා ගත්තා විනා එය විසන්ධි කිරීමේ සිහියක් ඔහුට නොවූයෙන් එතනින් එහා සිදුවූ කතා බහ එකක් නෑර ෂෙලීන් හා ඇගේ සහායිකාව නිවසේ සිට අසා උන්නාය.. මොන අඩුපාඩුව වැරැද්ද තිබ්බත් ඉතා හොඳ සැමියෙකු වූ මෙවන් කෙරෙහි ස්වාමිභක්තියෙන් සිටි කාන්තාවක් වූ ෂෙලීන් සිය එකම ආරක්ශකයා වූ මෙවන් හට සියල්ල අකුරන් නෑර පසුවදා ඇමතුමක් ලද සැනින් එළි කලාය.. 

"මම මරනවා ඕකව.. වල් පරයා..!"

*************************************

ඊළඟ කොටසින් හමුවෙමු.

ක.මි. 

Check Point..! 6 වෙනි දිගහැරුම

 5 වෙනි දිග හැරුමට..

මරදාන මවුන්ට් මේරි රේල්වේ ඉන්ස්ටිටියුට් එක ඉස්සරහා හෙවනේ තැඹිලි කරත්තයෙන් තැබිලි ගෙඩියක් බී සිගරෙට්ටුවක් දල්වා ගත් මහේෂ් එතනම පිහිටි ගරාදි වැටට බරවිය.. බලාපොරොත්තුවෙන ඇමතුම ලැබීමට තව එතරම් වෙලාවක් නැත.. දකුණතේ රඳවාගත් සිගරෙට්ටුව දෙතොලතර තබමින්ම වම් අතින් සිය කමිස සාක්කුව අතගා බැලූ හේ කුඩා ජංගම දුරකථනය එහි සුරැකිව ඇති බව තහවුරු කරගත්තේය. තැඹිලි ගෙඩියට හා දුම් වැටිය වෙනුවෙන් මුදල් ගෙවා දැමූ ඔහු පාර දෙපස බලා අඩියට දෙකට බේස්ලයින් පාර හරහා පැන විදුලි සංඥා මංසංධිය පසුකර කොළෙන්නාව පාර දෙසට සෙමින් පිය මැන්නේ, එක්වරම කළබලවී තම සාක්කුවේ දඟලන කුඩා දුරකතනය ගෙන එහි අංකය දෙස බලා එය විසන්ධි කර දැම්මේය. එසැණින් ඔහු ඒ අසලම තිබූ වසා දැමු කඩයක පිළට ගොඩවනවාත් සමඟම යළිත් එම අංකයෙන්ම එන ඇමතුමට දෙවරක් නොසිතා සම්භන්ද විය. 

"කෝල් සයින්?"

"ඇල්ෆා රෝමියෝ"

"හෙහ්..හෙහ්.. කොහොමද.. තමුසෙ දැන් සෑහෙන්න හොඳයිනේ.. මම මුත්තවර්"

"මම කොළොන්නාවේ ඉන්නේ.."

"මම බලාගෙන ඉන්නේ අයිසේ.. ඔහොම තව ටිකක් ඉස්සරහට යනව.. ඔව්.. ඔහොම යනව.. මම කියන එක අහගෙනම. ඔය තියෙන්නේ වම් පැත්ත අයිනේ නවත්තල හයිඒස් එකක්.. ඕ.. ආ.. ඕකට නගිනව..."

"මෙතන තව.."

"ආ.. ඒකට කමක් නෑ. මිනිහා තමුසෙගේ හෙට ඉඳල දවස් කීපෙකෙට පාට්නර්. නම ගම විස්තර මොකුත් නොකියා මිනිහගෙන් ඒවා අහන්නෙත් නැතුව ඕනි  දෙයක් කතා කරගත්තට කමක් නෑ. කොහොමත් තරහ කාරයෝ වගේ ඉන්නෙපා ඉන්ඩක්ශන් එකට රෙජිස්ටර් වෙන්න ගියාම. ඔය වාහනේ මහත්තය තමුසෙගෙ ඩොකියුමන්ට් ටික දෙයි. ඇතුලට යන්න කලින් ඒ ටික පොඩ්ඩක් බලා ගන්නව.."

"දුන්න මේ.."

"ගුඩ්.. නම ගම වයස පොඩ්ඩක් බලාගනින්.. අනිත්වා ගැන මොකුත් බයවෙන්න දෙයක් නෑ. රෙජිස්‍ටර් වෙලා ට්‍රේනින් එකට ඉඳලා අද යන්න තියෙන්නේ.. හෙට උදේ එන්න වෙලාවක් කියයි. ඒක අහගන්න. මම රෑට කතා කරන්නම්."

"අද බෝඩිමට නම් යන්න බෑ මට.."

"ආ.. මං ඔය මහත්තයාට කියන්නම්. සල්ලි දෙයි. අද ඔය කිට්ටුව ලොජ් එකක නැවතියං. වැඩිය කැපිල පේන තැනක ඉන්නෙපා. බොන්න පිස්සු කෙළින්න ලෑස්ති වෙන්නත් එපා. උඹට අමුතුවෙන් කියන්න දෙයක් නෑනේ.."

"නෑ.. ඒවා අවුලක්ම නෑ"

"හරි.. එහෙනම් ඔය ටික කරගනිං.. මම රෑට ගන්නම්" මුත්තවර් ද්‍රවිඩ ජාතිකයෙකු උවද ඉතා හොංදින් සිංහල කතා කරතැයි මහේෂ් සිතුවේය.. ඔහු එදා කලබළයෙන් මෙන් එක් වරක් පමණක් දුටුවද ඉතා ප්‍රියමනාප පුද්ගලයෙක් විය. කතාවෙන්ද අනෙකා සැනෙන් අල්ලා ගැනීමට සමත්‍ ය. එහෙත් මේ ඒ කිසිවක් සිතීමට වෙලාව නොවීය. කොළොන්නාව තෙල් ගබඩා සංකීර්ණය අසලින් බැසීමට පෙර අවසන් වරට  මහේෂ් සිය නම යළිත් වතාවක් කියවා මතක තබා ගත්තේය..

"අනුරාධ රූපසිංහ".. හ්ම්ම්..

******************************************

සෙනසුරාදා රාත්‍රියේ යන්තම් අඳුර මෝදුවීගෙන එද්දී සාජන් ජයශංක හා තවත් ඔහුගේ ළඟම හිතවත් සාජන් වරයෙකු වත්තල සෙබස්තියන් පාරේ කෙළවරේ කැළණි ගඟ අසබඩ බෝට් යාඩ් එකට ආවේ අලුත් මිතුරෙකු වන M.S. Direct Distributors ආයතනයේ කළමනාකාර සෙනෙවිරත්න මහතාගේ ආරාධනයෙනි. ස්ථානාධිපතිවරයාටද ආරාධනාවක් කළ නමුදු ඔහුගේ 'රාජකාරී හේතුවෙන් සහභාගී වීමට නොහැකි නිසා බ්ලැක් ලේබල් වර්ගයේ විස්කි බෝතලයක් කලින්ම ඔහුට යවා තිබිණ.. රාත්‍රී අට වන විට ඔහු වෙනුවෙන් සැකසූ අවුල්පත් හා පවුලේ සියළු දෙනාට සෑහෙන ලෙස රාත්‍රී ආහාරය නිවසටම යවන ලෙස වත්තල ප්‍රසිද්ධ හෝටලයකට මුදල් ගෙවා උපදෙස් දුන් සෙනෙවිරත්න මහතා සිය සගයාද කැටුව කළින්ම බෝට් යාඩ් එකට ගොස් සිටියේය.. ඔවුන්ගේ හමුව සඳහා ගඟ අසබඩම නිස්කලංක සමර් හට් එකෙක් සුදානම් වෙමින් පැවතින. ජයශංක ඔහු සමඟ පැමිණි තරුණ සාජන්වරයා හා සෙනෙවිරත්න එකිනෙකාට හඳුන්වා දුන් අතර සෙනෙවිරත්න කැටුව පැමිණි ඔහුගේ සගයා හඳුන්වාදීමට ප්‍රථම ජයශංක විසින් ඔහුව හඳුනාගෙන තිබිණි.

"මේ එහෙ සිකියුරිටි අංකල් නේද?"

"ආ ඔව් ඔව්.. මිස්ටර් ජයශංකට මතකයි නේද? මිනිහා නිකං සිකියුරිටි නෙවෙයි අපේ ඩිරෙක්ටර් සිකියුරිටි.. හෙහ්.. හෙහ්.. මැඩම් ගේ මාමා නේ.."

"ආ..ඔව් මට මතකයි එදා මැඩම් කියුවා.. එක්ස් නේවි නේද කියුවේ?"

"Hey, hey.. I'm too young to be called Uncle by old folks like you.. I'm retired Navy communicator Leonard Croos.. nice to meet you guys"

ප්‍රියමනාප පුද්ගලයෙකු වූ ලෙනාඩ් ඔහුට සුපුරුදු හමුදා විලාශයෙන්ම අනෙකුන්ට ඔහුව හඳුන්වා දුන්නේය. රාජකීය ලංකා නාවික හමුදාව සමයේ පටන් එහි සංඥාකරුවෙකු ලෙස සේවය කොට විශ්‍රාම ලබා සිටි ඔහු ඉතා වියත් ලෙස ඉංග්‍රීසි බාසාව හැසරවීය.

එකිනෙකා හඳුනා ගැන්මෙන් ඉක්බිති සිව් දෙනාම අසල පිහිටි සමර්හට් එක වෙත ගොස් මදුවිත තොලගාමින් අල්ලාප සල්ලාපයෙහි යෙදෙන්නට විය. මදක් වැඩියෙන් දොඩමලු වූ ලෙනාඩ් ආයතනයේ අධ්‍යක්ශවරියට ඔහුගේ ඇති ඥාතීත්වය ගැන වැඩිමනත් පුරසාරම් දෙඩුවේය. සාජන් ජයශංකට ඈ ගැන තවත් තොරතුරු දැන ගැනීමේ අවශ්‍යතාවය ඇති බව පෙණුනත් ලෙනාඩ් ඉදිරියේ සෙනෙවිරත්න යමක් පැවසුවේ බොහොමත්ම කල්පනාවෙන් බව නොබෝ වේලාවකින්ම ජයශංක තේරුම් ගත්තේය.

හෝරාවක පමණ ඇවෑමෙන් ලෙනාඩ් බොහෝ සෙයින් බීමත්ව නන් දොඩවමින් සිටි මුත් අනෙක් තිදෙනාම ඉතා හොඳ සිහියකින් හා පාලනයකින් සිටියහ. මේ අතර ඉස්තරම් වර්ගයේ කියුබානු සුරුට්ටුවක් තම සුරුට්ටු රඳවනයෙන් එළියට ගත් ලෙනාඩ් අනෙක් අයට එය පෙන්වමින් ඒ ගැන විස්තර කරන්නට විය. 

"Anybody want to try an original cuban cigar? This is one of best brands going around.. මට මේක දුන්නේ one of my ex-captain during our last seafarer's get together.." ඔහු එය සාජන් ජයශංක වෙත පෑ නමුත් අතක් ඔසවා සිනහවකින් එය ප්‍රතික්ශේප කලේය. 

"හෙහ් හෙහ්.. you are not lucky enough to smell this.. හෙහ්.. මේක මෙහෙම බීලා බෑ.. හොඳට හුළං වදින තැනක ඉඳලා බොන්නෝනි" කියමින් ලෙනාඩ් සුරුට්ටුව දල්වමින්ම කැළණි ගඟබඩ ගොඩට ඇද තිබූ බෝට්ටුවක් වෙත ගමන් කළේය. ඒ එක්කම වාගේ අනෙක් තරුණ සාජන්ට් වරයාටද දුරකථන ඇමතුමක් ලද හෙයින් ඔහු අනෙක් දෙදෙනාට අතින් සංඥා කොට අවසර පතා ඇමතුමට සම්භන්ද වෙමින් නැගිට ඉවතට ගියෙන් බොහෝ වෙලාවක් බලාපොරොත්තුවෙන් සිටියාක් වැනිව ජයශංක හා සෙනෙවිරත්න එකිනෙකා දෙස බලා අස්වැසිල්ලකින් සිනහාවක් නැගුවෝය..

"ලෙනාඩ් කාරය මරු චරිතේ නේද?" ජයශංක අලුත් කතාවකට අර අඳිමින් සෙනෙවිරත්න විමසුවේය..

"හපොයි.. පම්පෝරිකාරයා.. හොඳයි වැඩක් නැති වෙලාවට කයිවාරුවකට සෙට් වෙන්න නම්.." ඒ සමඟම හඬ මදක් බාලකොට.. "ඔහොම හිටියට හෙන කේලමා.. මෙතන වෙච්චි දේවල් අතිනුත් දාල හෙට මැඩම් ගේ කණේ තියන්නේ. මැඩමුත් මේ වගේ ඒවට ඕකව පටලවල එවන්නෙ ඒකටමයි"

"ඇයි මැඩම්ට සෙනේව ෂුවර් නැත්ද?"

"නෑ..නෑ.. එහෙමමත් නෙවෙයි. ගෑණි බය ඇති මම අත යටින් ගේම් ගහයි කියල.. බිස්නස් වලදි ඔය වගේ ඒවා වෙනවනේ..(මදක් ඉවත බලා සෝපාහාසාත්මකව මෙන්) මම නැතුව කොහොමද එයා මේවා කරන්නේ?" මැඩම් ගැන කතා කිරීමට පොටක් පෑදුණු බව දැනීමෙන් ජයශංක වඩාත් සතුටු විය.

"තමුසෙලාගේ මැඩම් මාර කෑල්ල නේ? ඕ අයි සී මහත්තයත් මගෙන් හාර අවුස්ස අවුස්ස විස්තර ඇහුවා එදා..හෙහ්"

"ඔහො..හෝ.. මට ඒකනම් එදාම තේරුණා. ඕඅයිසී කාරයා ඇඹරුණා ගැරඬියා වගේ ගෑණි දැක්ක ගමන්.. හෙහ් හෙහ්.. ඔහොම ඉන්නව මම තමුසෙට කෝල් එකක් අරන් දෙන්න.. කතා කරන්න ගෑනිට.."

"එපා..එප්..ආ...."

"නෑ..නෑ.. අවුලක් නෑ.. මට කොහොමත් කියුව තමුසෙල ආවම විස්තර කියන්න කියල.."යැයි ඇගේ දුරකතනයට ඇමතුමක් ගත් සෙනෙවිරත්න මොන මොනවාදෝ පවසා දුරකථනය ජයශංක වෙත පෑවේය. ඔහු ගරුසරු ඇතුව මෙන් මුලින් ආමන්ත්‍රණය කලද මද වෙලාවකින් ළඟම මිතුරියක හා සුහද සල්ලාපයක යෙදෙන්නාක් මෙන් සිනහාවෙමින් ඈ සමඟ කතා බහේ යෙදෙද්දී දුම් වැටියක් දල්වාගත් සෙනෙවි සිනහාවෙමින් ඒ දෙස බලා සිටින්නට විය. කතාව අවසන් කල ජයශංක ජංගම දුරකතනය සෙනෙවි අතට දුන් හෙයින් ඔහු ඒ දෙස නොබලා එය උඩ සාක්කුවේ රුවා ගත්තේය..

"මාර ස්වීට් වොයිස් ඕයි.. කතා කරද්දිත් ආසයි.. තමුසේ කොහොමද ඔච්චර ළඟින් ඉඳන් ඉවසන් ඉන්නේ.. හෙහ් හෙහ්.." ඉන්පසු දෙදෙනා අතර ඇතිවූයේ තනිකරම නොහොබිනා කතාවකි.. මත් වතුරින් ගාණට රත්වී සිටි දෙදෙනා වචන වලින් ඈව නිරුවත් කරන්නත් ඈ හා රමණයේ යෙදෙන්නත් එකිනෙකාගේ ඒ විශයෙහි 'ලොකුකම්' කතා කරන්නත් විය. සුරුට්ටු බොන්න ගිය ලෙනාඩ්ට වෙරි මතින් බෝට්ටු ඇණියේම නින්ද ගොස් සිටි අතර දුරකතනයට පිළිතුරු දීම සඳහා ඉවතට ගිය තරුණ පොලිස් නිළධාරියා නැවත එමින් සිටි නිසා පහත් හඬින් මෙසේ පවසා සෙනෙවි ඒ කතාව හමාර කලේය.

"ඔන්න බලපං ජයේ.. මම ඕකිට ළඟදිම ගහලා උඹටත් ගහන්න සෙට් කරේ නැත්නම් මම සෙනෙවි නෙවෙයි.."

*****************************************************

සෙනසුරාදා දිනයේ වැඩිමනත් වේලාවක් කොළඹ තාවකාලික නවාතැනේ රැඳී හුන් දේවා ඉරිදා උදෑසනින්ම සිය නිළරථයෙන්ම ත්‍රිකුණාමලයට යාමට පිටත් විය. ඉරිදා උදයෙන්ම ත්‍රිකුණාමල වරායට ළඟාවීමට නියමිත පර්ල් කෲස් මගී නෞකාවෙන් ඔහුගේ මස්සිනා දර්ශන්, දර්ශන් ගේ පාසැල් මිතුරු කජුමුගන් හෙවත් කජන් සහ තවත් යාපනේ පාසැල් වලින් මොරටුව විශ්ව විද්‍යාලයේ ඉංජිනේරු පීඨයට තේරුණු සිසුන් දෙදෙනෙකු යාපනයේ සිට ත්‍රිකුණාමලයට ළඟාවීමට නියමිතය. නාවික හමුදා ආරක්ශක පටිපාටීන්ට අනුකූලව ඔවුන් සාමාන්‍ය පරිදි 'ක්ලියර්' කොට හමුදා වාහනවලින් ත්‍රිකුණාමල බස් නැවතුම්පොල වෙත ගෙනත් ඇරලන තෙක් සිටියොත් එතනටම දවල් එක දෙක වනු ඇත. එතනින් සාමාන්‍ය බස් රථයක කොළඹ පැමිණීමට ගියොත් මාර්ග බාධක අවහිර මැද මධ්‍යම රාත්‍රිය ආසන්න වන තෙක්වත් ඔවුනට කොළඹට ඒමට නොහැකි වනු ඇත. දේවා මේ පිළිබඳව ඔහුගේ හිතවත් නාවික නිළධාරියෙකු හා කතා කිරීමෙන් අනතුරුව ඔවුන් සිව් දෙනාව මුලින්ම නිශ්කාෂණ කටයුතු සඳහා යොමු කිරීමටත් ඒ කටයුතු අවසන් වූ සැණින් ඔවුන් නාවික තඨාකාංගන ගේට්ටුවෙන් එළියට එවීමටත් එකඟ කරගත හැකි විය. කෙසේ වෙතත් මේ සඳහා අවම වශයෙන් උදෑසන දහය පසුවේ. එතැන් සිට සාමාන්‍ය බස් රථයක ආවත් රෑ හත අට වනතුරු ඔවුන්ට කොළඹට ඒමට නොහැක. මේ හේතුව නිසා උදෑසන 10ට ඔවුන්ව තටාකාංගණ ගේට්ටුව අසලින් ගෙන හැකි ඉක්මණින් කොළඹට රැගෙන ඒමට සිය වාහනයෙන් ත්‍රිකුණාමලයට යාමට දේවා යොදා ගත්තේය.

කෙසේ හෝ අද දිනය තුල මොවුන් සිව්දෙනා වැල්ලවත්තේ අලුතින් කුළියට ගත් මහල් නිවාසයේ 'සෙට්ල්' කර දේවා හෙට උදේම නැවත කිලිනෝච්චි යා යුතුය. නිවස ගත් නිසාත් තමා අද කොළඹ සිටින නිසාත් හදිසියේම මොවුන් අද කොළඹ ගෙන් වූයෙත් දේවාගේම උවමනාවටයි. කැම්පස් පටන් ගැමීමට තව සතියක කාලයක් තිබුණද ඒ සතිය තුල දකුණේ ජීවිතයට ඔවුන් හුරුවී සිටීම යහපත් බව දේවා සිතුවේය. අනිත් තිදෙනා කෙසේ වෙතත් දර්ශන් කෙරෙහි දේවාගේ විශේෂ වගකීමක් පවතී. ලේ නෑ කමෙන් මෙන්ම විවාහයෙන්ද තමාගේ මාමණ්ඩිය වූ ඉලෙයිරාජා මහතා මියයාමට මත්තෙන් සිය එකම පුතණුවන්ගේ අනාගතය දේවාට බාර දුන්නේ මහත් වූ විශ්වාසයකිනි. ඉතා දක්ශ කඩවසම් තරුණයෙකු වූ දර්ශන් උසස්පෙළ කඩයිම ඉහළින් සමත්වී විදුලි හා විද්‍යුත් ඉංජිනේරුවෙකු වීමේ අරමුණින් මොරටුව විශ්ව විද්‍යාලයට තේරී පත්වී සිටී. 

හබරණ තානායමෙන් උදේ ආහරයද ගෙන තව දුරටත් ත්‍රිකුණාමලය දෙසට ඉදිරියට ආ දේවා හතරැස්කොටුව ප්‍රධාන හමුදා මාර්ග බාධකයේදි සිය හැඳුනුම්පත පෙන්වා වාහනය පසෙකට කොට නතර කලේය. මෙහි අළුතින් පත්ව ආ ස්ථාන බාර නිළදාරිවරයා පෙර වන්නි කළාපයේ සේවය කළ අතර කිහිප වරක් දේවාට හමුවී ඇත. ආපසු ඒමේදි යාපනේ ද්‍රවිඩ තරුණයින් හතර දෙනා මෙම ස්ථානයේ ලියාපදින්චි කළ යුතුයි. ඒ කටයුතු පහසු කරගැනීමට මේ නිළදාරියා හමුවී පෙර හිතවත්කම් අලුත් කරගතයුතුයැයි දේවා සිතුවේය.

අදාළ නිළධාරියා හමුවී තමාව හඳුන්වාදුන් පසු ඔහුව හඳුනාගත් නිළධාරියා දේවාව සුහදව පිළිගත්තේය. දේවා තමන්ගේ අවශ්‍යතාවය කෙළින්ම ඔහු වෙත ඉදිරිපත් කලේය.

"ඩොකියුමන්ට් ක්ලියර් නම් කිසි ප්‍රශ්ණයක් නැතුව රෙජිස්ටර් කරගෙන යන්න පුලුවන් මිස්ටර් දේවනායගම්"

"නෑ නෑ.. එහෙන් පොලිස් ක්ලියරන්ස් අරගෙන අයිඩී කාඩ් ඔක්කොම අරගෙන එන්නේ. කැම්පස් එකේ කැඳවීමේ ලිපියත් තියෙනව. මම වැල්ලවත්තේ ගෙදර ලෑන්ඩ් ලෝඩ්ගෙන් ලියුමක් අරගෙන කොල්ලො හතර දෙනාගෙ නම් දාල පොලිසියෙන් කවුන්ටර් සයින් එකකුත් ගෙනත් තියෙන්නේ. මම බැලුවේ මේ.. මම ආපහු හෙට උදේම කිලිනොච්චි යන්නත් ඕනි නේ.."

"ආ.. ඔය තියෙන්නේ ඕනි කරන ඔක්කොම.. ඔයා ඉතින් එසෙන්ශල් සර්විස් එකේ නිසා ඔය ගැන හොඳටම දන්නවානේ.. ආපහු එනකොට මට පොඩ්ඩක් කියන්නකො. හදිසියේ මම ස්ටේශන් එකෙන් පිට හිටියොත් සෙට් එකේ ගන්න කියල චෙක් පොයින්ට් එකේ සාජන්ට් ට කියන්න.. මම පරක්කු නොවී වැඩේ කරවලා දෙන්නම්.."

ඔවුන්ගේ කතාව අතරතුර ඛනිජ තෙල් සංස්ථාවට අයත් රතු පැහැති තෙල් බවුසර් විශාල ප්‍රමාණයක් කඩින් කඩ පැමිණ මුරපොළේ නවත්වා 'ක්ලියරන්ස්' ගෙන ත්‍රිකුණාමලය දෙසට පිටව යනු දෙදෙනාම නිරීක්ශණය කලේය.. දේවා ඒ දෙස උනන්දුවෙන් බලා සිටිනු දුටු නිළධාරියා..

"ඔයාලගෙ බඩු.." යනුවෙන් සිනාසී පැවසීය.

"ඔව්. මම පෙරේදා ඕවයේ ඩොකියුමන්ට් වැඩ වලටත් හෙල්ප් කරා..තව සති දෙකකින් අපිට එන්නේ. මේ දවස්වල එහෙ තෙල් නිකං රත්තරං වගේ.." යයි සිනහාවෙමින් ඊට පිළිතුරු දුන්නේය. අවසන් බවුසරයද පිටව ගොස් සුළු වේලාවකින්..

"මම එහෙනම් ගිහින් එන්නම්.. දහය වෙනකොට ඩොක්යාඩ් ගේට් එක ගාව ඉන්නෝනි. නැත්නම් කොල්ලො ටික අනාථ වෙනවා.." කියා හමුදා නිළධාරියාට සමුදී දේවා සිය රථයේ නැගී වේගයෙන් ඉගිල ගියේය.

***********************************************

හතරැස්කොටුව මාර්ග බාධකයේදි සියලු ලිපිගොනු ඉදිරිපත් කර ලියාපදිංචි වූ මහේෂ්  නැවත සෙමෙන් සෙමෙන් බවුසරය පාරට ගෙන හබරණ කන්තලේ මාර්ගයේ ධවනයේ යෙදෙන්නට විය. ඔහුට පිටුපසින් තව එක බවුසරයක් පමණක් පැමිණීමට නියමිතය. ඔහු පිටත්වන විටත් එය ලියාපදින්චිය සදහා එහි පැමිණ තිබූ හෙයින් ඔහු එය දක්නට ලැබෙන තුරු මදක් සෙමින් ධාවනයේ යෙදිනි.  

අලුත්ඔය හරියේ සිට කිතුල්උතුව දක්වා තද පාලු ප්‍රදේශයකි. දෙපස ඝන කැලෑව මීටර් දෙසීයක් පමණ පාරෙන් ඔබ්බට කපා දමා එළිකර ඇත්තේ හමුදා වාහන වෙත එල්ලවෙන ක්ලේමෝ බෝම්බ ප්‍රහාරයන්ගෙන් වැළකීමටයි. තැනින් තැන පිහිටි හමුදා අනුඛන්ඩ හැර වෙනත් මිනිස් වාසයක් ඇස නොගැටේ. තැනින් තැන කඩතොළු වූ පාරේ ලීටර් දාහතරදහසක් පෙට්‍රොල් රැගත් දැවැන්ත බවුසරය ඕනෙවාට වඩා වේගයෙන් හෝ හෙමිහිට පැදවීම පහසු නොවේ. කෙසේ නමුත් මහේෂ් හැකි අවම වේගයෙන් පදවාගෙන යද්දි කිතුල්උතුව ආසන්නයේදි පිටුපසින් එන බවුසරය පැති කණ්නාඩියෙන් දක්නට ලැබිණි. ඉදිරියෙන් යන කිසිදු බවුසරයක සේයාවක්වත් පෙනෙන්නට නැත. 

මහේෂ්ලා අග්බෝපුර කුඩා කඩමණ්ඩිය පසුකරද්දි වේගයෙන් පැමිණි සුදු පාට වර්ගයේ ජීප් රථයක් ඔවුන් පසුකර ඉදිරියට ධාවනය විය. සියල්ල හොඳින් සිදුවේ. බර වාහන කන්තලේ වැව් බැම්ම උඩින් ධාවනය නොකරන නිසා මහේෂ් බන්ටෙකට පෙර තුන්මන්හන්දියෙන් කන්තලේ නගරය දෙසට බවුසරය හරවා ධාවනය කළේය. ඔහුට මීටර් සියයක් පමණ පිටුපසින් අනෙක් බවුසරයද පැමිණේ. කුඹුරුයාය මැදින් දිවෙන පාර ඉතා අලංකාරය. ඔවුන්ට බොහෝ ඉදිරියෙන් කන්තලේ නගරය ආසන්නයේ ඉදිරියෙන් යන බවුසරයක් දැකගත හැකිවූ අතර සුලු වේලාවකින්ම එය නගර මධ්‍යයයේ ගොඩනැගිලි අතර නොපෙනී ගියේය. ඊට පිටුපසින් සුදු පාට ජීප් රථය ධාවනය වනු කඩින් කඩ පෙනේ. පොතන්කාඩු මංසංධියට පැමිණි මහේෂ් කන්තලේ නගරය හරහා ත්‍රිකුණාමලය දෙසට දිවෙන පාරේ ඈතින් පෙනෙන ප්‍රාදේශීය සබා ගොඩනැගිල්ල දෙස බලා සුසුමක් හෙලා සැණෙකින් දකුණට හරවා අල්ල කන්තලේ මාර්ගය දිගේ බවුසරය පදවන්නට විය. ඒ පසුපසින් දෙවන බවුසරයද එම මාර්ගයේම ධාවනය කරවන්නට යෙදුන අතර ඒ ආසන්නයේ මාර්ගයක් අයිනේ වාහනයක හුන් පුද්ගලයෙකු සිය ජංගම දුරකතනයෙන් කෙටි පණිවුඩයක් පුද්ගලයින් කිහිප දෙනෙකු වෙත මුදා හැරියේය.

"Operation Alpha Romeo ii successfully done"

************************************************************

පසු සටහන..

"ඉන්ඩක්ශන් එකට රෙජිස්ටර් වෙන්න ගියාම"- Induction- යම් ආයතනයක මූලික නීති හා ආරක්ශක විධිවිදාන ගැන ආරම්භයේදි ලබාදෙන පුහුණුව- රියදුරෙකු ලෙස තාවකාලිකව සේවයට එක් වීමට පෙර මෙලෙස ලියාපදින්චි වී පුහුණුව ලැබිය යුතුය.

"retired Navy communicator" - නාවික හමුදාවෙන් විශ්‍රාම ගත් ත්තියෙන් සංඥාකරුවෙකු ලෙස සේවය කල අයෙක්. අනෙක් සාමාන්‍ය නැවියන්ට වඩා සංඥා අංශයේ නැවියන් පහසුවෙන් ඉංග්‍රිසි බාසාව හසුරවයි.

"රාජකීය ලංකා නාවික හමුදාව සමයේ"- Royal Ceylon Navy- 1972 ට පෙර ශ්‍රී ලංකා නාවික හමුදාව මේ නමින් හැඳින්විනි. 

 "Alpha Romeo"- කථන සංඥා භාශාවෙන් ඉංග්‍රිසි හෝඩියේ A අකුර alpha ලෙසත් R අකුර romeo ලෙසත් කියවයි. 

පසු පසු සටහන..

ඉතා කාර්‍යබහුල වුවත් ප්‍රීතිමත්ව ගතවූ මාර්තු මුල් සතිය තුල කතාව ලිවීම මඟහැරීම පිළිබඳව මාගේ බලවත් මෙව්වා එක.. නැවතත් (කෙළවෙනකං) කතාව සුපුරුදු වේගයෙන් හා රිද්මයෙන් ඉදිරිපත් කරනබව මෙහිලා පොරොන්දු වෙමි. ස්තූතියි!

ක.මි.