Sunday 26 March 2023

Check Point..! 9 වෙනි දිගහැරුම

8 වෙනි දිග හැරුමට..


ගත වෙලා ගත් සීතළ සුළන් දහරට ඉහළින් පාවී ආ ඉමිහිරි කුරුළු නාදයකින් මහේෂ්ගේ නින්ද බිඳුණේය.. පොරවාගෙන සිටි සරමට තවත් මදක් ගුළිවී ඔහු එහි මිහිර විඳ ගැනීමට තැත් කළද ඒ හා සමඟම යම් කිසි බියකරු සිතුවිල්ලකින් ඔහුගේ ගත හී ගඩු පිපී ගියෙන් ඔහු එකවරම අවදිව එතෙක් වේලා නිදා උන් ලී මැස්සේ උක්කුටියෙන් ඉඳ ගත්තේය.. පෙරදා උදෑසන සිට මේ දක්වා වූ කිසිසේත් බලාපොරොත්තු නොවූ ආකාරයේ සිදුවීම් මාලාව චිත්‍රපටයක් සේ ඔහුගේ මනසේ ඇඳෙන්නට විය. ඔහු මුලින්ම කලේ නමක් ගමක් නොදන්නා තම ගමන් සගයා කොහේදෝ යන්න සොයා බැලීමයි. තමා පයලා උන් පැත්තේ වූ තවත් ලී මැස්සක ඔහු වකුටු වී ඉඳගෙන සිටියි. ඔහුගේ පෙනුමෙන්ම ඔහු ඊයේ රාත්‍රිය පුරාවටද හරිහැටි නින්දක් ලබා නොමැති බව එක බැල්මෙන්ම මහේෂ් වටහා ගත්තේය. තමාටත් වඩා වැඩිමහලු මේ පුද්ගලයාගේ බියපත් මුහුණ දුටුවිට මහේෂ්ට ඔහු ගැන මෙන්ම තමා ගැනද අනුකම්පාවක් ඇතිවිය.

තමාගේ හිසට පිටුපසින් උගුරේ රැල්බුරුල් හරින වැඩිහිටියෙකුගේ හඬින් මහේෂ් ආපිට හැරී බැලුවේය. ඊයේ සවස් කාලයේ සිට මහේෂ් හා ඔහුගේ සගයාගේ නියමුවා ඔහු පිටුපසින් සිටගෙන සිටියේය. වඩා තරුණ ඔහුගෙ සහයකයා අත රැඳි තුවක්කුවද සමඟ විමසිල්ලෙන් වටපිට බලමින් ඔහු අසලින්ම විය. 

"යේ.. මල්ලි.. අපි දෙන් යෙන්න ඕනි.." දෙමළ ඌරුවට උවත් පැහැදිලි සිංහලෙන් ඔහු මහේෂ් අමතා කියා සිටියේය. ඒ සමඟම මහේෂ් හා නාඳුනන සගයා සිය සන්තකයේ වූ එකම වස්තුව වූ කුඩා ගමන් මළු දෙකද රැගෙන නැගී සිටියහ. නැවත මිනිස් වාසයලට පා තබන තුරු මොවුන්ගේ අණට කීකරුව සිටීම හැර වෙනත් විකල්පයක් මහේෂ්ලාට නොවේ. එහෙත් ඔවුහු මෙතෙක් වෙලා මහේෂ්ලාට කිසියම් ගෞරවපූර්වක බවකින් සැළකුවා විනා වෙනත් බලපෑමක් කරේ නැත. ඊයේ බවුසර් රථ දෙක චුන්දකාඩු කැලය මැදින් වූ මාර්ගයේ ටික දුරක් දාවනය කරද්දි අතරමඟ දැමූ කැලෑ කොළ අතු බාධකය අසල නතර කල මොහොතේ පටන් බවුසර් දෙකේ මෙන්ම මහේෂ්ලාගේ ජීවිතවල වගකීමද ඔවුන් අතට ගන්නා ලදී. නතර කල බවුසර් දෙකට ගොඩවූ සන්නද්ධ සාමාජිකයෝ ඒ අසළින්ම කැලෑව තුලට වූ මාර්ගයේ වාහන දෙක ධාවනය කිරීමට අතින් සංඥා දුන්හ. නිසි මාර්ගයක් නොවුනත් ඝන කැලෑව තුල ඔවුන් පෙන්වූ මාර්ගයේ මීටර් දෙතුන් සියයක් ඇතුළට අපහසුවකින් තොරව දැවැන්ත බවුසර් දෙකම ධාවනය කල හැකි විය. අනතුරුව හොඳින් ඉඩ කඩ තිබූ නමුත් ගස් සෙවනින අඳුරු වූ ප්‍රදේශයක වාහන නවත්වා ඉන් බැස ඔවුන්ගේ එකෙකු අනුගමනය කරමින් එන ලෙස රියදුරන් දෙදෙනාට ඉඟි කරනු ලැබීය. 

වාහනයෙන් බැස යාමට මත්තෙන් මහේෂ් තමන්ට අයත් ඇඳුම් බෑගය ගෙන එය පිටේ රුවා ගත්තේය. ඒ වනවිටත් එම ස්ථානය ඇවිස්සුණ කඩි ගුලක ස්වරූපය ගෙන තිබුණි. විව්ධ ප්‍රමාණයේ යකඩ ටැංකි ට්‍රේලරයේ සවිකරගත් ට්‍රැක්ටර් පහක් හෝ හයක් එහි වූ අතර තුන් දෙනෙකු පමණ ලහි ලහියේ බවුසරවල පොම්ප ක්‍රියාත්මක කරමින් එහි වූ ඉන්ධන එම ට්‍රැක්ටර් ටැංකි වලට නැවත පුවරන්නට කටයුතු කළහ. තවත් පිරිසක් අවි ඇතැතිව වට ආරක්ශාවක් සැපයූහ. සියල්ළෝම තමන්ට අයිති රාජාකාටිය හොඳින් දැන සිටි බවක් පෙණුනු අතර කෑ ගැස්සිමට හෝ අණ දීමට අවශ්‍යතාවයක් එහි නොවීය. මහේෂ්ට හා ඔහුගේ සගයාට පිටුපසින් එන ලෙස සන් කළ අයෙක් ආරක්ෂාව වෙනුවෙන් සිටි තුවක්කුකරුවන්ගේ වටයෙන් ඔබ්බට ඔවුන් රැගෙන ගොස් බවුසර් පෙනෙන නොපෙනන මානයේ වූ අඳුරු හෙවනක කොටයක් මත වාඩිවී සිටි පුද්ගලයෙක් වෙත ඔවුන් පමුණුවාලූයේය.

නොඋස්-නොමිටි මධ්‍යම ප්‍රමාණයේ හොඳින් වැඩුණු කාලවර්ණ දේහදාරියෙක් වූ ඔහු යුද හමුදා ඇඳුම වැනි වූ සම්පූර්ණ කැළෑ ඇඳුමකින් සැරසී සිටි අතර ඉණේ පිස්තෝලයක් හා පතුරම් වැල් දෙපටක් දරා සිටියේය. ඔහු ආසන්නයේම වාගේ තවත් හැඩි දැඩි පුද්ගලයින් දෙදෙනෙකු ස්වයංක්‍රීය ගිනි අවි දරමින් දෙපස විමසිල්ලෙන් බලමින් සිටි නමුත් මහේෂ්ලා දෙස නිකමටවත් හැරී නොබැලූහ. නායකයා යැයි සිතිය හැකි පුද්ගලයා මහේෂ්ලා ඉදිරියට පැමිණ ඔවුන්ගේ අත් අල්ලා උරහිසට තට්ටුවක් දමා දෙමළ බසින් ඔවුන්ව කැටුව ආ පුද්ගලයාට යමක් පැවසීය.

"අපේ රමේෂ් මාස්ටර් කියනවා යේක ඔයාලා හොඳට වැඩේ කරා තැන්කියු කියලා. මෙතනින් එයාට ඔයාලගෙ වැඩේ ෆිනිශ්. අපි ඔයාලව සේෆ්ලි කැලෙන් එළියට ගිහිල්ල දානව.. යේකට දවස් දෙක ඕ තුනක් තමයි යනවා. ඒ ටිකේ අපි කියන එක අහලා ඉන්න බයවෙන්න එපා කියලා.." ඊයේ පිටත්වූ මොහොතේ පටන් හිතේ වූ වික්ෂිප්ත බවක් පහව ගියාවූ වන් හැඟීමකින් මහේෂ් ස්තූතිපූර්වක සිනාහවකින් ප්‍රථම වරට නන්නාදුනන මේ පුද්ගලයින් දෙස බැලූ අතර ඔහුගේ සගයාගේද බලාපොරොත්තු සහගතවූත් එහෙත් බියපත්වූත් දෑස හා ද මොහොතකට එකිනෙක ගැටුණේය. 

රමේෂ් මාස්ටර්ගේ විධානයෙන් සිංහල කතාකල වැඩිහිටි පිරිමියා සහ තවත් තරුණ සටන්කරුවෙකු සමඟ මහෙෂ් ලා එවලේම එම ස්ථානයෙන් පිටත් කර හරිනු ලැබීය. පිටත් වීමට ප්‍රථම ඔවුන් දෙදෙනාගේ මලු වලට චීස්, චොකලට් වර්ගයක් හා තවත් ටොෆී වැනි යමක් අඩංගු පාර්සලය බැගින් දමන ලදී. මගදී දැන ගත් තොරතුරු වලට අනුව එම චොකලට් වර්ගය එක වරක් කෑමෙන් සම්පූර්ණ දිනක ආහාර අවශ්‍යතාවය පිරිමසා ගත හැකි ශක්තිජනක ආහාරයකි. එමෙන්ම වැඩිහිටි ආරක්ශකයා වන සං‍රක්ශන දෙපාර්ථමේන්තුවේ කැලෑ ආරක්ශකයෙකු ලෙස කාලයක් සේවය කල අයෙකු බවත් නැගෙනහිර ප්‍රදේශයේ කැලෑ ගැන හසළ දැනුමක් ඔහු සතු බවත් මහේෂ් තේරුම් ගත්තේය. ඒ වැඩිහිටි පුද්ගලයා මුලින්ද, මහේෂ් හා ඔහුගේ අනෙක් රියදුරු සගයා ඊළඟට පිළිවෙළින්ද තුවක්කුව ගත් සටන්කරුවා අවාසානයටද ලෙස ඝණ කැලෑව මැදින් වූ පටු අඩි පාරවල් හා සතුන් ගමන් කළ මං ඔස්සේ ඔවුන් පැයක පමණ වේලාවක් ගමන් කිරීමෙන් අනතුරුව යම්කිසි එළිමහන් පෙදෙසකට පැමිණියහ. 

තවත් මීටර සියයක් හමාරක් පමණ ලඳු කැලෑ පෙදෙසකින් එතෙර වූ ඔවුහු එක්වරම මෙන් ඉතා රමණීය ජලාශ්‍රිත එළිමහනකට සේන්දු වූහ. තැනින් තැන දූපත් මෙන් පෙණුනු කැලෑවෙන් වැසුණු ගොඩබිම් කොටස් අතර එකහෙලා පැතිරගිය නිදහස් ජල තලය මත තැනින් තැන මුවන්, ගෝණුන්, වල් ඌරන්, කුළු මීමුන් මෙන්ම ඈත ඉසව්වක අලි රංචුවක්ද නොයෙක් වර්ගවල කුරුල්ලන් දහස් ගණනක්ද නිදහසේ දිය කෙළිමින් උන්හ. සංවිධානයේ දෙදෙනා විසින් 'විල්ලු' ලෙස හැඳින්වූ මෙම බූමියේ පිරිසිදු දියකඩකින් මුහුණ අතපය දොවාගත් පිරිස ඒ අසල සෙවනක මදක් වේලා ගිමන් හැරියෝය.. අහස සහ බැස යන හිරු දෙස විමසිලිමත්ව බැලූ කන්ඩායම් නායකයා යළිත් ගමනට ඉස්සර වූයෙන් පිරිස ආ පිළිවෙලින් ඔහු පස්සේ වැටුණෝය. විල්ලුව අසළ තණබිම් අයිනෙන් හා සමහර විටෙක ඉණ තෙක් වතුරේ බසිමින්ද එළිමහන් බිම්කඩ පසුකල ඔවුහු තවත් පැයක හමාරක ගමනකින් පසු ඊයේ රාත්‍රීයේ රැය පහන් කල මෙම කැලෑ මඩුවට පැමිණියහ. 

"යේ.. මල්ලි.. අපි දෙන් යෙන්න ඕනි.." දෙමළ ඌරුවට උවත් පැහැදිලි සිංහලෙන් ඔහු මහේෂ් අමතා කියා සිටියේය. ඒ සමඟම මහේෂ් හා නාඳුනන සගයා සිය සන්තකයේ වූ එකම වස්තුව වූ කුඩා ගමන් මළු දෙකද රැගෙන නැගී සිටියහ. "ඊයෙ රෑ ඔයාලට ශෑහෙන මහංශි කියල නිසා මෙතන හිටියේ.. මෙතන එහා පැත්තේ මාවැලි ගඟ.. අපේ බෝට්ටුව තමයි තියෙනව.. යේකෙන් අපි යනවා ශෝමාවතී පංසල.. දන්නවද.. ඒ කිට්ටුවට.. එතන තැනකදි ගඟ දෙකට තමයි බෙදෙනව.. එතන ඉන්දල පයින් තමා.. රෑට තමයි ගමන ලේශි. එතකොට ලොකු කැලේ යන්නෝනි නෑ. දවාලේ ගියොත් ලොකුම කැලේ මැදින් තමයි යන්න වෙනව.. බලමු ගීන් ලේශිම විදිය.."

**************************************************

සඳුදා උදය වරුවේ එකොළහට පමණ වත්තල හේකිත්ත පාරේ MS Direct Distributors ගබඩා සංකීර්ණය වෙත පැමිණි කොළඹ මූල්‍ය අපරාධ විමර්ශණ අංශයේ නිළධාරීන් දෙදෙනෙකු විසින් චෙක්පත් වංචාවක් සම්බන්ධයෙන් අලුතින් ලැබුණු පැමිණිල්ලකට අනුව එහි කලමණාකාර සෙනෙවිරත්න මහතාව ප්‍රශ්ණ කිරීමෙන් අනතුරුව වැඩිදුර විමර්ශනය සඳහා අත්අඩංගුවට ගත යුතු බව දන්වා සිටියහ. ආයතනය තුලදී සිදුකරනු ලබන අත් අඩංගුවට ගැනීමක් නිසා හා එය ආයතනයට සම්බන්ධ චෝදනාවක් නොවන නිසා තමන්ගේ නීතිඳ මහතාගේ සහය ලබාගතයුතු බවට ෂෙලීන් මහත්මිය විසින් යෝජනා කිරීම නිසා ඔවුහු නීතිඥ මහතා පැමිණෙන තුරු මදක් රැඳි සිටියහ. ෂෙලීන් මහත්මියගේ කැඳවීමෙන් නොබෝ වේලාවකින්ම එහි පැමිණි නීතිඳ මහතා හා සාකච්ඡාවෙන් අනතුරුව ඔවුහු සෙනෙවිරත්නවද කැටුව පිටත්ව ගියහ. අත් අඩංගුවට පත්වී පිරත්ව යාමට මත්තෙන් සෙනෙවිරත්නට මෙවන් සේනානායකගෙන් දුරකථන ඇමතුමක් ලැබිණි.

"උඹ වරෙන්.. අපිට තව බේරගන්න ගණුදෙනුවක් තියෙනවා"

එදිනම සවස් වරුවේ හදිසියේම රෝහිත පෙරේරා නියෝජ්‍ය අමාත්‍යවරයා MS Direct Distributors ආයතනය වෙත පැමිණියේය. පරිවාර රථ දෙකකින් පැමිණි ආරක්ශක නිළධාරීන් ගබඩා සංකීර්ණය තුලත් ඉන් පිටතත් ලහි ලහියේ ස්ථානගත වෙද්දී රෝහිත පෙරේරා කෙළින්ම ෂෙලීන්ගෙ කාමරයට ඇතුළු වී ඇය ඉදිරියේ අසුන් ගත්තේය. ෂෙලීන්ගේ එක බැල්මකින්ම ඇගේ සේවිකාවන් දෙදෙනා කාමරයෙන් පිටතට ගිය පසු රෝහිත පෙරේරා ඇයව ආමණ්ත්‍රණය කළේය. 

"ෂෙලීන්, මම කෙළින්ම කියන්නම්.. මේ මෙවන්ගේ වැඩ නිසා මට ඇමතිකමත් ගහලා ගිහින් හිරේ විලංගුවේ වැටෙන්න වෙලා තියෙන්නේ.."

"ඇමතිතුමා මේ......"

"ඇති. මට එක්ස්ප්ලනේශන් ඕනි නෑ. ෂෙලීන් දන්නවනේ මම පොලිටික්ස් කරන්නේවත් බිස්නස් කරන්නේවත් අමුතුවෙන් ඉගෙන ගන්න නෙවෙයි කියලා.. මෙවන් ට මම බිස්නස් එකේ සබ් එකක් බාර දුන්නේ ලොකු විශ්වාසෙකින්.. තාත්තා මොනම විදියකින්වත් කැමති වුනේ නෑ මෙවන් මේවට ගාව ගන්නවට.. ඒත් මම.."

"අපි දන්නවා ඇමති තුමා..."

"දන්නවනම් මොන මඟුලක්ද ගෑණියේ මේ යකා මේ කරන්නේ? මූ හදන්නේ ඌත් ගස් ගිහින් මාවත් ගස් යවන්නද?" ෂෙලීන් බලාපොරොත්තු නොවූ අයුරින් රෝහිත පෙරේරා එකවර ගුගුරා හැලෙන්නට වූයෙන් ඈ බොහෝ සෙයින් තැතිගත්තාය.

"රයිට්.. කතාව මෙච්චරයි.. තමුන්ට තවදුරටත් සැම්සන් පෙරේරා බ්‍රෑන්ඩ් නේම් එක යටතේ බිස්නස් කරන්න ඕනි නම් ෂෙලීන් මීට පස්සේ මෙවන් කියන දේ නෙවෙයි. මම කියන දේයි කරන්න ඕනි. කොහොමත් මෙවන් ට තියෙන කේස් එක්ක තව අවුරුද්දකටවත් ඇප ගන්න බෑ. ඇප දීලා එළියට ගන්නත් බෑ මිනිහගේ ආරක්ශාව සලස්සන්න බැරි නිසා ඊට පස්සේ. ඉක්මණට බලලා මෙතනට අලුත් මැනේජර් කෙනෙක් ගන්නව. කොළ කෑලි වල සුදුසුකම් තියෙන පුටු රත් කරන උන් වැඩක් නෑ. කියුවහම වැඩක් හරියට කරන්න පුලුවන් විශ්වාසවන්ත මිනිහෙක් හොයා ගන්නව. ඒ ඇති. ඊට පස්සේ මම කියන්නම් වැඩ වෙන්නෝනි විදිය."

"ඔව්. දැන් කවුරුහරි ගන්න වෙනවා අද සෙනෙවි වත්..." ෂෙලීන්ට සිය වාක්‍යය අවසන් කිරීමට නොලැබිණි. 

"ආයේ සෙනෙවියෙක්ගෙන් වැඩක් නෑ.. ඌ ආයේ මේකේ පස් පාගන්න එන්නේ නෑ. ඇයි තමුසෙටත් ඕනි ඌට කියලා..." රෝහිත පෙරේරා කියූ අසික්කිත කතාවෙන් ෂෙලීන් ලැජ්ජාවෙන් හිරි වැටී ගියාය. එහෙත් රෝහිත පෙරේරා යනු කවුදැයි හොඳින්ම දන්නා නිසා ඈ කිසිත් නොකියා බිම බලා ගත්තාය. 

"හරි.. ආයේ මට කියන්න තියන්න එපා.. මෙවන් එතන ඉඳියි ආරක්ශිතව තමුන් මෙතන මට ඕනි විදියට වැඩ ටික කරගෙන යනකම්.. මතකනේ. මේ හැම මඟුලම උගේ කණේ තියන්නත් එපා. කියන්නේ මොකක්ද කියලා විතරක් අහගෙන ඉන්නවා. ඒත් කරන්න ඕනි දේ එපා දේ තීරණය කරන්නේ මම. මැනේජර් කමට මොකෙක් හරි විශ්වාසවන්ත එකෙක් හොයාගත්තම මට කියනවා" යි පැවසූ රෝහිත පෙරේරා වේගයෙන් පුටුව පස්සට වීසිවී යන ලෙස නැගිට යන්නට ගියේය. 

හමුවෙමු තවත් කොටසකින්..

ක.මි. 

Wednesday 22 March 2023

Check Point..! 8 වෙනි දිගහැරුම

7 වෙනි දිග හැරුමට..


සඳුදා උදෑසන ආරක්ශක කවුන්සිල රැස්වීමට යාමට ප්‍රථම ජාතික බුද්ධි තොරතුරු කාර්‍යාංශයේ ප්‍රධානී මනමේන්ද්‍ර මහතා මහා උභතෝකෝටිකයක පැටලී සිටී. දින 3කට ප්‍රථම වන්නි එකාබද්ධ මෙහෙයුම් ප්‍රධානීගේ රහස් වාර්ථාවට අනුව සැකසූ බුද්ධි තොරතුරු සාරාංශයක් ඔහුගේ එක අතක වෙයි. අනෙක් අතේ ඇත්තේ පෙරදා රාත්‍රියේ නැගෙනහිර ඒකාබද්ධ හමුදා ප්‍රධානීගෙන් ලැබුණු අලුත්ම රහස්‍ය වාර්ථාවයි. ඊට අනුව පෙරදා ත්‍රිකුණාමලයේ මුදා නොගත් ප්‍රදේශ වෙත අත්‍යාවශ්‍ය සේවා ලේබලය යටතේ ප්‍රවාහනය කරන ලද පෙට්‍රොල් බවුසර දෙකක අතුරුදහන් වීමේ සිදුවීමයි. 

වාර්ථාවේ දෙවන අලුත් කිරීමට අනුව අතුරුදහන් වූ බවුසර් දෙක අල්ල කන්තලේ මාර්ගයේ සූර්යපුර විශේෂ කාර්‍ය බළකා කඳවුරට සැතපුම් කීපයක් මෙපිටින් චුන්දකාඩු ඝන වනය තුලින් දිවෙන මාර්ඝයේ මදක් කැලය ඇතුලට වෙන්න තිබී හමුවී ඇති අතර පරීක්ශා කිරීමට යාමේදී එක බවුසරයක් පිපිරී යාමෙන් විශේෂ කාර්‍ය බළකායේ පුද්ගලයින් තිදෙනෙකු ජීවිතක්ශයට පත්වී තවත් පුද්ගලයින් 14 දෙනෙකු තුවාල ලබා ඇත. කළබලයට පත්වූ සෙබළුන්ගේ වෙඩි තැබීම නිසා දෙවන බවුසරයද පිපිරී විනාශ වී ගොස් ඇති අතර විනාශ වූ බවුසර් ආසන්නයේ දැවි අලුවී ගිය පුද්ගලයින් දෙදෙනෙකුගේ සිරුරු කොටස් හමුවී ඇත. ගින්නේ ස්වාභාවය අනුව ඒ වනවිටත් බවුසර් වල තිබූ ඉන්ධන වැඩි ප්‍රමාණයක් ඉවත් කරගෙන ඇති අයුරක් නිරීක්ශණය කර ඇත. එම ස්ථානයේ සිට මහ කැළය මැදට කැළෑ මර්ගවල ගමන්ගත් ට්‍රැක්ටර් රෝද සළකුණු විසාල ප්‍රමාණයක් ඇතත් තවම ඒ ඔස්සේ පරීක්ෂණ ඉදිරියට කරගෙන යාමට අවසර නිකුත් වී නොමැත. හමුවූ සිරුරු කොටස් බවුසර් රථවල  රියදුරු මහත්වරුන්ගේද යන්න ඔවුන් ගැන ඇති තොරතුරු මත පදනම්ව පරීක්ශණ කරගෙන යනු ලැබේ.

දින තුනකට පෙර සිදුවූ සිදුවීම අළලා කල බුද්ධි තොරතුරු ඇගයීමේ වාර්ථාවේ අඩංගු නිර්දේශ හමුදා ප්‍රධානීන් වෙත බාරදීමට මනමේන්ද්‍ර මහතා අද සූදානමින් සිටියේය. නමුත් සතුරා ඊට වඩා ඉක්මන් හා සුක්ෂම වී ඇතැයි සිතීමෙන් ඔහු යම් තරමකට වික්ෂිප්ත වී සිටී. තම වෘත්තීය ජීවිතය තුළ මෙතෙක් රාජකාරීමය අතපසුවීමකට ඉඩක් නොතැබූ ඔහු ඒ නිසාම කැළඹීමට පත්වී සිටින්නේ, 'සෙකට්‍රිට නම් යමක් කියල නෙගෝශියේශන් එකකට එන්න පුලුවං.. ආමි කමාන්ඩර් එක්කනේ බැරි.. එයා එයාගේ ඔක්කොම කැටයම් එතන දානවානේ'යි හිතට එකඟව නොවුනත් සිතමින් සිත සන්සුන් කර ගැනීමට වෑයම් කරේය. 

රැස්වීම පටන් ගැනීමට තව පැයකට ආසන්න කාලයක් ඇත. හදිසියේ යමක් මතක් වූවෙකු මෙන් ඔහු සිය සහයිකාව ඇමතුවේය.

"Yeah, call KD!" එසැණින් සහයිකාව අභ්‍යන්තර දුරකථන ජාලය ඔස්සේ ඇමතුමක් ගෙන 'සර් ට ඩිරෙක්ටර් කතා කරනවා'යි පණිවුඩය අදාළ පුද්ගලයා වෙත ලබා දුන්නාය. KD යනුවෙන් කෙටියෙන් හැඳින්වූ කිත්ම දොඩංගොඩ යනු මනමේන්ද්‍ර මහතා සිය දෙපාර්ථමේන්තුවේ වඩාත්ම ප්‍රිය කළ ජේෂ්ඨ විමර්ශන නිළධාරියා වේ. ඔහු හා ඇති පෞද්ගලික හැඳුනුම්කම් පසෙකලා ඔහු ඉතා නිර්භීතව රාජකාරිය අකුරටම කළ විශිෂ්ඨ විමර්ශණ නිළධාරියෙකු වීම මේ කැමැත්තට හේතුවයි. පණිවුඩය ලැබී මිනිත්තුවක් ගත වීමට ප්‍රථම එම නිළධාරියා අතින් ගත් ලැප්ටොප් පරිඝණකයද සහිතවම තම ප්‍රධානියා ඉදිරියේ පෙනී සිටියේය. 

"Any new development?"

"Yeah, few.. ඩ්‍රයිවර්ස් ලා දෙන්නගෙ ඩීටේල් අරගෙන මම ක්වික් චෙක් එකක් කරා.. අපේ කළිං සැකේ හරි. දෙන්නම ආමි MIA list එකේ. එකක් කුරුණෑගල පැත්තේ එකෙක්ගේ, අනික තණමල්විල කොල්ලෙක්ගේ. මිසින්ග් වෙලා අවුරුදු 3කට වැඩියි දෙන්නම"

"ඌප්ස්.. එතකොට බොඩීස් දෙක? ඒක කෝට් ඕඩරයක් අරගෙන වෙනම ඉන්වෙස්ටිගේශන් කරන්න වෙයි නේ"

"ඔව්. ජේ.ඕ.සී. ඊස්ට් ඒක හැන්ඩ්ල් කරනවා.."

"What else we can assume?"

"මට හිතෙන්නේ KIA/MIA List ලිස්ට් එක කවුරු හරි නොගැළපෙන කෙනෙක් ළඟට ගිහින් තියෙනව.. ට්‍රයි ෆෝසස් කමාන්ඩර්ස්ලගෙන් අහන්න වෙනවා මේකේ ඩිස්ට්‍රිබියුශන් එක ගැන."

"තනි තනිව නම්, විස්තර හොයා ගත්තා වෙන්න බැරිද? KIA/MIA ඔක්කොගෙම නම් ජෙනරල් මැසේජ් එකකින් පබ්ලිශ් කරනවනේ ඉන්සිඩන්ට් එකෙන් ඉන්සිඩන්ට් එකට.."

"No sir, see the three names. නම් තුනේම මුල් නම පටන් ගන්නේ A අකුරෙන්.. අනුර..අනුරාධ වගේ. දෙවෙනි නම පටං ගන්නේ R අකුරෙන්.. රත්නායකලා දෙන්නයි. රූපසිංහයි. ඒකයි මම කියුවේ someone is toying with a list කියල.."

"Excellent KD"

"One more thing.. ඉන්සිඩන්ට් දෙකේම අන්තිම වාහන.. දෙකේම කම්පැනි own ඩ්‍රයිවර්ස්ලා නෙවෙයි. හයර් කරපු අය මේ ටාස්ක් එකටම. So we can safely assume that any new driver with surname starts from R and driving an essential cargo truck in the end of a convoy; there would be something in it"

"Wonderful පුතා.. I was in all sorts of trouble before this. Thanks you."

"My pleasure sir. I'll study this further." 

*****************************************

"සංජු, මේ ඉන්නේ ASP විදානගේ.. ඊස්ට් එකේ එස්ටීඑෆ් ලොක්කා... Station OIC ව නම් ඔයා දන්නවනේ, මේ කතාව අපි හතර දෙනා අතර විතරයි, ඕකේ?" ත්‍රිකුණාමලයේ කිසිවෙකුට සංජු යනු අලුත් නමක් නොවේ. වසර ගණනක සිට ත්‍රිකුණාමල වරායේ ගණං කාරයා සංජුය. ධීවරයෙකු වූ පියාගේ උරුමයෙන් වැල්ලට පය ගැසූ සංජු කිසි දිනෙක මාළු රස්සාවේ යෙදුණු එකෙකු නොවුනත් වැල්ලේ හතර මායිම අතැඹුල සේ දනී. කරදඬු උස් මහත්වූ දින සිට මංජුගේ ආදායම් වැල්ල හා බැඳී පවතී. 

"ඔව් සර්.. ඕකේ"

"මම දන්නව උඹට උන් එක්ක ඩිරෙක්ට් කන්ටැක්ට් තියෙනව කියල.. ආයි මට ඒකේ හංගන්න දෙයක් නෑ."

"සර් ඉතිං ඕක හැමදාම කියනව.. මම අහගෙන ඉන්නව.. ඔය කල්ලරාවේ මාළු දැල් කේස් එකයි සාම්පූර් තෝපුර් ඉඳල රස්සාවට මලේ එන උන්ගේ වැඩ ටිකටයි එහෙ මෙහෙ වෙනවා ඇර මට එහෙම උන් එක්ක ගණුදෙනුවක් නෑ"

"හරි.. අපි ඒක වෙන දවසක වෙනම කතා කරමු. ඊයේ බවුසර් දෙකේ සීන් එක අපේ සූර්‍යපුර එස්ටීඑෆ් කෑම්ප් එක ළඟම වෙච්චි නිසා මේකට අපි ඔක්කොම හිර වෙනවා. ඉන්ට් එකෙන් රිපෝට් එක එන්න කලින් මට වෙච්චි ඇත්ත කථාව දැන ගන්න ඕනි.. සංජුට මොකක්ද ඒ ගැන කරන්න පුලුවන්?"

"බවුසර් දෙකම පෙට්‍රල් කියන්නේ සර්.. ඕක යන්නේ වාකරේට. සීයේ OBM වලට තෙල් බොනවානේ. වාකරේට යනවා කියන්නේ රමේෂ් මාස්ටර්ට බඩු යන්නේ. ඒත් ඔතනට එනකං ගේන එක මිනිහට කරන්න බෑ."

සංජුගේ පිළිතුරත් සමඟ නැගෙනහිර දිසාව බාර ජේශ්ඨ පොලිස් අධිකාරීවරයා තම සහය නිළදාරීන් දෙදෙනා දෙස එකහෙළා බැලුවේය. ඔවුන් දෙදෙනාම නිරුත්තරව මෙන් බලා සිටී. වයස තිස් පහක්වත් නැතැයි සිතෙන මේ තරුණයා ඉතා ශූර ලෙස මේ සිදුවීම විශ්ලේෂණය කරමින් සිටී. සංජු යනු උගතෙක් හෝ දාමරිකයෙකුට සරිළන පෙනුමකින් යුත් මැරයෙකුද නොවේ. එහෙත් ඔහු ලෝක අණ්ඩපාලයෙකි. ලේසියෙන් ඔහුගෙන් වැරදි යමක් එළියට ගත නොහැක්කේ ලෝකය හා ලෝකයා සමඟ නිරන්තරව ගැටීමෙන් ඔහු ලද පරිචය නිසායි.

වයස 25ක් වීමටත් මත්තෙන් බහුදින ධිවර බෝට්ටු වලට සේවකයින් සැපයීමෙන්, ආහාර හා ජලය සැපයීමෙන් මෙන්ම මාසිකව බෝට්ටු හා මාළු ලොරි වලින් කප්පම් එකතු කිරීමෙන් සංජු මහා සල්ලි කාරයෙකු විය. ඒ සඳහා ඔහු රජයේ ඉහළ නිළධරීන්ට පොලිසියට හමුදාවලට මෙන්ම ත්‍රස්ථ සංවිධනයටත් අත දිග හැර වියදම් කළේය. ඔහු වටා නිතරම ගෝලබාලයන් ප්‍රමුඛ මහා පිරිසක් දැවටීම නිසා ප්‍රාදේශීය දේශපාලකයින්ගේ ඇසුර නිතැතින්ම ඔහුට හිමිවිය. එවන් එක් දේශපාලකයෙකුගේ අනුහසින් ත්‍රිකුණාමලය හතරේකණුව ප්‍රදේශයේ අයිස් මෝලේ අයිතිය සංජු අතට පත් වීමත් සමඟින් ඔහු 'අයිස් සංජු' ලෙස කවුරු කවුරුත් හඳුන්වන ලදී. 

ත්‍රිකුණාමලයට උතුරින් හා පුල්මුඩේට මදක් පහලින් යාන්ඔය මුහුදට වැටෙන ආසන්නයේ පිහිටි මුහුද ධීවරයින් හැඳින්වූයේ 'ගැහැණු මුහුද' ලෙසයි. පිහිටීම හා දියවැල්වල සුවිශේෂි බලපෑම හේතුවෙන් එම ප්‍රදේශයේ තෝරු පරවුන් වැනි වටිනා මාළු වර්ග බොහොමයක් බිත්තර දැමීම හා බෝවීම නිසා ඒ ආසන්නයේ මෙම මාළු අස්වැන්න අවුරුද්දේ දින තුන්සිය හැට පහ පුරාම ඉතා සරුය. යාන්ඔයට පහළින් පිහිටි කල්ලරාව ධීවර ගම්මානය මේ සඳහාම ප්‍රසිද්ධය. කල්ලාරාවේ වෙරළ තීරය ආසන්න වශයෙන් මීටර සීයක පමණ කැබලි වලට වෙන් කර එවායේ අයිති කරුවෝ මාස තුනෙන් තුනේ කාලයකට බැගින් එක් එක් ධීවර මුදලාලිලාට බද්දට දීම සිදු කරයි. ඔවුන් තම කණ්ඩායම් සමඟ එහි වාඩිලාගෙන උදේ හවස මාදැල් යොදාගෙන මාළු ඇල්ලීමේ යෙදෙයි. කල්ලරාව ධීවර සමිතියට අයිති එක බිම් කොටසක් ඇරුණු විට ඉතිරි සේරම බිම් අයිති කොළඹ ඉහල පෙළේ පුද්ගලයින්ටයි. අයිති යැයි කීවාට මේ බොහෝ කොටස් බලෙන් වෙන්කරගත් හෝ හොර ඔප්පු මගින් වෙරළ ආසන්නයේ ඉඩම් වෙන්කරවාගෙන එමඟින් ඉදිරිපස වෙරළේ අයිතිය කියන අමුතු ආකාරයේ ජාවාරම් වේ. 

යුද්ධය හා ත්‍රස්ථ බියත්, වෙනත් හේතූනුත් නිසා මේ අයිති පුද්ගලයින් බොහෝවිට මෙම ගණුදෙනු කලේ අයිස් සංජු හරහායි. එක් බිම් කොටසක් මාස තුනක කාලයකට රුපියල් ලක්ශ විසිපහක් වැනි ඉහළ මුදලකට බදු දෙනු ලැබේ. එසේම මෙම වාඩි වලට මිනිසුන් ගෙන ඒම තවත් අපූරු ක්‍රියාවලියකි. වාරකන් නිසා ධීවර කටයුතු කළ නොහැකි පැතිවල පළපුරුදු ධිවරයින් මාස තුනක කාලයකට මෙම වාඩි වලට එවනු ලැබේ. පළපුරුදු ධීවරයෙකු ගෙනෙන විට මුලින් ඔහුගේ පවුලට රුපියක් පනස්දාහක් මුදලින් ලබා දේ. එතැන් පටන් ඔහු මාස තුනක් දක්වා අදාළ මුදලාලිගේ වහලෙකි. ඉඳුම් හිටුම් සියල්ල වැල්ලේ වාඩියේම වේ. කෑම තුන් වේලටම කළවම් අලුත් මාළු හොද්දක් හා බතකි. ඉඳහිට පොල් සම්බෝලයක් එකතු වේ. මාස තුන අවසානයේ ඔවුන් නිදහස් කර යවන විට මුදලාලිගේ ලාබයට සාපෙක්ශව කිසියම් මුදලක් අත මිට මොළවනු ලබන මුත් එය අනිවාර්‍ය නැත. මේ වාඩිවලට අවශ්‍ය හාල් තුනපහ, බොන වතුර, අරක්කු සිගරට් හා දැල් ආම්පන්න නඩත්තු උපකරණ සැපයීමද තවත් එක් ව්‍යාපාරයකි. එසේම අල්ලන මාලු තිකුණාමලයට හා එතනින් කොළඹට යැවීමද වෙනම දාමයක් ඔස්සේ ක්‍රියාත්මක වේ. නියමින් හෝ අනියමින් මේවායේ වැඩි පංගුවක අයිතිය දැරුවේද සංජු හෝ ඔහුගේ ගෝල බාලයින් වේ. මෙනයින් 'අයිස් සංජු' යනු ත්‍රිකුණාමලය මතු නොව ලංකාව පුරාම මාලු වෙළඳාම හෝ ඒ ආශ්‍රිත කටයුතු වල යෙදෙන්නන්ගේ මුවඟ නිතර කියවෙන නමක් වී තිබුණි. 

"හරි.. ඔතනට එනකම් විස්තරේ තමයි මටත් දැන ගන්න ඕනි. උඹට තමයි ඒක කරන්න පුලුවන්. මිනිහෙක් දාපන් ඉක්මණට ඒකට. ඇක්ශන් එකක් ගන්නවද නැද්ද කියන එක නෙවෙයි. මේක අළුත් ගේම් එකක්.. වෙන්නේ කොහොමද කියන එක දැන ගෙන ඉන්න එක උඹලා අපි ඔක්කෝටම හොඳයි. එහෙම නේද?"

"ඒකනම් ඇත්ත සර්.. ටික දවසක් දෙන්න. මම හොයාගන්න බලන්නම්"

***********************************************

ඉරිදා උදෑසන 10.30ට පමණ ත්‍රිකුණාමලය නාවික තඨාකාංගනයේ දොරටුව අසලින් දර්ශන් ඇතුළු තරුණයින් හතර දෙනා තම ජීප් රථයට නංවාගත් දේවා සවස් වීමට ප්‍රථම වැල්ලවත්තේ ඔවුන් වෙනුවෙන් කුළියට ගත් නිවස වෙත පැමිණියේය. සියළු ලියකියවිලි අඩුපාඩුවක් නොමැතිව තිබීමත් හතරැස්කොටුව මුරපොළ බාර නිළධාරියාගේ සහයෝගයත් නිසා අතරමඟ ලියාපදිංචිය සඳහා රස්තියාදුව අවම විය. තරුණයින් හතර දෙනාව එළඹෙන සතියේ විශ්ව විද්‍යාල ප්‍රවේශය සඳහා රැගෙන යාමට ඔහුට මේ නිවස සොයා ගැනීමට උපකාරී වූ මිතුරාම ඉදිරිපත් වූ හෙයින් තරුණයින්ට ඔහුව හඳුන්වාදීම සඳහා දේවා ඇතුළු පිරිස මිතුරාගේ නිවස වෙත එදින සවසම ගියහ. එහිදී කොළඹ ජීවිතය හා එහිදී ද්‍රවිඩ තරුණයින්ට මුහුණ දීමට සිදුවිය හැකි ගැටළු හා ඒවා අවම කර ගැනීමට අවශ්‍ය බොහෝ උපදෙස් දේවාගේ මිතුරා විසින් තරුණයින්ට ලබා දුණි. ඔහුට බොහෝ සෙයින් ස්තූති කළ දේවා තරුණයින් පිරිස නැවත කුළී නිවස වෙත ඇරලවා එදිනම නැවත කිළිනොච්චිය බලා යාමට සිය රියදුරු සගයා සමඟ රෑ බෝ වීමට මත්තෙන් කොළඹින් පිටත් විය. 

සංවිධානයේ සාමාජිකයින් අතර එදින හුවමාරු වූ රහස් සංඥා පණිවුඩ වලට අනුව දෙවන ඇල්ෆා රෝමියෝ  මෙහෙයුමෙන් පසුව හමුදාව දණ්ඩෙන් පහරකෑ සර්පයකු මෙන් කිපී ඇති බවත් එහෙයින් තම කටයුතු වහාම සැකකටයුතු සීමාවෙන් මෙහා ඉදිරියට සැළකිය යුතු කාලයක් පවත්වාගෙන යා යුතු බවට දේවා තීරණය කොට සිටියේය. නමුත් ඒ සියල්ලටම වඩා 'බිෂොප්' පිළිබඳව සින්න තලේවර් ගේ උනන්දුව ගැන ඔහු කැළඹී සිටියේය. 'බිෂොප්' යනු සංවිධානය තුල දර්ශන් ව හඳුන්වන නාමයයි. දර්ශන් වැනි දක්ශ උගත් තරුණයින් ලෙහෙසියෙන් තම අරමුණු වලින් නිදහස් කිරීමට සංවිධානය කටයුතු නොකරන බව දේවා දැන සිටියත් මෙතරම් ඉක්මණින් සහ වේගයෙන් සංවිධානය ඔහු ගැන උනන්දු වේයැයි ඔහු කිසිසේත් බලාපොරොත්තු වූයේ නැත. නමුත් භූමියේ යුද්ධය සංවිධානයට අවාසි අයුරින් පෙළගැහෙද්දි තිරය පසුපස යුද්ධයට කල් වේලා සැළසුම් ඇතුව සූදානම් වීමට මේ වෙලාවේ සංවිධනයට අවකාශ නොමැත. එය දර්ශන් ගේ අනාගත සැලසුම් වලට හිතකර නොවන බව දේවා දනී. වහා මේවායේ යම් වෙනසක් සිදුකළ යුතුය. 

සඳුදා උදෑසන දිසාපති කාර්‍යාලයේදි කිළිනොච්චි දිසාපතිතුමිය හමුවූ අරුල් දේවනායගම් ඉල්ලීමක් කරමින් තමන්ට කොළඹට මාරුවක් ලබා ගැනීමට අවශ්‍යබව ප්‍රකාශ කළේය. නමුත් දිසාපතිතුමිය එයට එකහෙළා තම විරෝධය ප්‍රකාශ කළේ මේ අසීරු සමයේ ඔහු වැනි කාර්‍යශූර නිළධාරියෙක් අහිමි වීමෙන් දිසාපති කාර්‍යාලයට වන හානිය පැහැදිලි කරමිනි. අවසානයේ දෙපාර්ශවයේම අවශ්‍යතා සළකා අරුල් දේවනායගම් ට කොළඹ සිට කිළිනෝච්චියේ රාජකාරී කටයුතු වල යෙදීමටත්, අත්‍යාවශ්‍යම අවස්ථා සඳහා පමණක් කිලොනෝච්චියට පැමිණීමටත් එකඟතාවයකට පැමිණියහ. මේ පිළිබඳව දිසාපතිතුමිය බොහෝ පාර්ශවයින් දැනුවත් කොට ඔවුන්ගේ අනුමැතිය හා එකඟතාවය  ලබා ගැනීමට කටයුතු කලාය. විශේෂයෙන් සංවිධානයේ අනුමැතිය මේ සඳහා ලැබීම පිළිබඳ දේවා අතිශයින් සතුටු විය.

පසු සටහන

KIA/MIA List ලිස්ට් එක- Killed in Action/ Missing in Action List (ක්‍රියාන්විතයේදි මියගිය හා අතුදහන් වූවන්ගේ නාම ලේඛනය)

ජේ.ඕ.සී. ඊස්ට්- Joint Operation Commander East (ඒකාබද්ධ මෙහෙයුම් ප්‍රධානී- නැගෙනහිර)

ට්‍රයි ෆෝසස් කමාන්ඩර්ස්ල- Tri-Forces Commanders  (ත්‍රිවිධ හමුදාපතිවරුන්)

convoy- කොන්වෝයි (හමුදා සාමාජිකයින් හෝ අත්‍යාවශ්‍ය ද්‍රව්‍ය රැගෙන එක පෙළට ගමන් කරන රථ පෙළ)

රස්සාවට මලේ එන උන්- 'මලේ' යනු ත්‍රිකුණාමලය වෙනුවට ඒ පැතිවල බාවිතා වන කෙටි යෙදුම වේ.

සීයේ OBM වලට තෙල් බොනවානේ- 100hp Out Boat Motors- අශ්වබල සීයයේ පිටත සවිකරන මෝටර් එන්ජින් (සාමාන්‍යයෙන් ධීවර කටයුතු සදහා අනුමත වන්නේ අශ්වබල 5/10/15 වැනි ප්‍රමාණයේ යන්ත්‍ර වේ. නාවික හමුදාව වෙරළාරක්ශක රාජකාරි වල යෙදෙන සිය කුඩා යාත්‍රා සඳහා අශ්වබල 25 යන්ත්‍ර යොදා ගනි. මහ මුහුදේ නාවික ඩෝරා යාත්‍රා සමඟ තරඟ කිටීමට අවැසි නිසා මුහුදු කොටි සංවිධානය සිය ප්‍රහාරක යාත්‍රා සඳහා අශ්වබල සීයයේ පිටත සවිකරන එන්ජින් යන්ත්‍ර හතරක් හෝ පහක් එකවර යොදා ගනී)

හමුවෙමු තවත් කොටසකින්..

- ක.මි. 

Monday 13 March 2023

Check Point..! 7 වෙනි දිගහැරුම

6 වෙනි දිග හැරුමට..


"මම මරනවා ඕකව.. වල් පරයා..!"

රිමාන්ඩ් බන්ධනාගාරයේ උළු අහසට විසිවන සේ කෑගසමින් බිත්තියට අතින් පහර දෙමින් එසේ කෑ ගැසූ රිමාන්ඩ් සිරකරුවා ඒ වනවිට සිටියේ සිය අත රැඳි ජංගම දුරකතනය වෙත ගුගුරා හැලෙමිනි.. වහා ඔහු වෙත පැන ඔහු නිහඬ කල ජේලර්වරයා නොරුස්නා හඬින් ඔහු වෙත චෝදනා කලේය..

"පිස්සුද මහත්තය ඔහොම කෑ ගහන්න.. මේක ගෙදර කියල හිතුවද.. මනුස්සකමට උදව්වක් කරාම අපි ගස් යන වැඩනේ ඔයාල කරන්නේ.. ඉක්මණට ඔය ෆෝන් එක ඕෆ් කරලා හංග ගන්න.. නැත්නම් මට වෙනවා අයින් කරන්න. තරහා වෙන්නෙපා ඔන්න.."

ජා ඇළ ප්‍රදේශයේ සාමාන්‍ය ව්‍යාපාරික පවුලක තරුණයෙකු වූ මෙවන් සිරිවර්ධන තරුණ කාලයේ හෙමව්පියන් විසින් වැඩිදුර අධ්‍යාපනය සඳහා රුසියාවට පිටත් කළද අධ්‍යාපනය කඩාකප්පල් කරගත් ඔහු එහිදී හමුවූ ඉන්දියානු මිතුරෙකු සමඟ ඩුබායි වෙත පැමිණ නොයෙක් ආකාරයේ ව්‍යාපාර කටයුතු වල යෙදුණේය. ඔහු ටික කලෙකින් ඩුබායි හි විසූ සුරූපී ශ්‍රී ලාංකික තරුණියක් වූ ෂෙලීන් හා හාදව ඇයත් සමඟ නැවත ලංකාවට පැමිණ විවාහ විය. ඔවුන් ලංකාවට පැමිණ නවාතැන් ගත්තේ කඳාන ප්‍රදේශයේ ෂෙලීන් ගේ මාමා කෙනෙකුට අයත් නිවසක ඇනෙක්සියකයි. ෂෙලීන් ගේ මාමා නාවික හමුදාවෙන් විශ්‍රාම ලබා සිටි අතර ඔහුගේ බිරිඳ නිතර අසනීප තත්වයෙන් පසුවීම නිසා ආර්ථික වශයෙන් අසීරු අඩියක පසු වන්නෙකු විය. 

කුඩා කල සිට ඩුබායි හී හැදී වැඩුණු ෂෙලීන් ලංකාවට ආවද ලංකාව ගැන 'හයක් හතරක්' නොදන්නී ඇගේ එකම ලෝකය මෙවන් සහ ඇගේ මාමාගේ පවුලේ අය පමණක් වූවාය. මෙවන් ලංකාවට පැමිණීමෙන් අනතුරව වාහන සහ ඉඩම් 'බයින් ඇන්ඩ් සෙලින්' ව්‍යාපාරයකට මුදල් යෙදවූ අතර මුල් කාලයේ එම එයාපාර ඉතා ලාබදායි වූයෙන් ඔවුන් ජා ඇල මාමලාගේ නිවසේ සිට වැලිසර නවීන පන්නයේ තට්ටු තුනක මහල් නිවසක් කුලියට ගෙන එහි පදින්චියට ආහ. වසර කීපයක ඇවෑමෙන් මෙවන් සහ ෂෙලීන් පිරිමි දරුවන් දෙදෙනෙකුගේ දෙමාපියන් වූහ. ඔවුන් වත්තල පිහිටි ප්‍රමුඛ පෙලේ ජාත්‍යන්තර පාසලක ඉගෙනුම ලැබූහ. 

ෂෙලීන් හා මෙවන් වෙනම පදිංචියට ඒමෙන් ඇගේ මාමා වූ ලෙනාඩ්ට ලැබුණු අමතර වාසි එකින් එක අඩුවන්නට විය. එහෙයින් ඔහු හෙමින් හෙමින් නැවතත් ෂෙලීන් වෙත කිට්ටු වෙමින් ඇගේ හිත දිනා ගන්නට වෑයම් කලේය. මේ අතර කලක් ඇවෑමෙන් දිනෙන් දින මෙවන් ගේ ආදායම් අඩුවූ අතර වියදම් ඉහල යමින් තිබුණි. මිළට ගත් සමහර වාහන වල ලියාපදිංචි සහතික හොරෙන් සකස් කර තිබූ ඒවා බැවින් සමහර ඒවා ගත් මුදලට වඩා ඉතා අඩු ගණන් වලට විකුණා දැමීමට ඔහුට සිදුවිය. මේ ව්‍යාපාර පාඩු ලබද්දි ලෙනාඩ් ඊට හේතුව ලෙස ඔවුන් නිසි ලෙස ආගම නොඇදහීම බව ෂෙලීන් ට ඒත්තු ගැන්වීමට සමත් විය. එමෙන්ම සාම්ප්‍රදායික ක්‍රිස්තියානි හෝ රෝමානු කතෝලික නොවන වෙනත් ආගමක නිකායක අනුගාමිකයින් ලෙස ඔවුන්ව, විශේෂයෙන් ෂෙලීන්ව නම්මා ගැනීමට ලෙනාඩ් ට හැකිවිය. මේ සඳහා බොහෝ සෙයින් උපකාර වූයේ ඒ වනවිට ලංකාවේ ප්‍රබලම දේශපාලන පවුලක ප්‍රසිද්ධ කාන්තාවක් මෙම නිකායේ ප්‍රබල අනුගාමිකාවක් වී සිටීමයි. කඩවසම් මෙවන් මෙන්ම සුරූපී ෂෙලීන් නොබෝ දිනකින්ම එම නිකායේ සාමාජිකයින් අතර ප්‍රසිද්ධ ජෝඩුවක් වූ අතර 'මැඩම්' යනුවෙන් හැඳින්වුණු දේශපාලන කාන්තාවගේ අවධානය දිනා ගැනීමටද ෂෙලීන්ට හැකිවිය. ඉන් අන්තුරුව 'මැඩම්' සහභාගී වන කාන්තා උත්සවාදී කටයුතු වලදි මැඩම්ගේ පරිවාර ස්ත්‍රියක් ලෙස ෂෙලීන් ද ඒ ඒ කටයුතු වලට දායකත්වය ලබා දීමෙන් නොබෝ දිනකින් යම් තරමක සමාජ බලයක් ගොඩ නගා ගැනීමට මෙවන් සහ ෂෙලීන් යුවලට හැකිවිය.

මේ වනවිට මෙවන්ලාගේ දුරින් ඥාතීන් වූ ඔස්ටින් මුදලාලිට අයත් ඔස්ටින් පෙරේරා හා සමාගම රටේ දැවැන්ත ව්‍යාපාරික ජාලයක් ගොඩනගාගෙන තිබුණි. විශේෂයෙන්ම ඔස්ටින් මුදලාලිගේ පුත් රෝහිත පෙරේරා දේශපාලනයට සම්බන්ධවීමත් සමඟ ත්‍රිවිධ හමුදාවට අත්‍යාවශ්‍ය ද්‍රව්‍ය සැපයුම් සිදුකල ඔවුන්ගේ ව්‍යාපාරික ජාලය ඉතා විශාල ලෙස ව්‍යාප්ත විය. රෝහිත පෙරේරා රාජ්‍ය අමාත්‍යවරයෙකු ලෙස දිවුරුම් දීමෙන් අනතුරුව එකහෙළා ව්‍යාපාර වල යෙදීමෙන් ඈත්ව ඒ වෙනුවට ඔහුගේ විවිධ නියෝජිතයන් හරහා මෙම ව්‍යාපාර මෙහෙයවමින් සිටි සමයේ මෙවන් සිරිවර්ධනලාගේ නැගිටීම ඔහුගේ ඇස ගැසෙන්නට විය. 'කියන ඕනි වැඩකට' කැමති ජාතියේ 'බුලට්' එකක් බව දන්නා සිය ඥාති සහෝදරයාත් ඔහුගේ සුරූපි බිරිඳත් රෝහිත පෙරේරලාගේ ව්‍යාපාර හා සම්බන්ධ වන්නේ ඉන් අනතුරුවයි. 

ඒ අනුව වත්තල හේකිත්ත පාරේ වසා දමා තිබූ රජයේ සංස්ථාවකට අයත් පැරැණි ගබඩා සංකීර්ණයක් දීර්ඝ කාලීන බදු පදනම යටතේ මෙවන් සිරිවර්ධනලාට ලැබුණු අතර එහි M.S. Direct Distributors ආයතනය ස්ථාපිත කරන ලදී. කෝටා ක්‍රමයට ඔස්ටින් පෙරේරා සමාගමට ලැබෙන උතුරු නැගෙනහි‍ර මුදා නොගත් ප්‍රදේශ හා ත්‍රිවිධ හමුදාවලට යැවෙන අත්‍යාවශ්‍ය ද්‍රව්‍ය ගබඩා කිරීමේ හා ප්‍රවාහනයේ උප කොන්ත්‍රාත්තුවක් මෙම ආයතනයෙන් සිදුකල අතර ඒ සදහා ඉඩ හා දුර ප්‍රමාණය අනුව ගෙවීමක් සිදු කරණු ලබයි. 

මේ අතර වාහනයක වංචනික ලියකියවිළි හා සම්බන්ධ නඩුවක් හේතුවෙන් මෙවන් සිරිවර්ධන සති දෙකක කාලයකට රිමාන්ඩ් බන්ධනාගර ගත කෙරේ. ඒ කාලය තුල ලෙනාඩ් උවමනාවෙන්ම පැමිණ ෂෙලීන්ට ව්‍යාපාර කටයුතු සඳහා උදව් කරයි. මෙවන්ගේ සුරූපි බිරිද ෂෙලීන් කෙරෙහි ආශක්තව පසුවෙන රෝහිත පෙරේරා මේ අවස්ථාවේදි මෙවන්ව බේරා ගැනීම හිතා මතාම කර අරින නමුත් ඒ කාලය තුල ෂෙලීන්ට ළං වීමටද ඔහු අපොහොසත් වේ. සියළු කටයුතු මැද ෂෙලීන් හා මෙවන් දෙදෙනාට අසීමිතව ආදරය කරන එකිනෙකාට ලැදි යුවලක් වීම නිසා මෙතක් රෝහිත පෙරේරාට ඇගෙන් බැල්මකින් හෝ සහොයෝගයක් නොලද නමුත් ඔහුගේ හිතේ ෂෙලීන් නැමති ගිනි පුළිඟුව පිටතට නොපෙනී නොනිවී දැල්වෙයි. 

සති දෙකක බන්ධනාගාර ජීවිතය තුල මෙවන්ට අපූරු මිතුරෙකු මුණගැසේ. දිගුකලක් රජයේ ගිණුම් ලිපිකරුවෙකුව හිඳ යම් අකටයුත්තක් හේතුවෙන් සේවයෙන් පහ කරන ලද්දාවූද ඉන් අනතුරුව පෞද්ගලික ආයතනයක සේවය කරමින් සිටියදි දැවැන්ත චෙක්පත් වංචාවක හවුල් කරුවෙකුවීම නිසා රිමාන්ඩ් බන්ධනාගාරගතව සිටි ඔහු සෙනෙවිරත්න නම් විය. සෙනෙවිරත්න සිය ජීවිත කාලය තුලදි වැඩිහරියක්ම සම්බන්ධ වී තිබුණේ නීතිවිරෝධි කටයුතු වලට වේ. ඔහු නීතිවිරෝධී වාහන, ඉඩම් වෙළදාම්, අගරු චෙක්පත්, ආයෝජන වංචා මෙන්ම අළුත්ම බිස්නස් 'ට්‍රෙන්ඩ්' එක වූ ත්‍රස්ථවාදී සංවිධානයට තහනම් බඩු භාණ්ඩ සැපයුම ගැනද මෙවන් හා පාරම් බෑවේය. එකම දිනයකදි එකම උසාවියෙන් ඇප ලබා එළියට පැමිණි සෙනෙවිරත්නට තම ව්‍යාපාරය හා එක්වන ලෙස මෙවන් ආරාධනා කලේය. සෙනෙවිරත්නගේ පැමිණීමත් සමඟ ඔහු කළමනාකරු වශයෙන් කටයුතු කල අතර ලෙනාඩ් පැත්තකට විසිවිය. ෂෙලීන් ගේ මැදිහත් වීමෙන් ලෙනාඩ් තවදුරටහ් ගබඩා සංකීර්ණයේ ආරක්ශක කටයුතු සොයා බලමින් එහි රැඳී සිටී. 

නීති විරෝදී ලෙස ගෙන්වූ හා එකළස් කල වාහනද ලියකියවිළි වෙනස් කල වාහනද සමඟ ඔට්ටු වීම නිසා මෙවන් ටික කලෙකින්ම ඒ විශය සම්බන්ධයෙන් සෑහෙන පරිචයක් ලැබීය. නීති විරෝධීව වාහන ගෙන්නන්නං, එකළස් කරන්නන්, ලියකියවිළි වෙනස් කරන්න උදව් කරන මෝටර් රථ ප්‍රවාහන කොමසාරිස් කාර්‍යාලයේ සේවකයින්, වාහන වෙළඳාමේ අතරමැදි කරුවන් වශයෙන් එහි වූ මහා ජාලයේ එක් කොටස් කරුවෙකු වූ මෙනන් සෙනෙවිගේ සම්බන්ධතාද උපයෝගී කර ගනිමින් තවත් පියවරක් ඉදිරියට මේ ව්‍යාපාරය ගෙන ගියේය. එනම් නීති විරෝධි වාහන අඩු මුදලට ගෙන ඒවා උතුරු නැගෙනහිර ත්‍රස්ථ සංවිධානය වෙත වැඩි මුදලට විකිණීමයි. මේ සඳහා ඔහුට ත්‍රස්ථ ක්‍රියාකාරීන් සම්ඟ කෙළින්ම සම්බන්ධ වී කටයුතු කිටීමට සිදුවිය.

සින්න තලේවර් ලෙස හැඳින්වූ දෙවන පෙළ ත්‍රස්ථ නායකයා ත්‍රස්ථ සංවිධානය වෙනුවෙන් මේ කටයුතු බාරව සිටියේය. ඔහුගේ නියමයෙන් 'මුත්තවර්' යන සංඥා නාමයෙන් හැඳින්වූ කිලිනෝච්චියේ අත්‍යාවශ්‍ය සේවා බාර රජයේ නිළදාරියෙක් මේ සියළු කටයුතු සම්බන්ධීකරණය කරයි. මුත්තවර් යනු සිංහල, දෙමළ මෙන්ම ඉංග්‍රීසි භාශාවද ව්‍යක්තව හැසරවූ දකුණේ බොහෝ නිළධාරින්ගේ හා හමුදා පුද්ගලයින්ගේ විශ්වාසය දිනූ දක්ශ තරුණ නිළධාරියෙක් විය. නමුත් ක්‍රමිකව ත්‍රස්ථ සංවිධානය විසින් ඔහුව වටලා ඔහුගේ මෙම හැකියාවන් ඔවුන්ගේ උවමනා එපාකම් වලට යොදවාගන්නා තැනට කටයුතු කරන ලදී. මුලින්ම ත්‍රස්ථයන් විසින් ඔහුගේ බිරිඳගේ පියා ද්‍රෝහී වීමේ චෝදනා මත මරා දැම්මේය. ඉන්පසු යාපනේ විසූ ඔහුගේ පවුලේ අය කඩින් කඩ කොටු කොට ඔවුන්ට නොයෙකුත් සීමා පැනවූයේය. මුත්තවර්ගේ මස්සිනා හෙවත් බිරිඳගේ මල්ලීගේ සියලු වගකීම් මියගිය මාමා විසින් ඔහු වෙත පවරා තිබූ බව ත්‍රස්ථ සාමාජිකයින් දනී. අවුරුදු විස්සක නව යොවුන් තරුණයෙකු වූ දර්ශන් ඉගෙනීමෙහි ඉතා දක්ශ කඩවසම් තරුණයෙකු වූයේය. ඔහුට වයස 16දී පමණ ඔහුව සංවිධානයට බඳවා ගැනීමට අණ ලැබුණු මුත් උසස් පෙළ අවසන්වනතුරු පාසැල් යාමට පසුව අවසර නිකුත් විය. උසස්පෙළින් අනතුරුව නැවත සංවිධානය වෙනුවෙන් කටයුතු කලයුතු වූ අතර සංවිධානයට පක්ශව ඒ වෙනුවෙන් කටයුතු කරන පොරොන්දුව මත ඔහුට වැඩිදුර අද්‍යාපනය සඳහා මොරටුව විශ්ව විද්‍යාලයට ඇතුළු වීමේ අවසරය සංවිධානයෙන් නිකුත් විය, මේ සියල්ල සඳහා මුත්තවර් ගෙවිය යුතු වන්දිය ත්‍රස්ථ කටයුතු සඳහා උතුර හා දකුණ අතර සහසම්බන්ධය පවත්වාගෙන යාම වේ. කටයුතු පහසු වීම සඳහා ත්‍රස්ථ සංවිධානයේ අනුහසින්ම මුත්තවර් හෙවත් අරුල් දේවනායගම් කිලිනොච්චි දිසාපති කාර්‍යාලයේ අත්‍යාවශ්‍ය සේවා බාර නිළදාරියා ලෙස පත්වීම් ලද්දේය. 

අත්‍යාවශ්‍ය සේවා බාර නිළධාරියා ලෙස අරුල් දේවනායගම් සතුව දිසාපති කාර්‍යාලයට හා රතු කුරුස සවිධානයට අයත් වාහන සංචිතයක් පවතී. ඔහුට 'අත්‍යාවශ්‍ය සේවා' ලේබලය යටතේ මෙන්ම 'රතුකුරුස' ලේබලය යටතේද උතුර හා දකුණ අතර වාහන එහෙ මෙහෙ යැවීමේ බලය පවති. අනෙක් අතට සියලුම හමුදා නිළධාරින් හා සෙසු නිළයන් සමඟ පාහේ ඔහුගේ ඇති සමීප සම්බන්ධය නිසා බොහෝ මුරකපොළු වලදි ඔහුගේ වාහන දීර්ඝ ප්‍රශ්ණ කිරීම් වලට ලක්වන්නේ නැත. මේ දම්වැල බාවිතා කරමින් මෙවන් ඇතුලු කණ්ඩායම ෆෝ වීල් වර්ගයේ වාහන කීපයක්ම සාර්ථකව දනුණේ සිට උතුරට නීති විරෝධීව පැන්නුවේය. සින්න තලේවර් විසින් මෙවන් සිරිවර්ධන 'මයික් සියරා' ලෙසත් අරුල් දේවනායගම් 'මුත්තවර්' ලෙසත් එකිනෙකාට හඳුන්වා දුන් නමුත් මේ තාක් දෙදෙනා එකිනෙකාට හමුවී නැත. අවශ්‍ය සම්බන්ධීකරණ කටයුතු වලට කලින් කලට නොයෙක් පුද්ගලයින් එකතුවන නමුත් මේ කිසිවෙකුගේ නිසි හැඳුනුම්කමක් එකිනෙකා නොදනී. සෑම විටම රහස් සංඥා නාමය හරහා එකිනෙකා තහවුරු කර ගැනීමෙන් අනතුරුව පමණක් අවශ්‍ය තොරතුරු හුවමාරු කර ගනී. 

හලාවත පැත්තේ ප්‍රබල දේශපාලකයෙකුගේ පුතෙකු වෙනුවෙන් නීතිවිරෝධිව ගෙන්වූ සුඛෝපභොගි ජීප් රථයක් වැඩි මිළක් ගෙවා මිළදී ගැනීම ගැන උරණ වූ ඒ දේශපාලකයා ඔහුගේ හිතවත් ව්‍යාපාරිකයෙකු හරහා ගොනු කල නඩුවක් හේතුවෙන් මෙවන් යළිත් රිමාන්ඩ් බන්ධනගාර ගතවන්නේ ඔය අතරතුරයි. මෙහිදී ෂෙලීන් විසින් රෝහිත පෙරේරාගේ පිහිට පැතුවත් ඔහුගේ උපදෙස වන්නේ අවම මාස තුනක්වත් මෙවන් රිමාන්ඩ් එකේ සිටිය යුතු බවයි. එය මෙවන්ගේම ආරක්ශාවට වඩාත් උචිත බව පැවසීම නිසා මෙවන් සහ ෂෙලීන් දෙදෙනාම ඊට එකඟ විය. මෙවන්ට බන්ධනාගාරයේදි අවශ්‍ය සියළු පහසුකම් ලබා දීමට රෝහිත පෙරේරා මෙන්ම ත්‍රස්ථ නායික සින්න තලේවර්ද කටයුතු කලෙන් ඇප ලබා නොගෙන මෙවන් බන්ධනාගාරයේ සිට සිය කටයුතු මෙහෙයවීම සිදු කලේය. සෙනෙවිරත්න හා ලෙනාඩ් ගේ සහයෙන් ආයතනයේ කටයුතු ෂෙලීන් විසින් නොකඩවා කරගෙන ගිය අතර නොදන්නා සියළු දෙනාට මෙවන් ව්‍යාපාරික කටයුත්තක් සඳහා විදේශගතව ඇති බව සඳහන් කරයි.

****************************************************

මුත්තවර් ගේ සුදු පැහැ ලෑන්ඩ් රෝවර් ජීප් රථය කන්තලේ ප්‍රාදේශීය සභා ගොඩනැගිල්ල අසල නවත්වා ඇති බව දුටු මහේෂ් සියල්ල සැළසුම් කල පරිදි කරදරයකින් තොරව සිදුවන බව සැක හැර දැන ගත්තේය. පෙර දින කොළොන්නාවේදි හමුවූ නාදුනන සගයා විසින් පදවන  අනෙක් පෙට්‍රල් බවුසරය තමාගේ පිටුපසින් එන බව තහවුරු කරගත් මහේෂ් ත්‍රිකුණාමලයට යාමට හැරවිය යුතු කන්තලේ නගරය හරහා දිවෙන ප්‍රධාන මාර්ගය වෙනුවට දකුණට හරවා අල්ල-කන්තලේ මාර්ගය හරහා වේගයෙන් බවුසරය ධාවනයේ යෙදවීය. තව සුළු වේලාවකින් එනම් චුන්දකාඩු ඝන වනාන්තරය මැදදි තමන්ගේ වගකීම අවසන් වන බව මහේෂ් දනී. සැළසුමේ හැටියට චුන්දකාඩු ඝන වනය කෙළවර පිහිටි එස්ටීඑෆ් කඳවුරට ප්‍රථම තැනකදි ත්‍රස්ථ සාමාජිකයින් මඟ අහුරා පෙට්‍රෝල් බවුසර් දෙක ඔවුන්ගේ ග්‍රහණයට ගනී. එතැන් සිට මහ කැලැය මැදින් වෙරුගල් හා වාකරේ දක්වා පෙට්‍රොල් ප්‍රවාහනය කිරීමට ට්‍රැක්ටර් ටේලර් වකට සවිකර කුඩා ප්‍රමාණයේ බවුසර් එම ස්ථනයේ දැනටමත් සූදානම්ව ඇතුවා විය යුතුය. වාකරේ ඇතුළු ත්‍රිකුණාමලයට දකුණින් මුහුදේ සිදුවන ත්‍රස්ථ ක්‍රියාකාරකම් සඳහා අවශ්‍ය පෙට්‍රොල් වල අධික හිඟතාවයක් ඇති නිසා මේ මෙහෙයුම සිදු කරන බව මහේෂ් නොදනී. මුත්තවර් සාමාන්‍යයෙන් එවැනි වැඩි විස්තර නොපවසන අතර මහේෂ් ඒවා හාරා අවුස්සා අසන්නට යන්නේද නැත. චුන්දකාඩු හි සිට තමන්ගේ හා තම සගයාගේ වගකීම ත්‍රස්ථ සාමාජිකයින් සතුවන බව පමණක් කී මුත්තවර් ඔවුන්ගේ අණට කීකරුවී කියන දෙය පමණක් කරගෙන ඉන්නා ලෙස අනතුරු ඇඟවූයේය. හැකි පළමු අවස්ථාවේම ඔවුහු මහේෂ් හා අනිකා කැලෑවෙන එළියට ආරක්ශිතව පමුණුවනු ඇත. 

මහේෂ් හා ඔහුගේ සගයා බවුසර් දෙක අල්ල කන්තලේ මාර්ගයට හරවා නොපෙනී යනතුරු ධාවනය කරනකම් උපේක්ෂාවෙන් සිටි දේවා සිය පෞද්ගලික දුරකථනයෙන් කෙටි පණිවුඩයක් හරහා ඒ බව ජාලයේ අනෙක් උන්ව දැනුම්වත් කළේය. 

"Operation Alpha Romeo ii successfully done"

කන්තලේ නගරය පසුවූ පසු නැවත ත්‍රිකුණාමලයට ආසන්න වනතුරු ජංගම දුරකථන වලට සිග්නල් නැත. වේලාව උදෑසන දහයට ආසන්න වෙමින් පවතින හෙයින් තම මිතුරු නාවික නිළධාරියා තමාව ඇමතීමට බලාපොරොත්තුවෙන් ඇතැයි සිතු දේවා කඩතොළු වූ මාර්ගයේ පමණට වඩා වේගයෙන් ජීප රථය ධාවනයේ යොදවන්නට විය. 'ඇල්ෆා රෝමියෝ'.. මේ නම මෙම ක්‍රියාන්විතයට යෙදුණු හැටි සිහිවී දේවාට සිනහා පහලවිය. මීට වසරකට පමණ පෙර රතුකුරුස සංවිධානයේ යම් සහනාධාර වැඩසටහනක් වෙනුවෙන් මියගිය හා අතුරුදහන් වූ හමුදා හා ත්‍රස්ථ සාමාජිකයින්ගේ නම් ලැයිස්තු දෙකක් ඔහු වෙත ලැබුණි. ඉන් හමුදා සාමාජිකයින්ගේ නම් ලැයිස්තුවේ ඉහලින්ම තිබූ නම 'අනුර රත්නායකයි'.. එම ලැයිස්තුවේ තවත් රත්නායකලා බොහෝ දෙනෙක් වූ අතර රත්නායකලාට අමතරව ඉංග්‍රිසි R අකුරෙන් පටන් ගන්නා නම් වෙනත් බොහොමයක්ද ඔහු නිරික්ශණය කලේය. තවදුරටත් පරිස්සමින් කියවද්දි R අකුරෙන් පටන් ගන්නා නම් බොහොමයක මුලට A අකුරෙන් පටන් ගන්නා මුල් නමක්ද ඇතුළත් බව ඔහු නිරීක්ශණය කලේය. ඔහු හයිලයිටරයක් ගෙන එවන් නම් වෙනම සළකුණු කල අතර එම ලැයිස්තුවේ පමණක් නම් 14ක් A සහ R අකුරු සුසං‍යෝගයෙන් සෑදී තිබිණි. ඒ අනුව A (ඇල්ෆා) සහ R (රෝමියෝ) යනු සිංහල මිනිසුන්ගේ නම් බොහොමයක් පටං ගන්නා ජනප්‍රිය අකුරු ද්විත්වයක් බව ඔහු වටහා ගත්තේය.

කිලිනෝච්චියට දකුණින් වූ සංවිධානයේ පාලන ප්‍රදේශ වලට දිගින් දිගටම හමුදා ප්‍රහාර එල්ල වීමට පටන් ගැන්මත් සමඟ සංවිධනය අධික ලෙස බෙහෙත් හා සායනික ද්‍රව්‍ය හිඟයකට මුහුණ දෙමින් සිටියේය. කිලිනෝච්චි දිසාපති කාර්‍යාලයට ලැබෙන වෛද්‍ය සැපයුම් ප්‍රදේශයේ රෝහල් අතර බෙදා හරින අතර ගැටුම් පවතින ප්‍රදේශ වලට කියා විශේෂයක් කිරීමට රතුකුරුස සංවිධානයේ මැදිහත්වීම නිසා නොහැක. බෙහෙත් හා සායනික ද්‍රව්‍ය අඩංගු ලොරි රථය අමු අමුවේ කොල්ල කෑමට සින්න තලේවර්ගේ අණ ලැබුණේ මේ පසුබිම තුලයි. වවුනියාවෙන් මෙහාට මූහමලේ දක්වා ට්‍රක් රථ වලට හමුදා ආරක්ශාවත් මූහමලෙන් මෙහාට රතුකුරුස සංවිධනයේ මැදිහත්වීමත් ලැබන හෙයින් මේ පැහැර ගැනීම වවුනියාවට පෙර හමුදා පාලන ප්‍රදේශයකදීම සිදු කල යුතුයැයි තීරණය විය. ඒ අනුව ඊට රියදුරාගේ සහය ලැබිය යුතුමය. 

මෙහිදී සින්න තලේවර්ගේම යෝජනාවකින් 'මයික් සියරා'ගේ ආයතනයෙන් අදාල අයිතම පිටත් වන දවසක පැහැර ගැනීම සිදු කිරීමටත් ඔහුගේම මිනිහෙක් මේ වැඩේට යොදවන්නටත් යෝජනා විය. මහරගම බස් රූට් එකේ පාතාල ක්‍රියාකාරී ජගත් ගේ රෙකමදාරුව මත මහේෂ් මේ ජාලයට සම්බන්ධ වන්නේ එලෙසයි. නමුත් පැමිණෙන රියදුරාගේ අනන්‍යතාවය මුරපොළවලින් සැඟවිය යුතුය. දේවාගේ 'ඇල්ෆා රෝමියෝ' තියරිය මෙහිදි අත් හදා බැලීමට ඔහුට හැකියාව ලැබේ. නාවික හමුදා සේවයේ යෙදී සිටියදි අතුරුදහන් වූ 'අනුර රත්නායක' නමින් සියළු ලේඛන ලහි ලහියේ සකස් විනි. මහේෂ් හිතුවාටත් වඩා හොඳින් තම කර්තව්‍ය ඉටු කලේය. වවුනියාව හා පූනෑව අතර කැලෑබද පෙදෙසකදී මහෙෂ් ගෙන් අත්‍යාවශ්‍ය සේවා ලොරිය බාරගත් දේවා එය සංවිධානය අතට පත් කොට සුරක්ශිතව මහේෂ්ව යළි කොළඹට පිටත් කර හැරියේය. පහුවදා රටම මෙ පුවතින් කැළඹී යද්දි නොපැකිලව තම රාජකාරි කොටස ඉටුකල හෙතෙම තම බිරිඳ හා ඥාතීන් බැලීමට යාපනයට යාමට සූදානමෙන් සිටියේය. 

නමුත්.. සෑම දිනයකම නියමිත වේලාවකට කෙටි පණිවුඩ හා ඊමේල් පරික්ශා කිරීමට ඔවුන් සංවිධානයට බැඳී සිටී. ඒ අනුව එදිනට නියමිත වේලාවේ තම පෞද්ගලික ඊමේල් ගොනුව පරීක්ශා කල ඔහුගේ මුහුණ විකෘතිව ගියේ යාපනේ ගමන කල් දමා තවත් සංවිධානයේ අත්‍යාවශ්‍ය රාජකාරියකට එදිනම ඔහුට නැවත යෙදීමට අණ ලැබී තිබුණු හෙයිනි. දිසාපතිතුමියගේ සැටලයිට් දුරකතනයට ඇමතුමක් ලබා දුන් ඔහු ඇල්ෆා රෝමියෝ 2 ක්‍රියාන්විතය සැලසුම් කිරීම සඳහා එදිනම කොළඹට සේන්දු විය.

*********************************************

සෙනසුරාදා රාත්‍රියේ ඕඅයිසී මහතාට හා ජයශංකට සාදයක් සූදානම් කරන ලෙස මෙවන්, සෙනෙවිරත්නට උපදෙස් දුන්නේය. ඕඅයිසී මහතා සාදයට සහබාගී නොවන බව කී බැවින් ඔහුට අවශ්‍ය අඩුම කුඩුම නිවසටම සූදානම් කර යවා ජයශංක හා ඔහුගේ සගයාට වෙනම සාදයක් සූදානම් කරන ලදී. සෙනෙවිගේ හා ලෙනාඩ්ගේ නොහොඳ නෝක්කාඩුව හොඳින් දන්නා මෙවන් මෙවැනි තැන් වලට දෙදෙනාම යවයි. ඒ එකෙකුට එකෙක් අවිශ්වාස නිසා ආයතනයට එරෙහිව කිසිදු දෙයක් කතා නොවෙනා බව දන්නා හෙයිනි. එහෙත් ලෙනාඩ්ගේ මත් ලෝලී බව හා සුරුට්ටු ජෝගිය නිසා මෙහෙදී ජයශංක හා තනිවීමට අවස්ථවක් සෙනෙවිට ළඟාවුණි. කලෙකින් ලද අවස්ථාවත්, ජයශංකගේ පෙළබවීමත්, මත් වතුරින් ලද උත්තේජනයත් නිසා සෙනෙවිරත්න ෂෙලීන් හා ඇගේ සේවිකාවන් ගැන සිතූ සිතූ දේ දොඩවන්නට විය. ඇය මෝඩ ගෑණියෙක් බවත්, 'මිනිහාගේ පදේට නටන රූකඩයක්' බවත්, තමා කියනා ඕනෑම දේකට ඈ එකඟ විය යුතුම තත්ත්වයක ඉන්නා බවත්, ඒ ගැන ජයශංකලාට 'පසුව දැනගන්නට ලැබෙණු ඇති' බවත් එය දඩමීමා කරගෙන තමා ළඟදීම මේ ගැහැණිය වසඟයට ගන්නා බවත් ඔහු පාරම්බෑවේය. නමුත් ඊට ස්වල්ප වේලාවකට පෙර ඔහු ඉතා විනීත ලෙස ඈට ඇමතුමක් අරගෙන ජයශංකට කතා කරන්නට සැළස්සුවේය. කතාවෙන් අනතුරුව ජයශංක දුන් ජංගම දුරකථනය උඩ සාක්කුවේ රුවා ගත්තා විනා එය විසන්ධි කිරීමේ සිහියක් ඔහුට නොවූයෙන් එතනින් එහා සිදුවූ කතා බහ එකක් නෑර ෂෙලීන් හා ඇගේ සහායිකාව නිවසේ සිට අසා උන්නාය.. මොන අඩුපාඩුව වැරැද්ද තිබ්බත් ඉතා හොඳ සැමියෙකු වූ මෙවන් කෙරෙහි ස්වාමිභක්තියෙන් සිටි කාන්තාවක් වූ ෂෙලීන් සිය එකම ආරක්ශකයා වූ මෙවන් හට සියල්ල අකුරන් නෑර පසුවදා ඇමතුමක් ලද සැනින් එළි කලාය.. 

"මම මරනවා ඕකව.. වල් පරයා..!"

*************************************

ඊළඟ කොටසින් හමුවෙමු.

ක.මි. 



Friday 10 March 2023

Check Point..! 6 වෙනි දිගහැරුම

 5 වෙනි දිග හැරුමට..


මරදාන මවුන්ට් මේරි රේල්වේ ඉන්ස්ටිටියුට් එක ඉස්සරහා හෙවනේ තැඹිලි කරත්තයෙන් තැබිලි ගෙඩියක් බී සිගරෙට්ටුවක් දල්වා ගත් මහේෂ් එතනම පිහිටි ගරාදි වැටට බරවිය.. බලාපොරොත්තුවෙන ඇමතුම ලැබීමට තව එතරම් වෙලාවක් නැත.. දකුණතේ රඳවාගත් සිගරෙට්ටුව දෙතොලතර තබමින්ම වම් අතින් සිය කමිස සාක්කුව අතගා බැලූ හේ කුඩා ජංගම දුරකථනය එහි සුරැකිව ඇති බව තහවුරු කරගත්තේය. තැඹිලි ගෙඩියට හා දුම් වැටිය වෙනුවෙන් මුදල් ගෙවා දැමූ ඔහු පාර දෙපස බලා අඩියට දෙකට බේස්ලයින් පාර හරහා පැන විදුලි සංඥා මංසංධිය පසුකර කොළෙන්නාව පාර දෙසට සෙමින් පිය මැන්නේ, එක්වරම කළබලවී තම සාක්කුවේ දඟලන කුඩා දුරකතනය ගෙන එහි අංකය දෙස බලා එය විසන්ධි කර දැම්මේය. එසැණින් ඔහු ඒ අසලම තිබූ වසා දැමු කඩයක පිළට ගොඩවනවාත් සමඟම යළිත් එම අංකයෙන්ම එන ඇමතුමට දෙවරක් නොසිතා සම්භන්ද විය. 

"කෝල් සයින්?"

"ඇල්ෆා රෝමියෝ"

"හෙහ්..හෙහ්.. කොහොමද.. තමුසෙ දැන් සෑහෙන්න හොඳයිනේ.. මම මුත්තවර්"

"මම කොළොන්නාවේ ඉන්නේ.."

"මම බලාගෙන ඉන්නේ අයිසේ.. ඔහොම තව ටිකක් ඉස්සරහට යනව.. ඔව්.. ඔහොම යනව.. මම කියන එක අහගෙනම. ඔය තියෙන්නේ වම් පැත්ත අයිනේ නවත්තල හයිඒස් එකක්.. ඕ.. ආ.. ඕකට නගිනව..."

"මෙතන තව.."

"ආ.. ඒකට කමක් නෑ. මිනිහා තමුසෙගේ හෙට ඉඳල දවස් කීපෙකෙට පාට්නර්. නම ගම විස්තර මොකුත් නොකියා මිනිහගෙන් ඒවා අහන්නෙත් නැතුව ඕනි  දෙයක් කතා කරගත්තට කමක් නෑ. කොහොමත් තරහ කාරයෝ වගේ ඉන්නෙපා ඉන්ඩක්ශන් එකට රෙජිස්ටර් වෙන්න ගියාම. ඔය වාහනේ මහත්තය තමුසෙගෙ ඩොකියුමන්ට් ටික දෙයි. ඇතුලට යන්න කලින් ඒ ටික පොඩ්ඩක් බලා ගන්නව.."

"දුන්න මේ.."

"ගුඩ්.. නම ගම වයස පොඩ්ඩක් බලාගනින්.. අනිත්වා ගැන මොකුත් බයවෙන්න දෙයක් නෑ. රෙජිස්‍ටර් වෙලා ට්‍රේනින් එකට ඉඳලා අද යන්න තියෙන්නේ.. හෙට උදේ එන්න වෙලාවක් කියයි. ඒක අහගන්න. මම රෑට කතා කරන්නම්."

"අද බෝඩිමට නම් යන්න බෑ මට.."

"ආ.. මං ඔය මහත්තයාට කියන්නම්. සල්ලි දෙයි. අද ඔය කිට්ටුව ලොජ් එකක නැවතියං. වැඩිය කැපිල පේන තැනක ඉන්නෙපා. බොන්න පිස්සු කෙළින්න ලෑස්ති වෙන්නත් එපා. උඹට අමුතුවෙන් කියන්න දෙයක් නෑනේ.."

"නෑ.. ඒවා අවුලක්ම නෑ"

"හරි.. එහෙනම් ඔය ටික කරගනිං.. මම රෑට ගන්නම්" මුත්තවර් ද්‍රවිඩ ජාතිකයෙකු උවද ඉතා හොංදින් සිංහල කතා කරතැයි මහේෂ් සිතුවේය.. ඔහු එදා කලබළයෙන් මෙන් එක් වරක් පමණක් දුටුවද ඉතා ප්‍රියමනාප පුද්ගලයෙක් විය. කතාවෙන්ද අනෙකා සැනෙන් අල්ලා ගැනීමට සමත්‍ ය. එහෙත් මේ ඒ කිසිවක් සිතීමට වෙලාව නොවීය. කොළොන්නාව තෙල් ගබඩා සංකීර්ණය අසලින් බැසීමට පෙර අවසන් වරට  මහේෂ් සිය නම යළිත් වතාවක් කියවා මතක තබා ගත්තේය..

"අනුරාධ රූපසිංහ".. හ්ම්ම්..

******************************************

සෙනසුරාදා රාත්‍රියේ යන්තම් අඳුර මෝදුවීගෙන එද්දී සාජන් ජයශංක හා තවත් ඔහුගේ ළඟම හිතවත් සාජන් වරයෙකු වත්තල සෙබස්තියන් පාරේ කෙළවරේ කැළණි ගඟ අසබඩ බෝට් යාඩ් එකට ආවේ අලුත් මිතුරෙකු වන M.S. Direct Distributors ආයතනයේ කළමනාකාර සෙනෙවිරත්න මහතාගේ ආරාධනයෙනි. ස්ථානාධිපතිවරයාටද ආරාධනාවක් කළ නමුදු ඔහුගේ 'රාජකාරී හේතුවෙන් සහභාගී වීමට නොහැකි නිසා බ්ලැක් ලේබල් වර්ගයේ විස්කි බෝතලයක් කලින්ම ඔහුට යවා තිබිණ.. රාත්‍රී අට වන විට ඔහු වෙනුවෙන් සැකසූ අවුල්පත් හා පවුලේ සියළු දෙනාට සෑහෙන ලෙස රාත්‍රී ආහාරය නිවසටම යවන ලෙස වත්තල ප්‍රසිද්ධ හෝටලයකට මුදල් ගෙවා උපදෙස් දුන් සෙනෙවිරත්න මහතා සිය සගයාද කැටුව කළින්ම බෝට් යාඩ් එකට ගොස් සිටියේය.. ඔවුන්ගේ හමුව සඳහා ගඟ අසබඩම නිස්කලංක සමර් හට් එකෙක් සුදානම් වෙමින් පැවතින. ජයශංක ඔහු සමඟ පැමිණි තරුණ සාජන්වරයා හා සෙනෙවිරත්න එකිනෙකාට හඳුන්වා දුන් අතර සෙනෙවිරත්න කැටුව පැමිණි ඔහුගේ සගයා හඳුන්වාදීමට ප්‍රථම ජයශංක විසින් ඔහුව හඳුනාගෙන තිබිණි.

"මේ එහෙ සිකියුරිටි අංකල් නේද?"

"ආ ඔව් ඔව්.. මිස්ටර් ජයශංකට මතකයි නේද? මිනිහා නිකං සිකියුරිටි නෙවෙයි අපේ ඩිරෙක්ටර් සිකියුරිටි.. හෙහ්.. හෙහ්.. මැඩම් ගේ මාමා නේ.."

"ආ..ඔව් මට මතකයි එදා මැඩම් කියුවා.. එක්ස් නේවි නේද කියුවේ?"

"Hey, hey.. I'm too young to be called Uncle by old folks like you.. I'm retired Navy communicator Leonard Croos.. nice to meet you guys"

ප්‍රියමනාප පුද්ගලයෙකු වූ ලෙනාඩ් ඔහුට සුපුරුදු හමුදා විලාශයෙන්ම අනෙකුන්ට ඔහුව හඳුන්වා දුන්නේය. රාජකීය ලංකා නාවික හමුදාව සමයේ පටන් එහි සංඥාකරුවෙකු ලෙස සේවය කොට විශ්‍රාම ලබා සිටි ඔහු ඉතා වියත් ලෙස ඉංග්‍රීසි බාසාව හැසරවීය.

එකිනෙකා හඳුනා ගැන්මෙන් ඉක්බිති සිව් දෙනාම අසල පිහිටි සමර්හට් එක වෙත ගොස් මදුවිත තොලගාමින් අල්ලාප සල්ලාපයෙහි යෙදෙන්නට විය. මදක් වැඩියෙන් දොඩමලු වූ ලෙනාඩ් ආයතනයේ අධ්‍යක්ශවරියට ඔහුගේ ඇති ඥාතීත්වය ගැන වැඩිමනත් පුරසාරම් දෙඩුවේය. සාජන් ජයශංකට ඈ ගැන තවත් තොරතුරු දැන ගැනීමේ අවශ්‍යතාවය ඇති බව පෙණුනත් ලෙනාඩ් ඉදිරියේ සෙනෙවිරත්න යමක් පැවසුවේ බොහොමත්ම කල්පනාවෙන් බව නොබෝ වේලාවකින්ම ජයශංක තේරුම් ගත්තේය.

හෝරාවක පමණ ඇවෑමෙන් ලෙනාඩ් බොහෝ සෙයින් බීමත්ව නන් දොඩවමින් සිටි මුත් අනෙක් තිදෙනාම ඉතා හොඳ සිහියකින් හා පාලනයකින් සිටියහ. මේ අතර ඉස්තරම් වර්ගයේ කියුබානු සුරුට්ටුවක් තම සුරුට්ටු රඳවනයෙන් එළියට ගත් ලෙනාඩ් අනෙක් අයට එය පෙන්වමින් ඒ ගැන විස්තර කරන්නට විය. 

"Anybody want to try an original cuban cigar? This is one of best brands going around.. මට මේක දුන්නේ one of my ex-captain during our last seafarer's get together.." ඔහු එය සාජන් ජයශංක වෙත පෑ නමුත් අතක් ඔසවා සිනහවකින් එය ප්‍රතික්ශේප කලේය. 

"හෙහ් හෙහ්.. you are not lucky enough to smell this.. හෙහ්.. මේක මෙහෙම බීලා බෑ.. හොඳට හුළං වදින තැනක ඉඳලා බොන්නෝනි" කියමින් ලෙනාඩ් සුරුට්ටුව දල්වමින්ම කැළණි ගඟබඩ ගොඩට ඇද තිබූ බෝට්ටුවක් වෙත ගමන් කළේය. ඒ එක්කම වාගේ අනෙක් තරුණ සාජන්ට් වරයාටද දුරකථන ඇමතුමක් ලද හෙයින් ඔහු අනෙක් දෙදෙනාට අතින් සංඥා කොට අවසර පතා ඇමතුමට සම්භන්ද වෙමින් නැගිට ඉවතට ගියෙන් බොහෝ වෙලාවක් බලාපොරොත්තුවෙන් සිටියාක් වැනිව ජයශංක හා සෙනෙවිරත්න එකිනෙකා දෙස බලා අස්වැසිල්ලකින් සිනහාවක් නැගුවෝය..

"ලෙනාඩ් කාරය මරු චරිතේ නේද?" ජයශංක අලුත් කතාවකට අර අඳිමින් සෙනෙවිරත්න විමසුවේය..

"හපොයි.. පම්පෝරිකාරයා.. හොඳයි වැඩක් නැති වෙලාවට කයිවාරුවකට සෙට් වෙන්න නම්.." ඒ සමඟම හඬ මදක් බාලකොට.. "ඔහොම හිටියට හෙන කේලමා.. මෙතන වෙච්චි දේවල් අතිනුත් දාල හෙට මැඩම් ගේ කණේ තියන්නේ. මැඩමුත් මේ වගේ ඒවට ඕකව පටලවල එවන්නෙ ඒකටමයි"

"ඇයි මැඩම්ට සෙනේව ෂුවර් නැත්ද?"

"නෑ..නෑ.. එහෙමමත් නෙවෙයි. ගෑණි බය ඇති මම අත යටින් ගේම් ගහයි කියල.. බිස්නස් වලදි ඔය වගේ ඒවා වෙනවනේ..(මදක් ඉවත බලා සෝපාහාසාත්මකව මෙන්) මම නැතුව කොහොමද එයා මේවා කරන්නේ?" මැඩම් ගැන කතා කිරීමට පොටක් පෑදුණු බව දැනීමෙන් ජයශංක වඩාත් සතුටු විය.

"තමුසෙලාගේ මැඩම් මාර කෑල්ල නේ? ඕ අයි සී මහත්තයත් මගෙන් හාර අවුස්ස අවුස්ස විස්තර ඇහුවා එදා..හෙහ්"

"ඔහො..හෝ.. මට ඒකනම් එදාම තේරුණා. ඕඅයිසී කාරයා ඇඹරුණා ගැරඬියා වගේ ගෑණි දැක්ක ගමන්.. හෙහ් හෙහ්.. ඔහොම ඉන්නව මම තමුසෙට කෝල් එකක් අරන් දෙන්න.. කතා කරන්න ගෑනිට.."

"එපා..එප්..ආ...."

"නෑ..නෑ.. අවුලක් නෑ.. මට කොහොමත් කියුව තමුසෙල ආවම විස්තර කියන්න කියල.."යැයි ඇගේ දුරකතනයට ඇමතුමක් ගත් සෙනෙවිරත්න මොන මොනවාදෝ පවසා දුරකථනය ජයශංක වෙත පෑවේය. ඔහු ගරුසරු ඇතුව මෙන් මුලින් ආමන්ත්‍රණය කලද මද වෙලාවකින් ළඟම මිතුරියක හා සුහද සල්ලාපයක යෙදෙන්නාක් මෙන් සිනහාවෙමින් ඈ සමඟ කතා බහේ යෙදෙද්දී දුම් වැටියක් දල්වාගත් සෙනෙවි සිනහාවෙමින් ඒ දෙස බලා සිටින්නට විය. කතාව අවසන් කල ජයශංක ජංගම දුරකතනය සෙනෙවි අතට දුන් හෙයින් ඔහු ඒ දෙස නොබලා එය උඩ සාක්කුවේ රුවා ගත්තේය..

"මාර ස්වීට් වොයිස් ඕයි.. කතා කරද්දිත් ආසයි.. තමුසේ කොහොමද ඔච්චර ළඟින් ඉඳන් ඉවසන් ඉන්නේ.. හෙහ් හෙහ්.." ඉන්පසු දෙදෙනා අතර ඇතිවූයේ තනිකරම නොහොබිනා කතාවකි.. මත් වතුරින් ගාණට රත්වී සිටි දෙදෙනා වචන වලින් ඈව නිරුවත් කරන්නත් ඈ හා රමණයේ යෙදෙන්නත් එකිනෙකාගේ ඒ විශයෙහි 'ලොකුකම්' කතා කරන්නත් විය. සුරුට්ටු බොන්න ගිය ලෙනාඩ්ට වෙරි මතින් බෝට්ටු ඇණියේම නින්ද ගොස් සිටි අතර දුරකතනයට පිළිතුරු දීම සඳහා ඉවතට ගිය තරුණ පොලිස් නිළධාරියා නැවත එමින් සිටි නිසා පහත් හඬින් මෙසේ පවසා සෙනෙවි ඒ කතාව හමාර කලේය.

"ඔන්න බලපං ජයේ.. මම ඕකිට ළඟදිම ගහලා උඹටත් ගහන්න සෙට් කරේ නැත්නම් මම සෙනෙවි නෙවෙයි.."

*****************************************************

සෙනසුරාදා දිනයේ වැඩිමනත් වේලාවක් කොළඹ තාවකාලික නවාතැනේ රැඳී හුන් දේවා ඉරිදා උදෑසනින්ම සිය නිළරථයෙන්ම ත්‍රිකුණාමලයට යාමට පිටත් විය. ඉරිදා උදයෙන්ම ත්‍රිකුණාමල වරායට ළඟාවීමට නියමිත පර්ල් කෲස් මගී නෞකාවෙන් ඔහුගේ මස්සිනා දර්ශන්, දර්ශන් ගේ පාසැල් මිතුරු කජුමුගන් හෙවත් කජන් සහ තවත් යාපනේ පාසැල් වලින් මොරටුව විශ්ව විද්‍යාලයේ ඉංජිනේරු පීඨයට තේරුණු සිසුන් දෙදෙනෙකු යාපනයේ සිට ත්‍රිකුණාමලයට ළඟාවීමට නියමිතය. නාවික හමුදා ආරක්ශක පටිපාටීන්ට අනුකූලව ඔවුන් සාමාන්‍ය පරිදි 'ක්ලියර්' කොට හමුදා වාහනවලින් ත්‍රිකුණාමල බස් නැවතුම්පොල වෙත ගෙනත් ඇරලන තෙක් සිටියොත් එතනටම දවල් එක දෙක වනු ඇත. එතනින් සාමාන්‍ය බස් රථයක කොළඹ පැමිණීමට ගියොත් මාර්ග බාධක අවහිර මැද මධ්‍යම රාත්‍රිය ආසන්න වන තෙක්වත් ඔවුනට කොළඹට ඒමට නොහැකි වනු ඇත. දේවා මේ පිළිබඳව ඔහුගේ හිතවත් නාවික නිළධාරියෙකු හා කතා කිරීමෙන් අනතුරුව ඔවුන් සිව් දෙනාව මුලින්ම නිශ්කාෂණ කටයුතු සඳහා යොමු කිරීමටත් ඒ කටයුතු අවසන් වූ සැණින් ඔවුන් නාවික තඨාකාංගන ගේට්ටුවෙන් එළියට එවීමටත් එකඟ කරගත හැකි විය. කෙසේ වෙතත් මේ සඳහා අවම වශයෙන් උදෑසන දහය පසුවේ. එතැන් සිට සාමාන්‍ය බස් රථයක ආවත් රෑ හත අට වනතුරු ඔවුන්ට කොළඹට ඒමට නොහැක. මේ හේතුව නිසා උදෑසන 10ට ඔවුන්ව තටාකාංගණ ගේට්ටුව අසලින් ගෙන හැකි ඉක්මණින් කොළඹට රැගෙන ඒමට සිය වාහනයෙන් ත්‍රිකුණාමලයට යාමට දේවා යොදා ගත්තේය.

කෙසේ හෝ අද දිනය තුල මොවුන් සිව්දෙනා වැල්ලවත්තේ අලුතින් කුළියට ගත් මහල් නිවාසයේ 'සෙට්ල්' කර දේවා හෙට උදේම නැවත කිලිනෝච්චි යා යුතුය. නිවස ගත් නිසාත් තමා අද කොළඹ සිටින නිසාත් හදිසියේම මොවුන් අද කොළඹ ගෙන් වූයෙත් දේවාගේම උවමනාවටයි. කැම්පස් පටන් ගැමීමට තව සතියක කාලයක් තිබුණද ඒ සතිය තුල දකුණේ ජීවිතයට ඔවුන් හුරුවී සිටීම යහපත් බව දේවා සිතුවේය. අනිත් තිදෙනා කෙසේ වෙතත් දර්ශන් කෙරෙහි දේවාගේ විශේෂ වගකීමක් පවතී. ලේ නෑ කමෙන් මෙන්ම විවාහයෙන්ද තමාගේ මාමණ්ඩිය වූ ඉලෙයිරාජා මහතා මියයාමට මත්තෙන් සිය එකම පුතණුවන්ගේ අනාගතය දේවාට බාර දුන්නේ මහත් වූ විශ්වාසයකිනි. ඉතා දක්ශ කඩවසම් තරුණයෙකු වූ දර්ශන් උසස්පෙළ කඩයිම ඉහළින් සමත්වී විදුලි හා විද්‍යුත් ඉංජිනේරුවෙකු වීමේ අරමුණින් මොරටුව විශ්ව විද්‍යාලයට තේරී පත්වී සිටී. 

හබරණ තානායමෙන් උදේ ආහරයද ගෙන තව දුරටත් ත්‍රිකුණාමලය දෙසට ඉදිරියට ආ දේවා හතරැස්කොටුව ප්‍රධාන හමුදා මාර්ග බාධකයේදි සිය හැඳුනුම්පත පෙන්වා වාහනය පසෙකට කොට නතර කලේය. මෙහි අළුතින් පත්ව ආ ස්ථාන බාර නිළදාරිවරයා පෙර වන්නි කළාපයේ සේවය කළ අතර කිහිප වරක් දේවාට හමුවී ඇත. ආපසු ඒමේදි යාපනේ ද්‍රවිඩ තරුණයින් හතර දෙනා මෙම ස්ථානයේ ලියාපදින්චි කළ යුතුයි. ඒ කටයුතු පහසු කරගැනීමට මේ නිළදාරියා හමුවී පෙර හිතවත්කම් අලුත් කරගතයුතුයැයි දේවා සිතුවේය.

අදාළ නිළධාරියා හමුවී තමාව හඳුන්වාදුන් පසු ඔහුව හඳුනාගත් නිළධාරියා දේවාව සුහදව පිළිගත්තේය. දේවා තමන්ගේ අවශ්‍යතාවය කෙළින්ම ඔහු වෙත ඉදිරිපත් කලේය.

"ඩොකියුමන්ට් ක්ලියර් නම් කිසි ප්‍රශ්ණයක් නැතුව රෙජිස්ටර් කරගෙන යන්න පුලුවන් මිස්ටර් දේවනායගම්"

"නෑ නෑ.. එහෙන් පොලිස් ක්ලියරන්ස් අරගෙන අයිඩී කාඩ් ඔක්කොම අරගෙන එන්නේ. කැම්පස් එකේ කැඳවීමේ ලිපියත් තියෙනව. මම වැල්ලවත්තේ ගෙදර ලෑන්ඩ් ලෝඩ්ගෙන් ලියුමක් අරගෙන කොල්ලො හතර දෙනාගෙ නම් දාල පොලිසියෙන් කවුන්ටර් සයින් එකකුත් ගෙනත් තියෙන්නේ. මම බැලුවේ මේ.. මම ආපහු හෙට උදේම කිලිනොච්චි යන්නත් ඕනි නේ.."

"ආ.. ඔය තියෙන්නේ ඕනි කරන ඔක්කොම.. ඔයා ඉතින් එසෙන්ශල් සර්විස් එකේ නිසා ඔය ගැන හොඳටම දන්නවානේ.. ආපහු එනකොට මට පොඩ්ඩක් කියන්නකො. හදිසියේ මම ස්ටේශන් එකෙන් පිට හිටියොත් සෙට් එකේ ගන්න කියල චෙක් පොයින්ට් එකේ සාජන්ට් ට කියන්න.. මම පරක්කු නොවී වැඩේ කරවලා දෙන්නම්.."

ඔවුන්ගේ කතාව අතරතුර ඛනිජ තෙල් සංස්ථාවට අයත් රතු පැහැති තෙල් බවුසර් විශාල ප්‍රමාණයක් කඩින් කඩ පැමිණ මුරපොළේ නවත්වා 'ක්ලියරන්ස්' ගෙන ත්‍රිකුණාමලය දෙසට පිටව යනු දෙදෙනාම නිරීක්ශණය කලේය.. දේවා ඒ දෙස උනන්දුවෙන් බලා සිටිනු දුටු නිළධාරියා..

"ඔයාලගෙ බඩු.." යනුවෙන් සිනාසී පැවසීය.

"ඔව්. මම පෙරේදා ඕවයේ ඩොකියුමන්ට් වැඩ වලටත් හෙල්ප් කරා..තව සති දෙකකින් අපිට එන්නේ. මේ දවස්වල එහෙ තෙල් නිකං රත්තරං වගේ.." යයි සිනහාවෙමින් ඊට පිළිතුරු දුන්නේය. අවසන් බවුසරයද පිටව ගොස් සුළු වේලාවකින්..

"මම එහෙනම් ගිහින් එන්නම්.. දහය වෙනකොට ඩොක්යාඩ් ගේට් එක ගාව ඉන්නෝනි. නැත්නම් කොල්ලො ටික අනාථ වෙනවා.." කියා හමුදා නිළධාරියාට සමුදී දේවා සිය රථයේ නැගී වේගයෙන් ඉගිල ගියේය.

***********************************************

හතරැස්කොටුව මාර්ග බාධකයේදි සියලු ලිපිගොනු ඉදිරිපත් කර ලියාපදිංචි වූ මහේෂ්  නැවත සෙමෙන් සෙමෙන් බවුසරය පාරට ගෙන හබරණ කන්තලේ මාර්ගයේ ධවනයේ යෙදෙන්නට විය. ඔහුට පිටුපසින් තව එක බවුසරයක් පමණක් පැමිණීමට නියමිතය. ඔහු පිටත්වන විටත් එය ලියාපදින්චිය සදහා එහි පැමිණ තිබූ හෙයින් ඔහු එය දක්නට ලැබෙන තුරු මදක් සෙමින් ධාවනයේ යෙදිනි.  

අලුත්ඔය හරියේ සිට කිතුල්උතුව දක්වා තද පාලු ප්‍රදේශයකි. දෙපස ඝන කැලෑව මීටර් දෙසීයක් පමණ පාරෙන් ඔබ්බට කපා දමා එළිකර ඇත්තේ හමුදා වාහන වෙත එල්ලවෙන ක්ලේමෝ බෝම්බ ප්‍රහාරයන්ගෙන් වැළකීමටයි. තැනින් තැන පිහිටි හමුදා අනුඛන්ඩ හැර වෙනත් මිනිස් වාසයක් ඇස නොගැටේ. තැනින් තැන කඩතොළු වූ පාරේ ලීටර් දාහතරදහසක් පෙට්‍රොල් රැගත් දැවැන්ත බවුසරය ඕනෙවාට වඩා වේගයෙන් හෝ හෙමිහිට පැදවීම පහසු නොවේ. කෙසේ නමුත් මහේෂ් හැකි අවම වේගයෙන් පදවාගෙන යද්දි කිතුල්උතුව ආසන්නයේදි පිටුපසින් එන බවුසරය පැති කණ්නාඩියෙන් දක්නට ලැබිණි. ඉදිරියෙන් යන කිසිදු බවුසරයක සේයාවක්වත් පෙනෙන්නට නැත. 

මහේෂ්ලා අග්බෝපුර කුඩා කඩමණ්ඩිය පසුකරද්දි වේගයෙන් පැමිණි සුදු පාට වර්ගයේ ජීප් රථයක් ඔවුන් පසුකර ඉදිරියට ධාවනය විය. සියල්ල හොඳින් සිදුවේ. බර වාහන කන්තලේ වැව් බැම්ම උඩින් ධාවනය නොකරන නිසා මහේෂ් බන්ටෙකට පෙර තුන්මන්හන්දියෙන් කන්තලේ නගරය දෙසට බවුසරය හරවා ධාවනය කළේය. ඔහුට මීටර් සියයක් පමණ පිටුපසින් අනෙක් බවුසරයද පැමිණේ. කුඹුරුයාය මැදින් දිවෙන පාර ඉතා අලංකාරය. ඔවුන්ට බොහෝ ඉදිරියෙන් කන්තලේ නගරය ආසන්නයේ ඉදිරියෙන් යන බවුසරයක් දැකගත හැකිවූ අතර සුලු වේලාවකින්ම එය නගර මධ්‍යයයේ ගොඩනැගිලි අතර නොපෙනී ගියේය. ඊට පිටුපසින් සුදු පාට ජීප් රථය ධාවනය වනු කඩින් කඩ පෙනේ. පොතන්කාඩු මංසංධියට පැමිණි මහේෂ් කන්තලේ නගරය හරහා ත්‍රිකුණාමලය දෙසට දිවෙන පාරේ ඈතින් පෙනෙන ප්‍රාදේශීය සබා ගොඩනැගිල්ල දෙස බලා සුසුමක් හෙලා සැණෙකින් දකුණට හරවා අල්ල කන්තලේ මාර්ගය දිගේ බවුසරය පදවන්නට විය. ඒ පසුපසින් දෙවන බවුසරයද එම මාර්ගයේම ධාවනය කරවන්නට යෙදුන අතර ඒ ආසන්නයේ මාර්ගයක් අයිනේ වාහනයක හුන් පුද්ගලයෙකු සිය ජංගම දුරකතනයෙන් කෙටි පණිවුඩයක් පුද්ගලයින් කිහිප දෙනෙකු වෙත මුදා හැරියේය.

"Operation Alpha Romeo ii successfully done"

************************************************************

පසු සටහන..

"ඉන්ඩක්ශන් එකට රෙජිස්ටර් වෙන්න ගියාම"- Induction- යම් ආයතනයක මූලික නීති හා ආරක්ශක විධිවිදාන ගැන ආරම්භයේදි ලබාදෙන පුහුණුව- රියදුරෙකු ලෙස තාවකාලිකව සේවයට එක් වීමට පෙර මෙලෙස ලියාපදින්චි වී පුහුණුව ලැබිය යුතුය.

"retired Navy communicator" - නාවික හමුදාවෙන් විශ්‍රාම ගත් ත්තියෙන් සංඥාකරුවෙකු ලෙස සේවය කල අයෙක්. අනෙක් සාමාන්‍ය නැවියන්ට වඩා සංඥා අංශයේ නැවියන් පහසුවෙන් ඉංග්‍රිසි බාසාව හසුරවයි.

"රාජකීය ලංකා නාවික හමුදාව සමයේ"- Royal Ceylon Navy- 1972 ට පෙර ශ්‍රී ලංකා නාවික හමුදාව මේ නමින් හැඳින්විනි. 

 "Alpha Romeo"- කථන සංඥා භාශාවෙන් ඉංග්‍රිසි හෝඩියේ A අකුර alpha ලෙසත් R අකුර romeo ලෙසත් කියවයි. 

පසු පසු සටහන..

ඉතා කාර්‍යබහුල වුවත් ප්‍රීතිමත්ව ගතවූ මාර්තු මුල් සතිය තුල කතාව ලිවීම මඟහැරීම පිළිබඳව මාගේ බලවත් මෙව්වා එක.. නැවතත් (කෙළවෙනකං) කතාව සුපුරුදු වේගයෙන් හා රිද්මයෙන් ඉදිරිපත් කරනබව මෙහිලා පොරොන්දු වෙමි. ස්තූතියි!

ක.මි.

Sunday 26 February 2023

Check Point..! 5 වෙනි දිගහැරුම

4 වෙනි දිග හැරුමට..


මේ අතර සිකුරාදා දහවලෙහි වන්නි අඥාපතිවරයාගේ හදිසි කැඳවීමකින් පූනෑවේ සිට වවුනියාවේ ඒකාබද්ධ වන්නි ආරක්ශක සේනා මූලස්ථානයට ගිය නාවික හමුදාවේ උතුරුමැද නාවික ආඥාපතිවරයා එහි සිට නාවික හමුදා මූලස්ථානය සමඟ දිගු දුරකථන සංවාදයකි. අනෙක් පසින් නාවික හමුදා මූලස්ථනයේ නාවික පුද්ගල හා පුහුණු අධ්‍යක්ශක කාර්‍යාලයේ මාණ්ඩලික නිළධාරියෙක් සම්බන්ද වී සිටී..

"හෙලෝ.. මචං.. මම වන්නි Joint Operation Commanderගේ ඔෆිස් එකේ ඉන්නේ.. මම ඔයාගේ ඩිරෙක්ටර්ටත් කෝල් කරා.. මේ සීස් කරලා තියෙන ලොරියේ ඩ්‍රයිවර්ගේ ඩීටේල් වලින් හොයාගෙන ගියාම තමයි ගෙදරින් කියලා තියෙන්නේ මිනිහ MSR withdrawal එකේදි මිසින් වෙලා දැන් අවුරුදු 7ක් කියල. නේවි එකෙන් තවම පේ එකත් යනවලු අම්මලාට.. පදවි ශ්‍රීපුර ගම.. ලීඩින් පැට්‍රොල්මන් කෙනෙක් වෙන්නෝනි ගෙදරින් කියපු විස්තර හැටියට. XP 22 ගාණක් වගේ ඔෆීශියල් නම්බර් එක.. මේ ෆැක්ස් එකේ නම්බර් එක පැහැදිලි මදි.."

"...."

"ආ.. ඒ කියන්නේ හරි නේ.. RMAS රත්නායක.. අනුර සමන්ත රත්නායක නේ? Leading Patrolman.. කවදා ඉඳලද? අනූනවයේ දෙසැම්බර් 4 ඉඳලා.. Roger.. Copied. Thanks machan, I'll call you back if there is any further information is required"

"...."

"Good day buddy" නිළ දුරකථන ඇමතුමක් වුවද ඔවුන් දෙදෙනාගෙ සුහද කතා විලාශය යුධ හමුදා ජේෂ්ඨ නිළදාරියාගේ සිත් ගත්තේය. යුධ හමුදා කණිෂ්ඨ හා ජේෂ්ඨ නිළධාරීන්ට වඩා නාවික හා ගුවන් හමුදාවල නිළධාරීන් අතර දැන හැඳුනුම් කම් මෙන්ම සුහදතාවයද සාමාන්‍යයෙන් වැඩිය. ඒ ප්‍රමාණාත්මනකව ඔවුන් සුළු පිරිසක් වන හෙයින් විය හැක.

"හරි නේ සර් ඉන්ෆොමේශන් එක.. As per records at Navy headquarters; bugger is missing from December ninety nine. Still in the MIA list. "

"Oh.. fuck...! මොනවද මචං මේ වෙන්නේ? Now you tell me how to tell this to the top?" විශ්මයාර්තය මෙන්ම සෝපාහාසයද මුසු සිනහාවකින් නාවික නිළධාරියා දෙස බලා සිටි යුධ හමුදා නිළදාරියා ' ඔයත් ඉන්න. මම කමාන්ඩර්ට කතා කරලා ඉන්නම්' කියා තොරතුර දැනුම්දීම පිණිස යුධ හමුදාපතිවරයාව සම්බන්ද කර ගත්තේය. දීර්ඝ විස්තරයකින් අනතුරුව නැවත නාවික අඥාපතිවරයා දෙස හැරුණු නිළධාරියා..

"මචං, සර් කියන්නේ මේක ප්ලොට් එකක් වෙන්න පුලුවන් කියලා.. එනිවේ දැන් ඉන්ට් එකෙන් කන්ෆර්ම් කරලා තියෙනවා මේ මෙඩිකල් ඇන්ඩ් සර්ජිකල් අයිටම් තිබ්බ ට්‍රක් එක ටෙරා ල සීස් කරලා මුලතිව් වලට ගෙනියල තියෙනව කියල. එතකොට මේ ඩ්‍රයිවර්ගේ සීන් එකත් එක්ක පැහැදිලියි මේක ප්ලෑන් කරලා කරපු වැඩක් කියනෙක. ඩ්‍රයිවර් කෙනෙක් විදියට කාඩර් එකෙක් යැව්ව කියමුකෝ සප්ලයර් ළඟට. ඒත් කොහොමද මිනිහට හරියටම තමන්ට අවශ්‍ය කරන ට්‍රක් එකම ලැබෙන්නේ?"

"You mean some involvement from the supplier?"

"Got to suspect everyone neh? මේවා සප්ලයි කරන්නෙත් ඔස්ටින් පෙරේරලා නේද?"

"මම හිතන්නේ උන් දැන් ඩිවිශන් කඩලා තියෙනවා.. දැන් මාළු සම්පූර්ණයෙන්ම වගේ කරන්නේ අරුන් සෙට්ටෙකනේ.. සංජුලා.. ට්‍රින්කො වලින්.. මේ ට්‍රක් එක ඇවිත් තියෙන්නෙත් වත්තල ඒ වගේ සබ් එකකින් නේද? රෝහිත පෙරේරා මිනිස්ටර් උනායින් පස්සේ හැංගිලා නේ ගේම් එක ගහන්නේ.."

"හෙහ් හෙහ්.. Now you know where the problem is.. Anyway, You can brief this to Navy Commander too now. What my boss suggested is not to disclose any of these to unwanted. අර කොල්ලගෙ pay එක නවත්තන්නවත් පවුලේ උන්ව ඉන්ක්වයර් කරන්න යන්නවත් එපා දැන්ම. බලමු උඩින් මොකක්ද කියන්නේ කියල.."

"Definitely sir,  We'll have a separate inquiry on that from our end. I'll come back to you after discussing this with my commander."

"Thanks machan"

"Thanks sir, good day"

*********************************************

සිකුරාදා උදය වරුවේ තම හිත මිතුරු ත්‍රීකුණාමල දිස්ත්‍රික් අත්‍යාවශ්‍ය සේවා බාර නිළධාරියාගේ ඉල්ලීම මත ඔහු සමඟ සපුගස්කන්ද හා කොලොන්නාව තෙල් ගබඩා සංකීර්ණ වෙත ගිය අරුල් දේවනායගම් ඉරිදා දිනයේදි ත්‍රිකුණාමලයේ ගැටුම් සහිත ප්‍රදේශ වෙත ප්‍රවාහනය කිරීමට සුදානමින් සිටින අත්‍යාවශ්‍ය ඩීසල් හා පෙට්‍රොල් තොග පිළිබඳ ලියකියවිලි කටයුතු වලට ඔහුට සහයෝගය දැක්වීය. මාස හයකට පමණ පෙර තෙල් ගබඩා සංකීර්ණ වෙත එල්ලවූ ත්‍රස්ත ගුවන් ප්‍රහාර හේතුවෙන් ඒ වනවිටත් සපුගස්කන්ද හා මාකොළ අවටත්, කොළොන්නාව ගබඩා සංකීර්ණයේත් ආරක්ශාව ඉතා දැඩිකොට තිබුණි. මේ හේතුවෙන් දේවාගේ දැනහැඳුනුම් කම් හා ඔහුගේ සිංහල භාෂා කථන හැකියාව හැකි සෑම විටම ප්‍රයෝජනයට ගැනීමට මිතුරු ද්‍රවිඩ රජයේ නිළධාරින් නිතරම පාහේ ක්‍රියාකළහ.

මිතුරාගේ ඉල්ලීම් වලට සිනහාමුසුව උපකාර කල දේවා ඒ සියල්ල සහ සම්භන්ද කර දීමෙන් අනතුරුව සිය කැබ් රථයේ ප්‍රදර්ශණය කරමින් තිබූ 'අත්‍යාවශ්‍ය සේවා' පුවරව ඉවත් කර සැහැල්ලුවෙන් මොරටුව කටුබැද්ද දෙසට ධාවනය කරන්නට යෙදුනේ දවසේ යොදාගෙන තිබූ ප්‍රධානතම කටයුත්ත වූ සිය මස්සිනා ඇතුලු යාපනයෙන් මොරටුව සරසවියට තේරී පත්වූ ඉන්ජිනේරු සිසුන් සිව් දෙනාට සුදුසු නවාතැනක් සොයා දීමේ අදහසිනි. පත්තර වල තිබූ දැන්වීම් හා ත්‍රී රෝද රථ රියදුරන්ගෙන් ලැබුණු තොරතුරු මත නිවාස කිහිපයක්ම පරීක්ශා කලද සිය සිත්ගත් තැනක් ඒ අතර නොවීය. ඇත්තෙන්ම සමහර නිවැසියන් යාපනයේ දමිල සිසුන් සඳහා බව පැවසූ සැනින් නවාතැන් ලබාදීම කාරුණිකව ප්‍රතික්ශේප කළෝය. 

නුරුස්නා හැගීමෙන් පැය කිහිපයක් කටුබැද්ද අවට සැරි සැරූ ඔහු අවසානයේ කොළඹ අවට පදිංචි සිය ද්‍රවිඩ මිතුරෙකුගේ සහය පැතීය. 

"උඹට ඔෆර් කරන්න පුලුවන්නම් වැල්ලවත්තෙන් අපාර්ට්මන්ට් එකක් බලපං බං. වටේම ඉන්නේ අපේ උන්. කන බොන කෑම ටික පවා කොල්ලොන්ට පත්තියං වෙයි. ආරක්ෂාවත් හොඳයි. මම කන්ටැක්ස් දෙක තුනක් එවන්නං. කතා කරලා ගිහිං බලපං. ඔය උදේට හවසට පොඩ්ඩක් බස්සෙකේ යන එන එක මොකක්ද කොල්ලන්ට? උන්ටත් හොඳයි රටතොට දකින්නත් එක්ක" සත්‍යවශයෙන්ම තමාට එය එතෙක් මතකයට නොපැමිණීම ගැන දේවාටම පුදුමය. මුව පුරා මිතුරාට ස්තූති කල දේවා ඔහු දුන් හෝඩුවාවක් ඔස්සේ වැල්ලවත්තට ගොස් පරීක්ශා කල පළමු ගෙවල් තුනම ඔහුගේ හිත් ගත් නමුත් සදාරණ මිල, නිස්කලංක බාවය හා නිහතමානී අයිතිකරු හා කතාවෙන් පසු රාමක්‍රිශ්ණ පාරේ මහල් නිවාස සංකීර්ණයක බිම් මහලේ පිහිටි ඇටැච්ඩ් බාත් රූම් එකක් සහිත ලොකු කාමරයක් තවත් කොමන් බාතෘම් එකක් සමඟ කාමර දෙකක්, කුඩා පැන්ට්‍රියක් හා සාලය වැනි කොටසක් සහිත එම නිවස කුලියට ලබා ගැනීමට එකඟව අත්තිකාරමක්ද ලබාදී කොළබ පැමිණි විට තමන් නවාතැන් ගන්නා අත්‍යාවශ්‍ය සේවා ජනරාල් කාර්‍යාලයට අයත් නවාතැන් පොළ බලා පැමිණියේ සාර්ථක දවසක නිමාව සනිටුහන් කරමිනි. 

***********************************************

දවසේ අවසන් ටර්න් එකට බස් රථය කොට්ටාවෙන් පිටත් වූ සැණින් මහේෂ් සමීරට කියා බස් රථයේ දුරකථනයෙන් අයිතිකරුගේ නිවසට ඇමතුමක් ලබාගත්තේය. 

"මහත්තය මට හෙටයි අනිද්දයි පොඩි නිවාඩුවක් ඕනී" එසැණින් බස් රථ හිමියා ඔහුගේ ඇඟට කඩා පැන්නේය.

"උඹ ඊයෙයි පෙරේදයිත් නිවාඩු නේද? මහේෂ් ඇත්ත කියපං. උඹට රස්සාව කරා ඇතිද? බස් එකෙන් බහින්න ඕනි නම් ඒක කියල මං එකෙක් හොයාගන්නකං ඉඳල මහත්තයෙක් වගේ බැහැපං. උඹට මම කියලානේ රස්සාව දුන්නේ.. මට තව වැඩ තියෙනවා. මට බෑ උඹේ කුණු අදින්න කියන කියන වෙලාවට"

"එහෙම එකක් නෑ.. අම්මට සනීප නෑ. පොඩි උන් තුන්දෙනාව බලන්න එකෙක් නෑ. මහත්තය දන්නවනේ. හෙට රෑ වෙන්න කලින් මම උන් ගාව ඉන්නෝනි. මහත්තයට බැරිනං හෙට ඉඳලම එකෙක් හොයාගන්න බස් එකට.. මම බහින්නං"

"උඹලගේ ඔය ඝනකම රස්සාවල් ඉල්ලගෙන එද්දි නෑනේ බං. හෙට මම ඩ්‍රයිවර්ලා මවන්නයැ. මට හෙට උදේ ලොකු වැඩක් තියෙනව.. උදේ ටර්න් එක ඇවිත් යන ගමන් මහරගමදි මට බස්සෙක දීල උඹ යන දේවාලෙක පලයන්." ඔහු තම අවසාන තීරණය එසේ ප්‍රකාශ කරද්දි කිසිත් නොකී මහේෂ් ෆෝන් එක කට් කර සමීර අතට දුන්නේය. 

"ඇයි මහේෂයියා.. මොකක්ද අවුල.. උඹ හෙටත් නිවාඩුද?"  කිසිවක් හරි හැටි නොතේරුණු සමීර මහේෂ් ව විමසා සිටියේය. එයට 'ඔව්' යනුවෙන් හැඟවෙන පරිදි ඔළුව පමණක් වනා ඉදිරිය බලාගෙන ලොකු කල්පනාවකින් වාහනය පදවන මහේෂ් දෙස බලාසිටි සමීරට වැටහුණු එකම දෙය වූයේ ළඟදීම මහේෂ් මොකක් කෝ 'ලොකු පිම්මක්' පනින්න යනවා කියා පමණකි.

'දරුවන් බලන්න යනවා'යි එවලේ කටට ආවාට කියුවාට මහේෂ් හිටියේ ඒ ගැන ඇත්තටම වද වෙමිනි. මුසාවකින් හෝ සිය දරුවන් මේ දේට ඈඳා ගැනීමට ඔහුගේ හිත් නොදේ.. ඔහු සිය දියණියන් දෙදෙනාටත් පුතාටත් බොහෝසෙයින් ඇලුම් කරයි. දරුවන්ද ඔහුට බොහෝ ලෙන්ගතු වෙති. විශේෂයෙන් බාල දියණියට සිය මව පිළිබඳ එතරම් මතකයක් නැත. මහේෂ් ගේ බිරිඳ ඔහු හැරදා ඇගේ මව වෙසෙන සයිප්‍රසයට පලායනවිට ඇගේ වයස යන්තම් වසර එක හමාරකි. මහේෂ්ගේ බිරිඳගේ මව හෙවත් ඔහුගේම පුංචි අම්මා සෑහෙන කාලයක සිට සයිප්‍රසයේ සේවය කරයි. 'ඈ එහෙන් පවුල් වෙලා'යි ගමේ බොහෝ දෙනා පැවසුවද ඈ වසර දෙකකට පමණ සැරයක් ලංකාවට විත් මාසයක් හමාරක් ගතකොට යයි. වැඩිමල් දියණිය ඉපදුන පසුව තෙල්දෙණියේ මුදලාලිගේ පවුලද සමඟ මහේෂ්ලා මුලින්ම නැවත ගෙදර පැමිණි දිනයේද ඈ එසේ නිවසට පැමිණ සිටියාය. ඇගේ මැදිහත්වීම මත එදා මහේෂ්ලාට නැවත පවුල හා ඉක්මණින් සම්භන්ද වීමටද හැකියාව ලැබුණි.

මහේෂ් මුදලාලිගේ බසයේ වැඩකල ඉදිරි වසර හතරක පමණ කාලයේදි ඔවුන්ට තවත් පුතෙකු හා දියණියක ලැබුණි. බාල දියණිය ඉපදීමෙන් අනතුරුව මහේෂ්ගේ බිරිඳ යම් පසුප්‍රසව මානසික ආතතියකට ගොදුරු වූවාය. කීපවරක් හසලකින් මහියංගණයෙන් මෙන්ම බදුල්ල මහ රෝහලෙන්ද ප්‍රථිකාර ගත් නමුත් ඇගේ නොසන්සුන් තත්ත්වය සම්පූර්ණයෙන්ම පහ වූ බවක් දක්නට නොලැබිණි. මහේෂ් හා නිතර අඩදබර කිරීම වැඩිමල් දියණියට නිතර බැණ වැදීම, ළමයින්ගේ කටයුතු පමණක් නොව ඇතැම් විට ඉවුම් පිහුම් කටයුතු පවා අතපසු කිරීම් නිතර දක්නට ලැබිණි. මේ අතර ඇගේ මව ලංකාවට ආවාය. ඈ සිටි මාස එකහමාරේ නිවසේ තත්ත්වය බොහෝසෙයින් සාමකාමී වූ අතර මව හා දුව සහයෝගයෙන් කටයුතු කරගෙන යනු දක්නට හැකිවිය. නිවාඩුවෙන් පසු මව නැවත සයිප්‍රසය බලා ගමන් කිරීමෙන් පසුව වුවත් මහේෂ්ගේ බිරිඳ සෑහෙන හොඳින් නිවසේ කටයුතු කරගෙන යෑම මහේෂ්ට ඉමහත් සැනසිල්ලක්ම වූයේය.

නමුත් රහසේ යමක් සිදුවෙමින් පැවතී තිබිණි. බදුල්ලේ ක්ලිනික් එකට යනවා කියා එක් දිනක් ගෙදරින් පිටව ගිය ඇය යළි නිවසට නොආවාය. පසුව දැනගත් පරිදි ඈ ඇගේ මව සමඟ රහසිගතව කතිකා කොටගෙන මහේෂ් හා දරු තිදෙන අතහැර මව වෙසෙන සයිප්‍රසයට පලාගොස් තිබිණි. මහේෂ් දරුවන් තිදෙනා සමඟ නිවසේ තනිවිය. කොතරම් ආඩපාලි කීවත් අවසානයේ දරුවන්ගේත් මහේෂ් ගේත් පිහිටට ආවේ ඔහුගේ මවයි. මිත්තණිය හා දරුවන් අතර සම්භන්දය වර්ධනය වෙන තෙක් මහේෂ් නිවසේ නතරවිය. හඳුන්ගොමුව බස් රථයේ රියදුරුකම හමුදාවේ සිට විශ්‍රාම ගොස් සිටි ඔහුගේම මාමාට පවරන ලදී. ටික දිනකින් නිවසේ අගහිඟකම් දැඩිවූ බැවින් මිතුරෙකුගේ මාර්ගයෙන් හෝමාගම පිටකොටුව බස් රථයකට සම්භන්ද වීමට ඔහු කොළඹ ආයේය. දරුවන්ගේ විය හියදම් වෙනුවෙන් සති දෙකකට වතාවක් ඔහු ඔහුගේ වියදමට ගන්නා මුදලක් හැර ඉතුරු මුදල් සියල්ල මවට යවයි.

බස් රථ රස්සාවෙන් කොතරම් හම්බ කරත් ඉතිරියක් නැත. මහේෂ් අවසන් වතාවට ගමට ගියේ මින් මාස එක හමාරකට පමණ පෙර සිය වැඩිමල් දියණියගේ වැඩිවිය පැමිණීමේ උත්ස්වයටයි. පඩියට අමතරව බස් රථ හිමියාගෙන් ලැබුණු රුපියල් තුන් දහසක මුදලින් සහ සමීරගෙන් එපා කියද්දි ලැබුණු රුපියල් දෙදහසක මුදලෙනුත් පුංචියට උත්සවයක් ගෙන එහි කටයුතු නිමා කරගැනීමට හැකිවිය. මාමාගෙන් ආරංචිය ලැබී අනාරාධිතවම පැමිණි තෙල්දෙණියේ මුදලාලි හාමිනේ දියණියට පුංචි ලස්සන කරාඹු ජෝඩුවක් තෑගි කලාය. එතෙක් ඈ පැළඳ සිටියේ සිය මිත්තණියගේ දෙකණේ තිබු පරණ මෝස්තරයේ ලොකු අරුංගල් දෙකයි.

ඇගේ මැදිහත්වීමෙන් එකතු කල මහේෂ්ගේ සුන්දර පවුලට වූ විනාශය පිළිබඳව තෙල්දෙණියේ හාමිනේ බොහෝ පසුතැවිල්ලෙන් උන්නාය. ඈ මහේෂ් ළඟට කැඳවා ළමයින් වෙනුවෙන් ඉටුවිය යුතු යුතුකම් හා වගකීම පිළිබඳව බොහෝ වේලාවක් උපදෙස් දුන්නාය. කන්න බොන්න දෙනවා පාසැල් යවනවා යන්න හැර ඒවාගේ දේ ගැන මෙතක් මහේෂ්ටවත් කිසිවක් කල්පනා වූයේ නැත. සල්ලි කීයක් හෝ ඉතිරිකර වැඩිමල් දියණියගේ කරට මාලයක් සාදා දැමිය යුතුය, මාස් පතා දරුවන් වෙනුවෙන් යමක් ඉතුරු කල යුතුය වැනි අදහස් මහේෂ්ගේ ඔලුවට දැමුයේ ඇයයි. ඒ විතරක් නොව ඈ යන්නට පෙර මහේෂ්ට හොඳ තැනකින් තව කසාදයක් පවා කතාකිරීමට තමා අදිටන් කරගෙන සිටිනා බව ඔහුගේ මවට පැවසුවාය.

මහේෂ් තලඑළෙළුය.. කොළඹ කාස්ටක අවුවේ රත්වෙන බස් රථයේ දවස මුළුල්ලේම ගත කරන හෙයින් ඔහු දැන් තවත් කළු වී ඇතැයි සිතේ. කුඩා කල සිටන් වත්තේ කුඹුරේ වැඩ කිරීමෙන්, ඇලේ දොලේ කොල්ලන් සමඟ තරඟයට පිහිනීමෙන් මෙන්ම කරදඬු උස් මහත් වූ දා පටන් වාහන ස්ටියරින් වීල් හා ඔට්ටු වීමෙන් ඔහුගේ සිරුරේ ප්‍රමාණයට සාපෙක්ශව උඩුකය හොඳින් වැඩී තිබේ. පළල් උරහිස් සමඟ අත්වල හා බෙල්ලේ මාංශපේශී හොඳින් වැඩී තිබීම හැර මහේෂ් ප්‍රාංශු දේහදාරියෙකුයැයි කිවහැකි පුද්ගලයෙක් නොවේ. රිය පදවනවිට ඔහුගේ අපිළිවෙලට වැවුණු රැවුල් ගස් මැදින් පේන කළු මුහුණේ හා විශේෂයෙන්ම ඇස් දෙකේ අමුතු කාන්තියක් ඇත. අනෙක් වේලාවට මුහුණ හැඟීම් විරහිත බවක් පෙන්වයි. හෝමාගම බසයේ වැඩ කරද්දී මෙන්ම කොට්ටාව බසයේ වැඩ කරද්දීද සමහර මගී කාන්තාවන්ගේ ඇල්මට බැල්මට මහේෂ් ලක්වූ අවස්ථා නැත්තේ නොවේ.. පෙර දිනයේ සමීර මතක් කල සුදු මහත කාන්තාව ඉන් එක් අයෙකි. ඈ ගැන සමීරගේ හැඳින්වීම මතක් වී මහෙෂ්ට සිනහවක් පහළ විය. එහෙත් සිනහවකින් බැල්මකින් එහාට කිසිදු කාන්තාවකට මහේෂ්ගෙන් ප්‍රතිචාරයක් ලැබී නැත. ඇත්තටම ඔහු බිරිඳගේ අත්දැකීමෙන් පසු කාන්තාවන් කෙරෙහි යම් බයකින් පසුවෙන්නා සේ පෙනේ.

"මල්ලි.." මහේෂ් ලෙහෙසියෙන් සමීරට මල්ලි කියා අමතන්නේ නැති බැවින් සමීර විශේෂයෙන් හිස ඔසවා ඔහු දෙස බැළුවේය. 

"ටවුන් හෝල් බහින්න.. ටවුන් හෝල්.. සලාකා.. ඇස්වාට්ටුව.. ඉබ්බන්වල ඔක්කොම මෙතනින් බහින්න.. ආයේ නවත්තන්නේ යූනියන් ප්ලේස්.. මඟ නවත්තන්න බෑ.. පොලිසියෙන් ලියනවා.. කරුණාකරලා ඔක්කොම බැහගන්න.. ආ.. හරි යං හරී...ඊ" මාරුවෙන් මාරුවට මහේෂ්ගේ මූණ දෙසත් පිටුපස දොර දෙසත් බලමින් කෑ ගැසූ සමීර බස් රථය ඉදිරියට ඇදෙද්දී තවත් අඩියකින් මහේෂ් වෙත කිට්ටු විය..

"මම හෙට උදේ ට්‍රිප් එකෙන් පස්සේ බැස්සම දවස් තුන හතරකට එන එකක් නෑ. සමහරවිට ආයේ කවදාවත්ම එන එකක් නෑ. අඟහරුවාද බදාද වගේ වෙනකං බලල උඹ හොඳ එකෙක් හොයල ලොක්කට සෙට් කරපං.. අර 255 වැඩ කරපු පච්චය මම හිතන්නේ දැන් බැහැල වාහනයක් හොයනව.. ඌට කලින් මේ රූට් එක පැදල පාරත් හුරුයි. ඌව හරි බලපන් සෙට් උනොත්"

"මොන හුයන්නක්ද ඕයි තමුසේ මේ කියන්නේ? තමුසේ හෙට ගෙදර නෙවෙයිද යන්නේ.. මොකක්ද මේ තමුසෙට දවස් දෙක තුනක ඉඳලා වෙලා තියෙන්නේ? මහේෂයිය කියපං මට.. උඹට මට කියන්න බැරි දෙයක් නෑනේ.."

"කියන්නං දවසක.. දැනට උඹ ඔය මම කියපු එක ඔළුවට ගනිංකෝ"

********************************************

ඉතිරිය ඊළඟ කොටසින්..

පසු සටහන- සමහර මීලිටරි වචන නොතේරෙන එක කියවන්න බාදාවක් කියල පොඩි පොඩි කොමෙන්ට් ටිකක් ආව නිසා මේ පහලින් පොඩි එක්ස්ප්ලනේශන්ස් ටිකක් දාන්නේ. (ඒක මම එච්චර කැමති වැඩක් නම් නෙවෙයි.)

මේක දිගට යන කතාවක්.. කොටසෙන් කොටසට තේරුම් ගන්න උත්සාහ කරන්න එපා. සිද්ධි ටික අධ්‍යයනය කරගෙන යද්දී එකින් එක හාවෙන හැටි පෙනෙයි. තාම මේක තියෙන්නේ ඉම්ටෙලිජන්ස් උනුත් හොයන මට්ටමේ. ඉතින් කොහොමෙයි කියවන උන්ට කතාව තේරෙන්නෙ..

කොමෙන්ට් විදියට පේන අඩුපාඩු නිවැරදි වෙන්න ඕනි තැන් අපහැදිලි තැන් දානවානම් බොහොම අගෙයි

කියනව හැමෝටම ස්තූතියි! 

Joint Operation Commander- ඒකාබද්ධ මෙහෙයුම් අණදෙන නිළධාරී (ත්‍රිවිධ හමුදාව, පොලිසිය හා සිවිල් ආරක්ශක බළකාය සම්බන්ධීකරණය කරමින් ඒ ඒ හමුදා කළාප වලට අණදෙන ජේෂ්ඨ හමුදා නිළදාරියායි. බොහෝවිට යුධ හමුදාවේ මේජර් ජෙනරාල් වරයෙකි)

MSR withdrawal- MSR හෙවත් Main Supply Root යනු ක්‍රියාන්විත ප්‍රදේශයකට අවශ්‍ය ද්‍රව්‍ය ප්‍රවාහනය කිරීම සඳහා යුධ කළාපය හරහා පවත්වාගෙන යනු ලබන හමුදා පාලන ප්‍රදේශයකි. වව්නියාව හා උතුර අතර මෙලෙස පවත්වාගෙන ගිය සප්ලයි රූට් එක 1999 දී දැවන්ත ත්‍රස්ත ප්‍රහාරයකින් විනාශ වී ගිය අතර එහිදී බොහෝ හමුදා සාමාජිකයින් පිරිසක් ජීවිතක්ශයට හා අතුරුදහන් බවට පත්විණි. ත්‍රස්ත ප්‍රහාර හමුවේ හමුදා පසුබැස යාම withdrawal ලෙස හඳුන්වයි.

Leading Patrolman- නායක නාවික සෙබළ (යුධ හමුදාවේ කෝප්‍රල් තනතුරට සමාන නාවික හමුදා සෙසු නිලයකි)

Roger- සංඥා භාශාවේදී යම් පණිවුඩයක් නිසි ලෙස ලබාගත් බව පැවසීම සඳහා යොදා ගන්නා පදයකි.

MIA list- Missing in Action list (ක්‍රියාන්විතයේදී අතුරුදහම් වූවන්ගේ නාම ලේඛනය)


-ක.මි.

Thursday 23 February 2023

Check Point..! 4 වෙනි දිගහැරුම

3 වෙනි දිග හැරුමට..


"ආ.. නගින්න.. හොඳේක.. දිගේක.. වේගෙන් යනේක.. ඔට්ටා..ඔට්ටා..ඔට්ටාව්...අ" 

"ආ.. ඕම නගින්න.. ගෙඩවෙන්න..ගොඩවෙන්න.. ටවුනෝල්.. කිල්ලපන.. නුගේ..ඩ..මාරගම..ඔට්ටා..ඔට්ටා..ඔට්ටා...ව්..අ" බැස්ටියන් මාවතෙන් හරවා ගත් සැනින් ටයිම් එක දාගෙන පසුපස දොරේ තනි අතින් එල්ලී සමීරයා කෑගසයි. ඔහුගේ කෑගැසීමේ අමුතු රිද්මයක් ඇතැයි මහේෂ්ට සිතේ.. මේ වෙලාවට කොටුව ස්ටේශන් එක ඉස්සරහා බස් පොදියකි. එයින් අවම බස් 5ක් හෝ හයක් මහරගම, කොට්ටාව, හෝමාගම හෝ රුක්මල්ගම දක්වා දිවෙන 138 බස් වේ. බස් රථයට සෙනග නංවා ගැනීම රියදුරාගෙ හා ගෝලයාගේ දක්ශතාවය මෙන්ම වාසනාව මතද තීරණය වන තියුණු තරඟයකි. එය එක්තරා ආකාරයක විනෝද ක්‍රීඩාවකි. ජයග්‍රාහකයා සතුටු වේ. පරාජිතයා ඊළඟ නැවතුමේදි ජයග්‍රහණය කිරීමේ අරමුණෙන් ධාවනයේ යෙදේ. කිසිවෙකුට විශාල වාසි හෝ විශාල අවාසි නැත. ජයගහණය තීරනය වන්නේ ඉතා කුඩා ඉලක්කම් වලිනි. ඒත් කම්ප්ලේන් නැත. සියල්ලෝම ධාවනයේ යෙදෙති. 

බස් රථය දවසේ පළමු ටර්න් එකට කොට්ටාව දෙසට ඇදේ.. රීගල් හෝල්ට් එක පසුවෙද්දි සීට් ගාණට සෙනග වාඩිවී ඇත. එය හොඳ ආරම්භයකි. උදෑසන බස් රථයට නැගි විගස ස්ටියරින් වීල් එක, රියදුරු අසුන හා ඒ අවට පිස දමා හඳුන්කූරු දෙකක් දල්වා හොඳින් සුවඳ වදින තැනක ගැසීම මහෙෂ් විසින් පුරුද්දක් ලෙස කරයි. ඉදිරිපස වීදුරුවලට හා පැති කණ්නාඩි වලට වතුර ගසා පිරිසිදු කර බස් රථයට නගින සමීර සිය ටිකට් කඩන යන්ත්‍රය මෙම හඳුන්කූරු අසල තබා ඊට වඳියි. මේවා කවදා කෙසේ පුරුදු උනාද නොදන්නා නමුත් දෛනිකව ඒ දේ සිදුවේ. බුද්ධ රූපයක් හා තවත් දෙවිරූප රැගත් ෆ්‍රේම් කරන ලද රූප පෙළක් ඉදිරිපස ඉහළින් එල්ලා ඇතත් ඒවාට වැඳීමක් හෝ දුම් ඇල්ලීමක් කෙරෙන්නේ නැත. ඒත් ඉන්දියන් හඳුන්කූරු වලින් එන ශාන්ත සුවඳ ඉදිරි දවසේ ඔවුන්ගේ ගිණිකන ජීවිතයට යම් මානසික සුදානමක් ඇති කරවන සෙයකි.

මහේෂ් හෝ සමීර තවම උදෑසන ආහාර කිසිවක් ගෙන නැත. පුරුද්දක් ලෙස හිස්බඩ බොන වතුර වීදුරුව පමණක් පානය කර ඔවුන් පළමු ටර්න් එක පිටකොටුවේ සිට කොට්ටාවට යති. උදෑසන ආහාරය ලබා ගැනීමට සමාන්‍යයෙන් ඔවුන් දෙදෙනාම කොට්ටාවේ පොල් අතු බත් කඩයට යති. මහේෂ්ට පුරුද්දට මෙන් උදේට රතු    බත් ඕනෑ වේ. සමීර නම් බොහෝවිට ඉදියප්පන් හෝ පාන් කෑමට ගනී. කෑම වෙනුවෙන් දෙදෙනාට දිනක ආදායමෙන් රුපියල් දෙසීයක් වෙන් කරගත හැක. උදේ දවල් දෙවේල සඳහා රුපියල් දෙසිය පනහක් පමණ වැයවෙන අතර මදිපාඩුව ටිකට් කඩන අතර සමීර එහෙමෙහෙ කර ගනී. දවස හොඳ වූ කල එයිට අමතරව තව රුපියල් සීයක් හමාරක් අමතරව උපයා ගැනීමට හැක. ඒවා දෙදෙනාගෙ බුලත් විට සිගරට් අවශ්‍යතා වලට ප්‍රමාණවත් වේ. මහේෂ් ගේ දෛනික වැටුප රුපියල් නවසීයකි. සමීරට රුපියල් පන්සීයකි. එය සති දෙකකට වරක් ලබා ගත හැක. දෛනික වියදම් සඳහා අවශ්‍ය වුණත් නොවුණත් ඔවුන් දෙදෙනාම සිය වැටුපෙන් දිනකට ‍රුපියල් එකසිය පණහා බැගින් ලබා ගනිති. ඒ මුදලද කෙසේ හෝ වියදම් වේ. 

කොට්ටාව බසයේ සේවයට එක්වී නොබෝ දිනකින් නාවින්නේ කිත්තා හෙවත් කීර්ති, මහේෂ් ව සොයා ආයේය. කීර්ති යනු කිරුළපන නුගේගොඩ ප්‍රදේශයේ සිට හෝමාගම කොට්ටාව දක්වා පාතාල බලය පතුරුවාගෙන සිටි කිරුළපන ජගත්ගේ ප්‍රධාන ගෝලයෙකි. සෑම බස් රථයකින්ම මහරගමදි ජගත්ගේ නියෝජිතයාට කප්පමක් ගෙවිය යුතුය. ඒ වෙනුවෙන් ඔවුහු එම මාර්ගයේ බස් රථ ධාවනය නොනිළ ලෙස පාලනය කරති. ප්‍රධානම දෙය දුරගමන් සේවා බස් රථ මගින් මගීන් ඩැහැගැනීම පාලනයයි. තවදුරටත් ව්‍යාප්ත වූ ජාලයක් වූයේ වැල්ලවාය තණමල්විල ප්‍රදේශ වල සිට එන කංසා එකතු කර කොළඹ හා ඒ අවට බෙදා හැරීමයි. දුර පලාත් වලින් එන බස් නිතර නිතර සෝදිසියට ලක්වන හෙයින් ඒවා කොට්ටාව මහරගම අවටදී නියෝජිතයන් අතට පත්වේ. එතනින් එහාට ආරක්ශිතව බෙදා හැරීම මෙම ජාලයයි. නාවින්නේ කීර්ති මෙහි එක් ප්‍රධාන තැරැව්කරුවෙකි.

මහේෂ් හමුවී කතාකල කීර්ති ඔහුගේ බස් රථයෙන් දින දෙක තුනකට වරක් පැකට් කරන ලද ගංජා පාර්සලයක් පිටකොටුවට එවීමට එකඟ කර ගත්තේය. ඒ සඳහා ගෙවීම වරකට රුපියල් පන්සීයක් හා පැට්ටෙකි. එක කංසා සුරුට්ටුවකට සෑහෙන ගංජා ප්‍රමාණයක් එතූ කුඩා කඩදාසි පැකට්ටෙකක් පැට්ටෙක් ලෙස හැඳින්වේ. පිටකොටුව දෙවන හරස් වීදිය මෙන්ම මැනිං මාකට් පෙදෙසේත් ගංජා අලෙවිය කලේ කීර්තිගේ නියෝජිතයින් වේ. මහේෂ් ලාට අමතරව තවත් බස් රථ එකකින් හෝ දෙකකින් කීර්තිගේ ගංජා පිටකොටුවට පැමිණෙන බව දන්නා නමුත් ඒ කවුදැයි හරියටම මහේෂ්ලා නොදනිති. මේ ආදායමින් ඔවුන් දෙදෙනා දින දෙක තුනකට වරක් කොත්තුවක් හා ගල් අරක්කු බාගයක් රැගෙන කාමරයට ගොස් සප්පායම් වෙති. මහේෂ් ගේ බස් රථයෙන් ගේන පාර්සලය බාර ගැනීමට ගංජා අලෙවි කරන පුද්ගලයින් කිසිවෙකු බස් රථය අසළට නොපැමිනේ. එය සමීර හෝ මහේෂ් විසින් රැගෙන ගොස් පෙර එකඟ වූ කඩයක තබා එයි. ඒ හැර පිටකොටුවේ ගංජා විකුණන උන් හා මහේෂ්ලා අතර කිසිදු ගණුදෙනුවක් නොවේ. 

බස් රථය කොම්පඥ්ඥවීදිය කොමර්ෂල් බැංකුව අසළ නවතාගෙන සිටින අතර තුර මහේෂ් සිය අඩුම කුඩුම රැගත් කළු පාට කුඩා මල්ල හොඳින් පිරික්සා බැලුවේය.කළුපාට නොකියා වර්ගයේ ජංගම දුරකථනය එහි සුරැකිව ඇත. තවම ඔන් කරන්නට වෙලා වැඩිය. මහේෂ් දැන් සෑහෙන කලෙක සිට මෙවන් ජංගම දුරකථනයක් මිළදී ගැනීමට සිතුවත් එහි මිල එකවර ගෙවා දැමීමට ඔහුට නොහැකිය. දරුවන් තිදෙනා බලා ගන්නා අම්මා වෙත සති දෙකකට සැරයක් රුපියල් අටදාහක් හෝ දහ දාහක් ඔහු දැමිය යුතුමය. මහෙෂ් විවාහ වූයේ ඔහුගේම පුංචි අම්මාගේ දියණියක සමඟ වූ හෙයින් ඒ විවාහයට දෙපසින්ම තදින් විරුද්ධ විය. මහේෂ්ට බර වාහන ලයිශන් තිබූ හෙයින් ඔහුව හමුදාවේ රියදුරු අංශයට ඇතුල් කිරීමට ඒ වනවිටත් හමුදාවේ රියදුරෙකු වූ ඔහුගේ මාමා කටයුතු කරමින් සිටියේය. පුංචි අම්මාගේ දියණිය සාමාන්‍යපෙළ විභාගය යන්තං සමත්ව ගෙදර ඉන්නා අතර දෙදෙනා අතර ඇයි හොඳැයියක් ඇතිවී ඔහු සිය බිරිඳ වීමට කැමැත්තෙන් උන් නැගෙණියද කැටුව සිය ගම්පළාත වූ හසළකින් පලා යන විට ඔහුගේ වයස අවුරුදු විසි දෙකක් වූයේත් නැත.

වෙන්න බිරිඳ සමඟ හසලකින් පළාගිය මහේෂ් තෙල්දෙණිය ප්‍රදේශයේ හාඩ්වෙයාර් එකක ලොරියක මුලින් ගෝලයෙකු ලෙසත් පසුව රියදුරා ලෙසත් වැඩ කරමින් හාඩ්වෙයාර් මුදලාලිටම අයිති කුඩා කාමරයක බිරිඳ සමඟම නැවතී උන්නේය. සිය බිරිඳට පළමු දරු ප්‍රසූතියට ආසන්න වනතුරුත් ඔවුන් විවාහ වී නොසිටිය බව දැනගත් මුදලාලි හාමිනේ මැදිහත්ව ඒ කටයුතු පිළිවෙලක් කර දුන්නාය. ඉතා දක්ශ ලෙසත් විශ්වාසවන්ත ලෙසත් රාජකාරී කල මහේෂ් ටික දවසකින්ම මුදලාලිගේ ප්‍රියතම ගෝලයෙක් බවට පත්විය. තෙල්දෙණියේ මුදලාලි බස් රථයක් මිළදී ගත්තේ ඔය අතරයි. හා හා පුරා කියා මුදලාලි මිළදී ගත් බස් රථයේ ප්‍රථම රියදුරා වීමටද මහේෂ්ට හැකිවිය. මහනුවර-හඳුන්ගොමුව අතර ධාවනයට යෙදවීමට ප්‍රථම මුදලාලි ගේ පවුලේ උදවිය හා මහේෂ්ගේ බිරිඳ හා දරුවාද සම්ඟ කතරගම වන්දනාවට ගොස් එන අතර මුදලාලිගේ පෙරැත්තයට මහේෂ් හසළක දෙකේ ඇළ ප්‍රදේශයේ පිහිටි සිය නිවස දෙසට බස් රථය ධාවනය කළේය. 

බරවර්ධන ඔය  අසබඩ පාර අයිනේ අලුත්ම බස් රථය නවතා සිය බිරිඳ හා දියණියද කැටුව තවත් සෙනඟක් පිරිවරා වසර දෙක තුනකට පසුව ගමට එන මහේෂ් දෙස ගම්මු අමුතු වීරත්වයකින් යුතු කුතුහලයකින් බැලීය. සිඟිති දියණියගේ සුරතලයත් මුදලාලි හාමිනේ සහ මුදලාලිගේ මැදිහත් වීමත් තරුණ යුවළ මේ වන විට ලබා තිබූ ප්‍රගතියත් නිසා බිරිඳගේ මව ඉතා ඉක්මණින් මහේෂ් සහ සිය දියණිය සමඟ විරසකය අත් හැරිය මුත් ඇගේ වැඩිමල් සොහොයුරිය වූ මහේෂ් ගේ අම්මා තවදුරටත් නොරුස්නා මුහුණෙන්ම උන්නාය. මුදලාලිගේ මේ කරුණාව උදෙක්ම මහේෂ්ලාගේ යහපත පිණිස නොවූයේ නොබෝ දිනකින් ඇරඹෙන තම බස් සේවාවට අතරමඟ සිටින මහේෂ්ලාගේ ඥාතීන්ගේ සහයෝගය හා ආරක්ශාව ලබා ගැනීමේ යටි අරමුණක්ද සහිත විය. බස් සේවාව ඇරඹී නොබෝ දිනකින්ම මහේෂ් සිය බිරිඳ හා දරුවාද සමඟින් ගමට පැමිණ බිරිඳගේ නිවසේ නවාතැන් ගත්තේය. බස් රථය රාත්‍රීයේ හඳුන්ගමුවේ නවත්වන බැවින් මහේෂ්ට වාහනයක එල්ලී හෝ නිවසට යාමට ඒමට හැක.

"ආ..කොට්ටා..බහින්න..කොට්ටා..ව්.. ඔක්කොම ඉස්සරහින් බහින්න.. කවුරුත් ඉන්නෙපා බස්සෙකේ.. දැම්ම යන්නේ නෑ අපී..ඊ" සිතුවිළි අතර සිරවී මෙතෙක් බස් රථය පදවාගෙන ආ මහේෂ් සමීරගේ හඬින් අවදිව ස්ටියරින් වීල් එක වටා තුන් වරක් අත්දෙක ගෙන ගොස් කොට්ටාව බෝධිය දෙස බලා පස්ස උස්සා ස්ටියරින් වීල් එකට වැඳ බස් රථය කරකවා නැවතුම්පොළට ඇතුල් කලේය. "වෙලා තියෙනව.. දහයයි විස්ස දාගනිං ටයිම්මෙක.. දාගෙන වරෙං යන්න කන්න.. යකෙක් කන්න බඩගිනියි"

*****************************************

මීගමු පාරේ පසෙකට වෙන්නට අතර කල අලුත්ම සුදුපාට ඇලියොන් වර්ගයේ කාරෙයෙන් බැස වත්තල පොලිස් ස්ථානය ඇතුළට ඇවිද ආ සුන්දර තරුණ කාන්තාව හා මැදිවියේ පිරිමියා පිළිගැනීමට සාජන් ජයශංක ඉදිරියට ඇවිත් සිටියේය. 

"මැඩම් ලා කෝල් කරලා ආපු එක හොඳයි. ඕඅයිසී මහත්තය යන්න හැදුවේ මම තියාගත්තා ටිකක්. ඉස්සෙල්ල මහත්තයාට කතා කරලා එන්න" 

"අනේ තැන්කියු මිස්ටර් ජයශංක.. ආ. ඔන්න ඔයාට මම තව හකුරු ටිකක් ගෙනාවා.." යැයි පැවසූ තරුණ කාන්තාව පසුපසට හැරි ඔවුන් පසුපසින් ආ කාන්තාවට යම් ඉඟියක් කලාය.

"ආ.. ඒවා නම් මොනවද.. මෙතන එපා. ඇතුලේ ඔෆිස්සෙකේදි ගන්න බැරිය. සර්ගේ පාර්සල් එක අරගෙන මැඩමුයි මිස්ටර් සෙනෙවිරත්නයි විතරක් යමුකෝ මාත් එක්ක.. ඔය ළමය අතනින් ටිකක් ඉන්න. මම එන්නම්" කියා සාජන් ජයශංක ස්ථානාධිපතිගේ නිළ කාමරයට යාමට ඉස්සර විය.

මුලින් ඇතුළට ගිය සාජන්වරයා නිළධාරියාට ආචාර කොට ඇතුළට එන ලෙස අමුත්තන් දෙදෙනාට හිසින් සන් කළේය. 

"සර්.. මේ අර NIB එකෙන් ඉන්ක්වයර් කරන්න එවලා තිබ්බ මිසින් වෙච්චි ලොරිය අයිති කම්පැණි එකේ..."

"ආ.. යෙස්. මට සාජන් මහත්තය කියුව විස්තරේ. එන්න වාඩි වෙන්න. මොකක්ද මේ නෝනගේ නම?" එළඹ යන මැදිවියේ හුන් ස්ථානාධිපතිවරයා සිය කපටි පෙනුමැති ගිජු දෑස තරුණ කාන්තාව වෙතම යොමු කරගෙන ඇසුවේ ඇගේ රූ සපුවෙන් වශීකෘත වූවෙකු පරිද්දෙනි. කාන්තාව යම් අපහසුතාවයකට පත් වූ බව ඇගේ ඉරියව්වලින් පැහැදිලි වූ නමුත් වහා සිනහවක් උපදවාගත් ඇය

"මම ෂෙලීන්.. මේ ඉන්නේ අපේ මැනේජර් මිස්ටර් සෙනෙවිරත්න. මම හේකිත්ත ලේන් එකේ M.S. Direct Distributors කම්පැණි එකෙන්.." යනුවෙන් කෙටි හැඳින්වීමක් කලේය. 

"සර්.. හොඳ කිතුල් හකුරු තිබුණා එතන. එදා ඉන්ක්වයරි එකට ගිය වෙලාවේ අපිට තේ බොන්න හම්බ වුනා. ඩයබැටික් නිසා සර්ත් තේ බොන්නේ කිතුල් හකුරු එක්ක කියුවම මෙන්න මේ සර්ට හකුරු වගයක් ගෙනත් මේ අය.. මම ඒත් කියුවා සර් බණියිද දන්නෙත් නෑ කියලා" කියමින් සාජන් වරයා සෙනෙවිරත්න මහතා ළඟ තිබූ හකුරු සහ තවත් බොහෝ දෑ අඩංගු යැයි සිතිය හැකි බරැති පාර්සලය ඔසවා ස්ථානිධිපතිවරයාගේ පැති මේසයේ කෙළවරකින් තැබුවේය.

"හොඳ කිතුල් හකුරු නම් ඉතින් කවුරුත් කනවා"යි දෙපැත්ත කැපෙන අසංවර විහිළුවක් කල ස්ථානධිපතිවරයා "ඒත් අපි ඕවා බලාපොරොත්තු වෙන්නේ නෑ. රාජකාරිය තමයි වැදගත්" කියා තරුණ කාන්තාව දෙස යළිත් බලා හොඃ හොඃ ගා හිනාවක් නැගුවේය. ඉන්පසු උගුරේ රැල් බුරුල් හැර ගැඹුරු හඬකින්

"දැන් මොකද ලොරියටයි ගෝලයාටයි වෙලා තියෙන්නේ? තාම ආවේ නැද්ද? සාජන් ජයශංක අපේ රිපෝට් එක යැව්වා නේද බුද්ධි කාර්‍යාංශයට? AS මහත්තයාටයි DIG මහත්තයාටයි පිටපත් කලානේ"

"ඔව් සර්, ඊයෙම යැව්වනේ"

"එතකොට ඔය නෝනලා ආවේ?"

"මම කියුව සර් ඇවිත් පැමිණිල්ලක් දාන්න කියල අනිත් ලොරි ටික ඔක්කොම ආවට පස්සේ මේ වාහනෙයි රියදුරායි ආවේ නෑ කියල.. එතකොට මෙයාලටත් හොඳයි. අපිටත් යම් ක්‍රියාමාර්ගයක් ගන්න පැමිණිල්ලක් තියෙනවානේ සර්"

"ඔව්. ඒක හොඳයි. එහෙනම් ඔයාල පැමිණිල්ලක් දාල යන්න. අපිට ලැබන තොරතුරක් තිබ්බොත් අපි දන්වන්නම්. සාජන් ජයශංකත් එක්ක සම්බන්දතාවය දිගටම තියාගන්නකෝ"

******************************************************

දහයයි විස්සේ ටර්න් එකට කොට්ටාවෙන් ඇද්දවූ බස් රථය තිඹිරිගස් යාය හරියෙන් පසු වෙනදාට වඩා හෙමින් ගමන් කරන බව සමීර නිරීක්ශණය කලේය.. අතරමඟ හෝල්‍ට් එකකදී ඉදිරි දොර වෙත දිව ආ සමීර 'මහේෂයිය ඇදලා යමං.. ෂේප්.. 12ට කලිං හරවන්න පුලුවන්'ය කියූවට මහේෂ් 'හ්ම්' කියුවා විනා වේගය වැඩි කල බවක් දක්නට නොලැබිනි. මැලේ වීදිය හරියේදි පසුපසින් ආ හෝමාගම බසය හෝන් එකක් ගසා මහේෂ්ලාව පසු කරමින් ඉදිරියට ගියේය. වෙලාව බැලූ මහේෂ් 'තව විනාඩි පහළොවක්' කියා තමාටම කියාගෙන වටපිට බලා සමීර අහල පහල නැති බව වටහාගෙන සිය අඩුම කුඩුම බෑගයේ තිබූ කුඩා ජංගම දුරකතනය ගෙන එය පණ ගන්වා උඩ සාක්කුවට ඔබා ගත්තේය. 

කොටුව බෝ ගහ යටින් සියළු දෙනා බස්සවා බැස්ටියන් මාවතෙන් බසය හරවා ගත් මහේෂ් දොළහට විනාඩි පහක් පමණ වෙද්දි කොටුව ස්ටේසම ආසන්නයට බස් රථය රැගෙන ආවේය. 

"සමීර වරෙන්. මේක ගනින්. ටික ටික ඉස්සරහට ගනිං. හදිසියක් නෑ. මම බොගක් දාලා එන්නං. පාලම පන්නන්න එපා ලියනවා..'' කියා සමීරට සුක්කානම පවරා බස් රථයෙන් බැස මාර ගස් හෙවනේ වූ පෙට්ටි කඩයට ගොඩ වැදී සිගරට්ටුවක් දල්වා ගත්තේය. වෙලාව හරියටම දොළහයි එකය. 'ඩ්‍ර්‍ර්‍ර්‍ර්‍රර්ර්ර්..' හඬක් නගමින් වයිබ්‍රේට් වූ දුරකතනය අතට ගත් මහේෂ් එහි සඳහන් වූ අංකය දෙස හොඳින් බලා කෝල් එක කට් කර දැමුවේය. තවත් තත්පර තිහකට පමණ පසුව නැවත එම අංකයෙන්ම ඇමතුම ආ හෙයින් උරමින් සිටි සිගරට් කොටය බිම දමා පාගා දැමූ හේ ඇමතුමට සම්බන්ද වී මිනිසුන් රැඳි ඉසව්වෙන් මදක් ඈත් මෑත් විය. 

'හෙලෝ'

"කෝල් සයින්"

"ඇල්ෆා රෝමියෝ"

"නියමයි කොල්ලෝ.. නියමයි. උඹ වැඩේ තිතටම කරා. මුත්තවර් උඹව සෑහෙන්න ඇප්‍රිශියේට් කරා. උඹ කිසිම කරදරයක් කරෙත් නෑ. ප්‍රශ්ණයක් ඇහුවෙත් නෑ කියල. ජයියගෙ රෙකමන්ඩේශන් එක හරියටම හරි උඹ ගැන"

"හ්ම්" 

"මොකද උඹ කතා නැත්තේ? උඹට සෙට් නැද්ද වැඩේ?"

"නෑ. එහෙම එකක් නෑ... කියන්න... මම කැමතියි"

"රයිට්, අනිද්දා සෙනසුරාද තියෙනවා ලොකු වැඩක්.. උඹ හෙට හවස දෙක වෙද්දි යන්නෝනි කොළොන්නාවෙ තෙල් ගබඩාවට. හෙට එතන උඹව රෙජිස්ටර් කරනව බවුසර් ඩ්‍රයිවර් කෙනෙක් විදියට. රෙජිස්ටර් කරන්න කලින් උඹේ අයිඩෙන්ටි ලයිසන් ගන්න මුත්තවර් උඹට කෝල් කරයි. මුත්තවර් කොළඹ ඉන්නව. හම්බ උනාම වැඩේ වෙන විදිය උඹට කියයි. මේක ටිකක් අමාරු වැඩක්. අමාරු කියන්නේ.. වැඩේ එක දවසින් ඉවරයි. ආපහු විත්ඩ්‍රෝ වෙන්න දවසක් දෙකක් යයි. පොඩ්ඩක් පයින් කැලේ මැදින් එහෙම එන්න වෙයි. මුත්තවර් ගේ උන් ඒවා ඔක්කොම ඇරේන්ජ් කරයි. උඹ කෝකටත් අමතර ඇඳුමක් දාගෙන පලයන්. අනිත්වා පෙර පරිදිමයි. මතකනේ. හෙට යද්දිවත් අනිත්දා යද්දිවත් අඳුන ගන්න පුලුවන් කිසිම දෙයක් ගෙනියන්නේ නෑ. මුත්තවර් දෙන එකක් විතරයි. තේරුණානෙ?"

 "ඔව්. තේරුණා"

"හරි. ගුඩ් ලක් පුතා.. හෙට එක වෙද්දි කෝල් එක එයි ෆෝන් එක ඔන් එකේ තියාගනිං."

"හරි"

***************************************************

"හරි.. යමං.. ඇදල ගියොත් එක හමාරට නුගේගොඩින් ස්කූල් ක්‍රවුඩ් එක ගහතෑකි.."

"ආ.. නගින්න.. හොඳේක.. දිගේක.. වේගෙන් යනේක.. ඔට්ටා..ඔට්ටා..ඔට්ටාව්...අ" 

"ආ.. ඕම නගින්න.. ගෙඩවෙන්න..ගොඩවෙන්න.. ටවුනෝල්.. කිල්ලපන.. නුගේ..ඩ..මාරගම..ඔට්ටා..ඔට්ටා..ඔට්ටා...ව්..අ" 

****************************************

හමුවෙමු පස්වෙනි දිගහැරුමෙන්..

- ක.මි.

Monday 20 February 2023

Check Point..! 3 වෙනි දිගහැරුම

 2 වෙනි දිග හැරුමට..


සාමාන්‍යයෙන් මෙවැනි බයිසිකල් හඬවල් හෝ දොරටු තට්ටු කිරීම් මේ වීදියෙ එතරම් තැකීමකට ලක්වන දේවල් නොවේ. ගණිකාවන් හෝ මත්ද්‍රව්‍ය සොයා එන උන්, මුදල් පොළියට ගෙන ගෙවීම් පැහැර හරින්නන් සොයා එන උන්, හදිසි වැඩකට ඩ්‍රයිවර් කෙනෙක්, වාහන මිකැනික් කෙනෙක්, රාත්‍රී කොන්ක්‍රීට් වැඩ වලට යන මත් කුඩට ඇබ්බැහිවූවන් හොයා යන උන් නිතර මෙලෙස රාත්‍රියේ බයිසිකල් වලින් තොරතුරු සොයා එයි. ඒත් අද නම් මහේෂ් ගෙ හිතට පොඩි කුකුසකි. කෙසේ උවත් දෙවන වර තට්ටු කිරීමට ප්‍රථම මහේෂ් දොර පලුව විවර කළේය. මුහුණ පුරා රැවුලක් වවාගෙන ගණකම් රාමුවක් සහිත හතරැස් කන්ණාඩි දෙකක් පැලඳි කෙට්ටු උස තරුණයෙක් කාමරයේ දොරකඩ හිටගෙන සිටියේය.. 

"කෝල් සයින්?" මහේෂ් දෙස තියුණු බැල්මක් හෙලූ ඔහු සිහින් හඬින් මහේෂ් විමසුවේය. කළු හැඳගත්, හැඩි දැඩි ආයුධ සන්නද්ධ ගොරෝසු මිනිසෙකුගේ පැමිණීම අපේක්ශාවෙන් සිටියාක් වැනි වූ වික්ෂිප්ත බැලමකින් තරුණයා දෙස බලා හුන් මහේෂ් තරුණයාගේ සෞම්‍ය හඬින් යම් සැහැල්ලුවක් ලද්දේ, එක්වරම සිහි එළවා ගත්තේය. 

"ඇ..ඇල්ෆා රෝමියෝ"

"හෙට දවල් දොළහත් දොළහයි පහත් අතර කෝල් එකක් එයි. පළවෙනි පාර කට් කරලා දෙවෙනි පාර ආන්සර් කරන්න. සයිලන්ස් දාලා ඇත්තේ. ඕනෙ උනොත් චාජරේකුත් තියෙනව"යි කියා නොකියා වර්ගයේ කුඩා ජංගම දුරකතනයක් සහ චාජරයක් දැමූ කුඩා ඉටි බෑගයක් මහේෂ් අත තැබු තරුණයා පියකරු සිනහවක් පා පිටව ගියේය. එසැණින් කලුවරේම ට්‍රේල් වර්ගයේ මෝටර් බයිසිකලයද සැර දමා ඉගිල ගියේය. මහේෂ් සෝදිසි කිරීමකින් පවා තොරව හනික ෆෝන් එක හා චාජරේ අඩංගු ඉටි කවරය තම ගමන් මල්ලේ සඟවා තබනවාත් සමඟම වාගේ සමීර සිය තෙත ඇඟ කුඩා තුවා කැබැල්ලෙන් බාගෙට ඔතාගෙන අඩනිරුවතින්ම කාමරයට ඇතුල් විය. 

"කවුද මහේෂයියා"

"පොඩි කොල්ලෙක් බං, කෙල්ලෙක්ගෙ නමක් කියල හොයනව මං අහලවත් නෑ මේ ලේන් එකේ"

"බඩ්ඩක් හොයනව හරි නැත්නම් කෑල්ල පන්නගෙන යන්න ඇවිල්ලද දන්නේ නෑ" සමීර සිය උස් ගොරහැඬි හඬින් කියමින් හොක හොක ගා සිනාසුණේය. ඒ අවසරෙයෙන් මහේෂ් දුම් වැටියක් දල්වා ගත්තේය..

"මඟුලක් පත්තු කරගත්තේ වොශ් එකක් දාගන්නවනම් දාගෙන වරන්කො මං අරක ඔතල තියන්න.. ගසල බුදියන්නෝනි. හක්ක පැනල ඉන්නෙ බොසාට හම්බ කරන්න කෑගහලාම"

"උඹ ගහල බුදියපං. මට අද එපා. ඇඟට අමාරුයි. ඕක ගැහුවොත් නාගසලං වෙනව" 

*******************************************

මේ අතර රාජකාරී කටයුත්තක් සඳහා හදිසියේ කොළඹ පැමිනි අරුල් දේවනායගම් පසුදා උදෑසන සිය ප්‍රධානී දිසාපත්තුමිය ඇමතුවේය. 

"Ma'am, good morning! Dewa here" 

"Yes Dewa, very good morning! any good news too for us?"

"නෑනේ, මැඩම්.. අපරාදෙනේ ඊයේ හදිසියේම මාව කොළඹ ගෙන්නුවේ.. Fuel distribution plan එක බ්‍රීෆ් කරන්නනේ එන්න කියලා තියෙන්නේ. අපිට ඉස්සරහ සති දෙකේම ආයේ තෙල් එන්නේ නෑ. මේ සති දෙක සම්පූර්ණයෙන්ම ට්‍රින්කො සහ බැටී යවනව කියුවේ. පෙට්‍රෝල් එවන්න සති තුනක්වත් යයි.. අපේ පොඩි ස්ටොක් එකක් නම් තියෙනවා. ඉමර්ජන්සියක් නොවුණොත් මැනේජබල්"

"අපොයි.. ඕක over the phone කියුවනම් ඔයා එහෙ මෙහෙ යන තෙල් ටිකත් ඉතුරුනේ.. මේ මිනිස්සුන්ගේ ඇඩ්මිනිස්ට්‍රේශන් නම් කතා කරලා වැඩක් නෑ. ඔක්කොමත් හරි.. ඔයා ඊයේ හදිසියේම මගේ සැටලයිට් ෆෝන් එකට කෝල් කරනකොට මම හිතුවේ එක්කෝ නැතිවෙච්චි ට්‍රක් එක ඇවිල්ල කියල.. නැත්නම් ඔයාගෙ වයිෆ් delivery එකට admit කරලාවත්ද කියල.. ඔයා වැඩ ඉවර කරලා ජැෆ්නා දුවන සිහියෙන් නේ හිටියේ.."

"නෑ මැඩම්.  ඒකට තව ටික දවසක් තියෙනවා. ඒක නෙවෙයි. what's up with the missing truck?

"Today also I checked with Wanni Commander. No update yet."

"මගේ ඉන්ෆෝමන් කෙනෙක්ගෙන් ආරංචියක් ආවා ඩ්‍රයිවර් පදිවි ශ්‍රීපුර බෝඩර් එකේ එක්කෙනෙක් කියල, donno whether they check on that or not?"

"I think they are checking. I too heard this as a rumour only. Army guys don't say anything නෙහ්."

"Yeah ma'am.. එයාල ඒක ගැන බලයි. අපිට වද වෙන්න වෙන්නේ අපේ මෙඩිකල් අයිටම් ටික ඉක්මණට ගෙන්න ගන්න තමයි ආයෙමත්"

"ඔව්. දේවා..ඔය ගමන් ඒකත් පොඩ්ඩක් බලලා එන්න"

"Sure ma'am.. මම ඒකත් බලනවා අදම. ආ.. මට හෙට නිවාඩුවක් ඕනි. කොළඹ ආපු එකේ ලොකු වැඩක් තියෙනවා කරන්න. මගේ brother in law මොරටුවට සිලෙක්ට් වුනානේ. Electrical Engineering. තව ජැෆ්නා කොල්ලො තුන් දෙනෙක් ඉන්නව. උන්ට කොළඹින් සේෆ් අකමඩේශන් එකක් හොයල දෙන්නෝනි. ෆස්ට් යියර් හොස්ටල් නෑ. හොස්ටල් හමබ උනත් කරදරයි අපේ අයට අනිත් උන් එක්ක. මම බැලුවේ දන්න කියන තැනකින් ගෙයක් හොයල දීල කීප දෙනාම එකට නතර කරවන්න"

"අනේ ඇත්තද.. please convey my congratulations to him. අනේ.. මිස්ටර් ඉලෙයිරාජා හිටියනම් කොච්චර සතුටු වෙයිද අද.. කමක් නෑ දේවා. ඔයා ඉඳලා ඒක කරලා එන්න. ඔයා ඒ ළමයි ගැන බලන එක කොච්චර ලොකු දෙයක්ද? දෙවියෝ ඔයාව බලාගනියි."

සෞම්‍යරාජා මහත්මිය දේවාගේ මාමණ්ඩිය හෙවත් තිරුසෙල්වම් ඉලෙයිරාජා මහතා යම් තරමකට දැන සිටියාය. වසර එක හමාරකට පමණ එපිට සංවිධානයට ද්‍රෝහී වීමේ ලේබලය මත ඉලෙයිරාජා මහතා නාදුනන තුවක්කුකරුවෙකුගේ ප්‍රහාරයකට ලක්ව යාපනයේදි මියයනවිට ඒ හා සම්බන්ධ යම් යම් රාජකාරීන් සඳහා දායක වීමටද ඇයට සිදුවිය. ඔහු දේවා මෙන්ම හොඳින් සිංහල බාශාව හැසිරවූ දකුණේ ඉහල සම්බන්ධකම් තිබූ මෙන්ම බොහෝ ඇසූ පිරූ තැන් ඇතිව විසූ යාපනයේ ප්‍රකට නිහතමානි සමාජ ක්‍රියාකාරිකයෙකු ලෙස ඈ දැන සිටියාය. විරසකව පවතින දෙජාතිය සමඟි සම්පන්න කිරීමට නිරන්තරයෙන් වෙහෙස වූ ඒ වෙනුවෙන් සැබෑ උවමනාවක් තිබු සුළුතරය අතරින් ඔහු කැපී පෙණුනි. නමුත් සංවිදානයේ අරමුණු වෙනස්‍ය. එයට එරෙහිව යන ඕනාම අයෙකු දේශද්‍රෝහියෙකු ලෙස ඉවත් කිරීමට ඔවුන් පසුබට නොවෙති. දමිළ රාජ්‍ය නිළදාරීන් ලෙස තමන් මෙවැනි අසීරු කටයුත්තකට මේ අවස්ථාවේ එක්වී සිටිති. දේවා ගැන සෞම්‍යරාජා මහත්මිය වඩාත් බියපත් වූවාය. ඔහු අත්‍යාවශ්‍ය සේවා නිළධාරියා ලෙස මේ හැම දෙනා සමඟ කටයුතු කල යුතුය. සියලුදෙනා එකවර සතුටු කිරීම කිසි සේත් පහසු නැත.

"තැන්කියු මැඩම්. I'll be back on Monday"

***********************************************

අද බොහොම ටිකයි කතාව.. තව දවස් දෙකකට මේ පැත්තේ එන්න වෙන්නේ නැති නිසා ඉක්මණට මේ ටික පෝස්ට් කරලා යන්නේ..

4 වෙනි දිග.... හැරුමෙන් හම්බ වෙමු. ජයවේවා!

ක.මි.